"Xocalıda soyqırımı törədilib, nə üçün bunu nəzərə almırlar?”
"Dünən Almaniya parlamenti tərəfindən ədalətsiz, qərəzli, tarixi yalan üzərində qəbul edilmiş qətnaməni Azərbaycan dərhal qınadı, pislədi".
Trend-in məlumatına görə, bunu Azərbaycan Prezidenti İlham Əliyev Bakıda Türkiyənin Baş naziri Binəli Yıldırımla birgə mətbuata bəyanatla çıxışında deyib.
Dövlətimizin başçısı qeyd edib: "Azərbaycan Xarici İşlər Nazirliyi bəyanat verdi və bu gün mən ölkə Prezidenti kimi bir daha bu yalan üzərində qurulan təxribatı pisləyirəm, qınayıram. Bu, ədalətsizlikdir, ikili standartlardır, tarixin təhrif edilməsidir".
İlham Əliyev bildirib ki, Türkiyə-Azərbaycan əlaqələri yüksək səviyyədə inkişaf edir. Dövlətimizin başçısı qeyd edib: "Bu il mən üç dəfə Türkiyədə səfərdə olmuşam. Hörmətli Prezident Rəcəb Tayyib Ərdoğan Azərbaycana səfər edib. Bu il artıq yüksək səviyyəli beş görüş keçirilib. Bu da özlüyündə bir göstəricidir ki, Türkiyə-Azərbaycan əlaqələri yüksək səviyyədə inkişaf edir və yüksək səviyyədədir".
İlham Əliyev hesab edir ki, dünyada Türkiyə ilə Azərbaycan kimi bir-birinə yaxın olan ikinci ölkələr tapmaq mümkün deyil: "Bütün sahələrdə əməkdaşlıq, işbirliyi davam edir, biz daim bir-birimizin yanındayıq, bir-birimizi dəstəkləyirik. Bütün beynəlxalq təşkilatlarda birlikdə fəaliyyət göstəririk".
Azərbaycan Prezidenti xatırladıb ki, bu yaxınlarda Türkiyədə İslam Əməkdaşlıq Təşkilatının Zirvə görüşü çərçivəsində Ermənistan-Azərbaycan, Dağlıq Qarabağ münaqişəsi ilə bağlı çox önəmli qərar qəbul edilib, təmas qrupu yaradılıb: "Türkiyənin bu qərarların qəbul olunmasında çox böyük rolu olub. Türkiyə Ermənistan-Azərbaycan, Dağlıq Qarabağ münaqişəsinin həlli işində daim Azərbaycanın yanındadır və biz bu dəstəyə görə minnətdarıq".
Dövlətimizin başçısı bildirib ki, uzun illər Azərbaycanın beynəlxalq birlik tərəfindən tanınan ərazisi işğal altındadır, bir milyondan çox azərbaycanlı qaçqın və məcburi köçkün vəziyyətinə düşüb: "Bizə qarşı etnik təmizləmə siyasəti aparılıb. Torpaqlarımızın 20 faizi 20 ildən çoxdur ki, işğal altındadır. Baxmayaraq ki, Beynəlxalq təşkilatlar, ilk növbətə, BMT müvafiq qərar və qətnamələr qəbul ediblər, ancaq məsələ öz həllini tapmayıb. BMT 4 qətnamə qəbul edib və həmin qətnamələrdə göstərilir ki, erməni silahlı qüvvələri işğal edilmiş torpaqlardan dərhal və qeyd-şərtsiz çıxarılmalıdır. O qətnamələrin qəbul olunmasından 20 ildən çox vaxt keçir, ancaq bu qətnamələr kağız üzərində qalır. Nəyə görə? Çünki ikili standartlar var, ayrı-seçkilik göstərilir. Bəzi hallarda BMT-nin qətnamələri bir gün ərzində icra edilir. Amma bizə gəldikdə bu, 20 ildən çoxdur ki icra edilmir. İşğalçı dövlətə heç bir sanksiya tətbiq edilmir. Bu bir ədalətsizlikdir".
Prezident qeyd edib ki, Azərbaycan öz prinsipial mövqeyini gücləndirir, siyasi, iqtisadi, hərbi üstünlüyü əldə edib: "Aprel döyüşləri bunu bir daha göstərib. Ermənistanın hərbi təxribatı cavabsız qalmayıb, Azərbaycan Ordusu əks-hücum əməliyyatı keçirib və əks-hücum əməliyyatı nəticəsində 20 kvadratkilometrdən çox ərazi işğalçılardan təmizləndi, bundan bir neçə dəfə böyük ərazi də Azərbaycan Silahlı Qüvvələrinin nəzarətinə keçdi. Biz çalışırıq və çalışacağıq da ki, bu məsələ sülh yolu ilə, danışıqlar yolu ilə həll edilsin. Status-kvo qəbuledilməzdir, dəyişdirilməlidir. Status-kvonun dəyişdirilməsi işğal edilmiş ərazilərimizdən erməni silahlı birləşmələrinin çıxarılması deməkdir".
