Azərbaycan Ordusunun əks-zərbələrindən sarsılan ermənilər cəbhəyanı kəndlərimizi və dinc əhalini atəşə tuturlar. Mülki vətəndaşlar arasında həlak olan, yaralanan, evləri ciddi ziyan görənlər var.
Erməni silahlı birləşmələrinin qoşunların təmas xəttində yerləşən kəndləri intensiv atəşə tutması nəticəsində evlərə və şəxsi təsərrüfatlara ciddi ziyan dəyib. Ermənilərin atdığı çoxsaylı mərmilər mülki obyektlərə düşüb. Baş verən dağıntılar ermənilərin əsas hədəfinin mülki şəxslər olduğunu, evləri və təsərrüfatları atəşə tutmaqla əhali arasında təşviş yaratmaq istədiyini ortaya qoyur.
Düşmənin Ağdamın Əhmədağalı Ərazi Vahidliyinin Şərifli kəndini atəşə tutması nəticəsində yaranan mərmi partlayışları zamanı kənd sakini, 1954-cü il təvəllüdlü Dadaşov Qaraş Şahmar oğlu həyatını itirib(APA).
Bu gün erməni silahlı qüvvələri Üçoğlan və Xındırıstan ərazi vahidliklərini də atəşə tutub. Üçoğlan ərazi vahidliyinin Ballar kəndinin ərazisinə 5 artilleriya mərmisi atılıb.
Yaşayış məntəqələrinə tuşlanan mərmilərdən biri həyətyanı sahəyə düşüb. Xəsarət alan olmayıb. Digər dörd mərmi isə kəndin yaxınlığında əkin sahələrində partlayıb.
Tərtərin Düyərli kəndində yaşayış evinə də mərmi düşüb. Xəbərə görə, erməni silahlıları mülki əhalini atəşə tutub. Evə atılan mərminin partlaması nəticəsində 2 qadın yaralanıb.
Hadisə baş verən zaman qadınlardan biri evdə, digəri isə həyətdə olub. Yaralılar Tərtər rayon xəstəxanasına yerləşdirilib. 1983-cü il təvəllüdlü Əliyeva Mehparə Nəbi qızı çoxsaylı qəlpə yaraları alıb. APA-nın xəbərinə görə, xəsarət alan qadın əməliyyat olunub. Tərtər Mərkəzi Rayon Xəstəxanasına yerləşdirilən Düyərli kənd sakini Mehparə Əliyeva şok vəziyyətindən çıxarılıb, cərrahiyyə əməliyyatı nəticəsində bədəni qəlpələrdən təmizlənib.
M. Əliyeva 3 uşağı ilə evdə olan zaman səsə bayıra çıxdığını, bu zaman qonşu həyətdə partlayan mərmi qəlpələrinin ona dəydiyini deyib: "Sadəcə, güclü səs və yıxıldığım an yadımdadır. Ondan sonra tərpənə bilmədim”.
Ermənilərin atdığı mərmilərdən biri kənd sakini Etibar Quliyevin həyətinə düşüb, ailə üzvləri evdə olduğundan xəsarət alan olmayıb.
Azərbaycanın cəbhə boyu mövqeləri və yaşayış məntəqələri Ermənistan tərəfindən intensiv atəşə məruz qaldığı üçün təhsil müəssisələrinə də ciddi ziyan dəyib.
Təhsil Nazirliyinin yaydığı məlumata görə, erməni silahlı qüvvələrinin Tərtər rayonunun cəbhə xəttində yerləşən Seydimli kəndini artilleriya atəşinə tutması və mərmilərdən birinin kənd sakini Sahib Vəliyevin həyətyanı sahəsinə düşməsi nəticəsində evin sahibi və onun 13 yaşlı nəvəsi, Seydimli kənd tam orta məktəbinin VII a sinif şagirdi Sənan Vəlizadə yaralanıb. Qolundan qəlpə yarası alan S.Vəlizadə hazırda Bərdə Müalicə-Diaqnostika Mərkəzində müalicə alır. İntensiv atəş xəttində yerləşən sərhədyanı bölgələrin ümumtəhsil müəssisələrində tədris mühiti pozulub.
