Bu gün Milli Televiziya və Radio Şurasında (MTRŞ) İctimai Televiziya və Radio Yayımları Şirkəti (İTV) Yayım Şurasının iclası keçirilib. MTRŞ-nın aparat rəhbəri Toğrul Məmmədovun APA-ya verdiyi məlumata görə, iclasda Yayım Şurasının üzvləri tərəfindən İTV-nin baş direktorunun seçilməsi prosesi keçirilib. O qeyd edib ki, Yayım Şurasının qərarı ilə Cəmil Quliyev növbəti dəfə İTV-nin baş direktoru seçilib.
Qeyd edək ki, MTRŞ-in İTV-nin baş direktorunun səlahiyyət müddətinin başa çatması ilə əlaqədar bu vəzifəyə seçilmək üçün namizədin müəyyənləşdirilməsi məqsədilə elan etdiyi müsabiqəyə 5 nəfər iddiaçı - Paşazadə Tahir Ağalar oğlu, Quliyev Cəmil Elşad oğlu, Soltanov İltifat Hacıxanoğlu, Məmmədov Tahir Tais oğlu və Ağayeva Afaq Ağaibrahim qızı müsabiqəyə sənəd təqdim edib.
Xatırladaq ki, C. Quliyevin səlahiyyət müddəti bu il aprelin 23-də başa çatıb. Kinorejissor, ssenarist, əməkdar incəsənət xadimi, Azərbaycan Dövlət Mədəniyyət və İncəsənət Universitetinin professoru C. Quliyev 1963-cü ildə Bakıda anadan olub. O, 1984-cü ildə Moskva şəhərində Ümumittifaq Kinematoqrafiya İnstitutunu kinorejissor ixtisası üzrə bitirib, 1987-ci ildən Azərbaycan Dövlət Mədəniyyət və İncəsənət Universitetində pedaqoji fəaliyyətə başlayıb. 2011-2013-cü illərdə “Mədəniyyət” telekanalının baş direktoru olan C. Quliyev 2013-cü il aprelin 23-dən İTV-nin baş direktorudur.
“İctimai Televiziyanın Yayım Şurasına təşəkkür edirəm. Onların mənə etimadı nəticəsində yenidən baş direktor vəzifəsinə seçildim. Şura üzvlərindən 9 nəfəri yenidən bu vəzifəyə seçilməyim üçün səs verdi. Çalışacağam ki, gələcək fəaliyyətimdə bu etimadı doğruldum”.
Bunu İctimai Televiziya və Radio Yayımları Şirkətinin baş direktoru Cəmil Quliyev deyib. Onun sözlərinə görə, bundan sonra rəhbərlik etdiyi qurum "İctimai Televiziya və Yayımı haqqında" qanun əsasında işini davam etdirəcək: “Həmin qanunda İctimai Televiziyanın əsas prinsipləri, vəzifələri, məqsədləri öz əksini tapıb. Bu qanunun aliliyini rəhbər tutaraq öz gələcək fəaliyyətimizi yenə də davam etdirəcəyik. Mənim üçün vacib məsələlərdən biri azərbaycançılıq məfkurəsidir. Ümummilli liderimiz Heydər Əliyev tərəfindən yaradılan azərbaycançılıq məfkurəsi İctimai Televiziyanın fəaliyyətində öz əksini hər zaman tapıb və bundan sonra da tapacaq. Əlbəttə, yeni layihələr üzərində işləyəcəyik. Bunun üçün bir qədər zaman lazımdır. Dəyişilməyən iş prinsipləri var ki, onlar yenə də prioritet istiqamət kimi davam edəcək”.
“İctimai Televiziyada kadr dəyişikliyi gözlənilir, yoxsa hazırkı komanda ilə işə davam edəcəksiniz?" sualına isə C. Quliyevin cavabı belə olub: “Komanda işləyir, iş başındadır, hələ ki, heç bir dəyişiklik gözlənilmir”.