İlham Əliyev deyib ki, Azərbaycan, öz növbəsində, bütün məsələlərdə Türkiyəni dəstəkləyir, Türkiyənin yanındadır, bəzi hallarda Türkiyəyə qarşı edilən ədalətsizliyə Türkiyə qədər heyfislənir və öz sözünü deyir.
"Ankaradakı terrordan sonra Azərbaycan prezidenti Türk xalqının qəlbində taxt qurdu”
"Ortaq tarix və mədəniyyəti paylaşdığımız Azərbaycana bu dəfə baş nazir kimi səfər etməkdən qürur duyuram”. APA-nın məlumatına görə, bunu isə Türkiyənin baş naziri Binəli Yıldırım Azərbaycan prezidenti İlham Əliyevlə geniştərkibli görüşdən sonra keçirilən mətbuat konfransında deyib. Türkiyənin baş naziri deyib ki, parlamentdə hökumət etimad aldıqdan sonra Şimali Kiprə, daha sonra Azərbaycana səfər edib: "Azərbaycan və Türkiyə münasibətləri bir millət, iki dövlət prinsipinə əsaslanır. Bu münasibətlər böyük inkişaf yolu keçib. Ankarada baş verən mənfur terror olayından sonra Azərbaycan prezidentin Türkiyəyə səfər etməklə Türk xalqının qəlbində taxt qurdu, böyük yer tutdu”.
B. Yıldırım bildirib ki, Bakı sürətlə inkişaf edir, mənzərəsi dəyişir: "Azərbaycanda bu inkişafı siz təmin etdiniz”.
"Tarixçilərin fərqli baxışı olduğu bir məsələ ilə bağlı Almaniya Bundestaqının qərarı böyük bir yanlışlıqdır” deyə Binəli Yıldırım bildirib.
Bundestaqın qondarma "erməni soyqırımı” barədə qərarının tamamilə yanlış olduğunu vurğulayan Türkiyənin baş naziri deyib ki, qısa müddətdə bu yanlışlığın aradan qaldırılacağına ümid bəsləyirlər: "Almaniyada 3 milyon türk yaşayır. Bu qərar Almaniyadakı türkləri də məyus edib. Xocalıda bir soyqırımı törədilib, nə üçün bunu nəzərə almırlar? Almaniya tarixi xətasını, eybini adiləşdirmək üçün parlament xətti ilə belə bir qərar qəbul edib”.
B. Yıldırım Türkiyənin tarixinin şəffaf olduğunu deyib: "Beynəlxalq ictimaiyyəti ikili standartlara son qoymağa, Yaxın Şərqdə yaşanan faciələrə müşahidəçi qalmamağa dəvət edirik. Almaniya parlamentinin qərarından sonra Azərbaycana ən yüksək səviyyədə mövqeyini ortaya qoyduğu üçün təşəkkür edirəm”.
"Ermənistana dur deməyin vaxtı çatıb”
"Azərbaycanın dostu dostumuz, düşməni düşmənimizdir. Dağlıq Qarabağ məsələsində hər zaman Azərbaycanı dəstəkləyirik”. Bu sözləri də Türkiyənin baş naziri deyib. O bildirib ki, Azərbaycan torpaqlarının 20 faizini işğal edən Ermənistana "dur” deməyin vaxtı çatıb: "ATƏT-in Minsk Qrupu toplanıb, dağılışır. Artıq söz zamanı deyil, iş görülməlidir. Bir dəqiqədə qərar qəbul edib, həyata keçirənlər Azərbaycan və Türkiyəyə gəldikdə fərqli davranırlar. Azərbaycanın işğal olunmuş torpaqları qaytarılan zaman bu məsələ çözüləcək. Beynəlxalq ictimaiyyətin ikili standartdan vaz keçməsinin zamanı çatıb”.
"TAP və TANAP enerji təhlükəsizliyində böyük rol oynayır”
"TAP və TANAP enerji təhlükəsizliyində böyük rol oynayır. İnşallah, 2018-ci ilin əvvəlində TANAP tamamlanacaq, Türkiyə və Avropa ölkələrinin qaz ehtiyaclarının ödənilməsində mühüm addım atılmış olacaq” – deyə B.Yıldırım bildirib.
Baş nazir bildirib ki, avqustun 26-da Sultan Səlim Yavuz körpüsünün açılışı olacaq: "Açılış mərasiminə Azərbaycan prezidenti İlham Əliyevi də dəvət edirəm. Sizin bu mərasimdə iştirakınız bizim üçün böyük şərəfdir”.