Aprelin 2-də Ermənistan tərəfindən Ağdam rayonunun cəbhəboyu kəndlərinin ağır artilleriya atəşinə tutulması nəticəsində rayonun Ə.Quliyev adına I Sarıcalı kənd tam orta məktəbinə mərmi düşüb. Nəticədə məktəbdə tələfat olmasa da, təhsil müəssisəsinin binasına ciddi zərər dəyib, məktəb binasının bir korpusunun dam örtüyü, iki sinif otağı, müəllimlər otağı və dəhlizi tamamilə dağılıb. Eləcə də məktəbin digər sinif otaqlarının divarlarında çatlar yaranıb və otaqların pəncərə şüşələri sınıb. Həmin gün rayonun Ayaq Qərvənd kənd tam orta məktəbinin yerləşdiyi əraziyə düşən mərmilər nəticəsində məktəb binasına zərər dəyib, divarlar zədələnib.
Təhsil Nazirliyi Ermənistan silahlı qüvvələri tərəfindən beynəlxalq huquq prinsiplərinə zidd olaraq, cəbhəboyu ərazilərdə dinc əhalinin, təhsil müəssisələrinin atəşə tutulmasını pisləyir və məktəbliləri hədəfə almaqla onların təhsil hüququnu məhdudlaşdıran vəziyyətin ciddi narahatçılıq doğurduğunu bildirir.
Ermənilərin ağır artilleriyadan açdığı atəşlər nəticəsində 3 mülki şəxs həlak olub, bir neçə yerli sakin yaralanıb. İşğalçı qüvvələr təmas xəttində yerləşən məktəbləri, infrastruktur obyektlərini, mülki maşınları da atəşə tutmaqdan çəkinmir.
Erməni silahlı birləşmələri tərəfindən atılan mərmilərdən biri Tərtərin Azadqaraqoyunlu kənd sakinlərindən birinin evinə düşüb.
Ev sahibinin sözlərinə görə partlayış nəticəsində evdə qısamüddətli yanğın baş verib.
"Gördük yanır, vedrə ilə su tökdük, söndürdük. Heyvanları yerləşdirirdim, gəldi düşdü. İkisi də qonşudan da aşağı düşdü”, – deyə yerli sakin Mirzə Rəhimov bildirir.
Yerli icra nümayəndəsi Nazim Xəlilov kənd ərazisinə düşən mərmilərin partlaması nəticəsində hələlik iki evə ziyan dəydiyini aşkar etdiklərini bildirib. "Kəndə bir neçə yerə düşüb, hal-hazırda yeri müyyən deyil, amma xəsarət yoxdu, salamatlıqdı”.
Tərtər rayon FHN-in sədr müavini İlqar Musayev isə bildirdi ki, kəndin artilleriya silahlarından atəşə məruz qalması nəticəsində elektrik təsərrüfatına, kommunikasiya xətlərinə ciddi ziyan dəyib. Kəndə gələn qaz borusu da zədələnib. O cümlədən Tərtərin Qapanlı kəndində yüksək gərginlikli elektrik xətləri və dirəklər sıradan çıxıb.
Ermənistan Silahlı Qüvvələri təmas xəttindən xeyli uzaqda yerləşən yaşayış məntəqələrini reaktiv artilleriya qurğuları və uzaqvuran toplardan atəşə tutmağa başlayıb.APA-nın Qarabağ bürosunun xəbərinə görə, düşmənin Ağdamın Əhmədağalı Ərazi Vahidliyinin Şərifli kəndini atəşə tutması nəticəsində yaranan mərmi partlayışları zamanı kənd sakini, 1954-cü il təvəllüdlü Dadaşov Qaraş Şahmar oğlu həyatını itirib.Bu gün erməni silahlı qüvvələri Üçoğlan və Xındırıstan ərazi vahidliklərini də atəşə tutub. Üçoğlan ərazi vahidliyinin Ballar kəndinin ərazisinə 5 artilleriya mərmisi atılıb.Yaşayış məntəqələrinə tuşlanan mərmilərdən biri həyətyanı sahəyə düşüb. Xəsarət alan olmayıb. Digər dörd mərmi isə kəndin yaxınlığında əkin sahələrində partlayıb.
