Daxili işlər orqanlarının qarşısında duran vəzifələrin yerinə yetirilməsi, polis-vətəndaş münasibətlərinin daha da möhkəmləndirilməsi, ictimai təhlükəsizliyin təmini, cinayətlərin profilaktikası məqsədilə polis veteranları vaxtilə çalışdıqları ərazi polis orqanları və nizami hissələrdə daha sıx təşkilatlanaraq fəallıq göstərir.
Polis veteranları şəxsi heyətin xidməti və peşə hazırlığında gənc əməkdaşlara əməli köməklik göstərilməsində bacarıqlarını əsirgəmir.
Yeniyetmə və gənclər arasında antinarkotik təbliğatın güclənməsi, dini radikalizmə qarşı mübarizə, azyaşlılar arasında erkən nikah və intihar hallarının qarşısının alınması məqsədilə polis şöbələri rəhbərliyi və aidiyyəti xidmət əməkdaşları polis veteranları ilə birgə ayrı-ayrı təhsil müəssisələrində, kəndlərdə vətəndaşlarla görüşlər keçirərək hüquqi mövzularda maarifləndirmə işləri aparır.
Belə görüşlərin bir neçəsi bu yaxınlarda Tovuz RPŞ-nin veteranlar şurasının təşəbbüsü ilə gerçəkləşib. Şura üzvləri rayonun ayrı-ayrı təhsil müəssisələrində, Qaraxanlı kənd mərkəzində Xatınlı, Qədirli, Əyyublu, Qovlar şəhərində və digər kəndlərdə vətəndaşlarla görüşlər keçirərək əhali arasında maarifləndirmə işləri aparıb.
Yeri gəlmişkən, cari ilin ötən dövründə RPŞ-nin veteranlar şurasının üzvləri 8 mənzil oğurluğu, 1 dələduzluq, 10 yol-nəqliyyat hadisəsi, 2 narkotik vasitələrin qanunsuz dövriyyəsi, 2 seksual xarakterli hərəkət, 10 qəsdən sağlamlığa az ağır xəsarət yetirmə hadisələrini törətmiş şəxslərin müəyyən edilməsində, həmçinin axtarışda olan 5 nəfərin yerinin müəyyən edilməsində, 7 itkin düşmüş şəxsin tapılmasında yaxından köməklik göstərib.
Natiq CAVADOV DİN Mətbuat Xidmətinin əməkdaşı, polis baş leytenantı
