Dağlıq Qarabağ separatçıları işğal altında olan Azərbaycan ərazilərinə əcnəbilərin qeyri-qanuni səfərlərini gizlətmək üçün yeni varianta əl atıblar. APA-nın məlumatına görə, belaruslu səyyah Pavel Andreyevskinin Dağlıq Qarabağa səfəri ilə bağlı "telegraf.by” saytında dərc olunmuş yazısından aydın olur ki, erməni separatçıları atıq Dağlıq Qarabağa səfər edən əcnəbi vətəndaşların pasportlarına möhür vurmurlar.
P. Andreyevski yazır ki, əvvəllər pasporta vurulan möhürə görə Azərbaycan şəxsin Dağlıq Qarabağa səfər etdiyini müəyyənləşdirə və asanlıqla respublika ərazisinə daxil olmasını qadağan edə bilirdi: "Bunun da qanuni əsasları var. Axı Dağlıq Qarabağ rəsmi olaraq Azərbaycanın işğal olunmuş ərazisidir. Sən əgər Azərbaycanın möhürü olmadan həmin əraziyə səfər edirsənsə, ölkə ərazisində qanunsuz girmiş olursan. Təbii ki, bilsələr, bu cinayət üçün səni Azərbaycandan deportasiya gözləyir”.
Səyyah yazısında Dağlıq Qarabağın gəzməli yerləri barədə məlumat verib, daha çox Şuşadan bəhs edib.
Xatırladaq ki, belaruslu gənc səyyah P. Andreyevski dünya səyahətinə çıxıb. Bir ildən çoxdur ki, o, avtostoplarla dünyanı gəzir, yerli sakinlərin evlərində qalır. Daha əvvəl də Dağlıq Qarabağa getdiyi üçün onun adı ötən ilin iyununda Azərbaycan Xarici İşlər Nazirliyi tərəfindən "arzuolunmaz şəxslər" siyahısına salınıb.
"Ermənistan tərəfindən Dağlıq Qarabağ ərazisində yaradılmış qondarma rejimin işğal olunmuş Azərbaycan ərazilərinə səfər edən əcnəbi vətəndaşların pasportlarına möhür vurulmaması ilə yanaşı, digər metodlardan da istifadə edilir”.
Bu sözləri isə Xarici İşlər Nazirliyinin sözçüsü Hikmət Hacıyev deyib. O bildirib ki, Azərbaycan Respublikası tərəfindən "arzuolunmaz şəxslər” siyahısının tətbiq olunmasından sonra Ermənistan tərəfi işğal altındakı ərazilərə gedən əcnəbilər barədə məlumatları gizlətmək üçün müxtəlif metodlara əl atır: "Əvvəllər qondarma rejim tərəfindən saxta vizaların verilməsi mexanizmi tətbiq olunurdu. Bir müddət sonra aradan qaldırıldı. Sonra işğal olunmuş ərazilərə səfər edən əcnəbilərin pasportlarına möhür vurulmağa başlandı. Bu da daha sonra aradan qaldırıldı. İndi isə işğal olunmuş ərazilərə səfər edən əcnəbilərə kiçik bir kağız parçası verilir. Hər vəchlə çalışırlar ki, həmin əcnəbilər barədə məlumatlar gizlədilsin”.
H. Hacıyev qeyd edib ki, ümumiyyətlə, "arzuolunmaz şəxslər” siyahısının tətbiq olunmasından sonrakı tendensiya onu göstərir ki, işğal altındakı ərazilərə səfər edən əcnəbilərin sayı azalıb: "Burada maarifləndirmə mexanizmi də xüsusi qeyd olunmalıdır. Diplomatik nümayəndəliklərimiz fəaliyyət göstərdikləri ölkələrdə ictimai dairələri və KİV-i məlumatlandırır. Hətta əksər ölkələrin Xarici İşlər nazirlikləri Azərbaycanın işğal olunmuş ərazilərinə səfərlərdən çəkinmək barədə öz vətəndaşlarına müraciət edirlər".
