2016-cı ilin 3 ayı ərzində paytaxtda Daxili İşlər Nazirliyi və prokurorluq üzrə 3.518 (2.933) cinayət qeydə alınıb. Trend-in məlumatına görə, bu barədə Bakı Şəhər Baş Polis İdarəsində 2016-cı ilin I rübünün nəticələrinə və qarşıda duran vəzifələrə həsr olunmuş geniş əməliyyat müşavirəsində deyilib.
Bildirilib ki, cinayətlərin 83,8%-i (2.949-ü) az ağır və böyük ictimai təhlükə törətməyən, 16,2%-i isə (569-u) ağır və xüsusilə ağır növlər olub. 2015-ci ilin eyni dövrü ilə müqayisədə, qəsdən adam öldürmələr 15,8%, qəsdən sağlamlığa ağır zərər vurmalar 12,5% azalıb, adam oğurluğu cinayəti qeydə alınmayıb.
Cinayətlərin 74,4%-nin (ötən ilin müvafiq dövründə 68,7%), ağır növlərinin 78,5%-nin (75,5%), qeyri-aşkar şəraitdə baş verənlərin 60,4%-nin (56,8%) açılması təmin olunub. Şəxsiyyət əleyhinə olan 480 cinayətdən 93,5%-i (ötən ilin müvafiq dövründə 89,9%), o cümlədən qəsdən adam öldürmələrin 94,4%-i (100%), adam öldürməyə cəhdlərin 100%-i (100%) açılıb.
Bakıda 36 cinayətkar qrup ifşa edilib
Qeyd edilib ki, bu ilin 3 ayı ərzində Bakı Şəhər Baş Polis İdarəsinin və ərazi polis orqanlarının "Təhlükəsiz şəhər" xidmətinin operatorları tərəfindən 762 hadisə aşkarlanıb.
Xidmətin kameralarının arxiv görüntülərindən istifadə edilməklə 22 bağlı cinayət açılıb.
Təqsirləndirilən şəxs qismində axtarışda olan 708 nəfərdən 42,5%-i (+5,2%, 301-i), ağır və xüsusilə ağır cinayətlərə görə axtarılan 340 nəfərdən isə 30,9%-i tutulub (+7,1%, 105-i).
Bununla yanaşı, 21 soyğunçuluq və quldurluq cinayəti törətmiş 40 nəfərdən ibarət 17 qrup, eləcə də mənzillərdən 45 oğurluq törətmiş 48 nəfərdən ibarət 19 cinayətkar qrup ifşa olunub.
