Azərbaycanda rəsmi səfərdə olan Qətər Dövlətinin Əmiri Əlahəzrət Şeyx Təmim bin Həməd Al Taninin martın 8-də rəsmi qarşılanma mərasimi olub.
Hər iki ölkənin dövlət bayraqlarının dalğalandığı meydanda Qətər Dövlətinin Əmirinin şərəfinə fəxri qarovul dəstəsi düzülüb.Fəxri qarovul dəstəsinin rəisi Prezident İlham Əliyevə raport verib.
Azərbaycan Prezidenti İlham Əliyev Qətər Dövlətinin Əmiri Əlahəzrət Şeyx Təmim bin Həməd Al Tanini qarşılayıb.Fəxri qarovul dəstəsinin rəisi Qətər Dövlətinin Əmirinə raport verib.Qətər Dövlətinin və Azərbaycan Respublikasının dövlət himnləri səslənib.Prezident İlham Əliyev və Əmir Əlahəzrət Şeyx Təmim bin Həməd Al Tani fəxri qarovul dəstəsinin qarşısından keçiblər.Qətər Dövlətinin Əmiri Azərbaycan əsgərlərini salamlayıb.Azərbaycan Respublikasının dövlət və hökumət nümayəndələri Əmir Əlahəzrət Şeyx Təmim bin Həməd Al Taniyə, Qətər Dövlətinin nümayəndə heyətinin üzvləri Prezident İlham Əliyevə təqdim olunub.Fəxri qarovul dəstəsi hərbi marşın sədaları altında dövlət başçılarının qarşısından keçib.
Azərbaycan Prezidenti və Qətər Dövlətinin Əmiri rəsmi foto çəkdiriblər.
Azərbaycan Prezidenti ilə Qətər əmirinin təkbətək görüşü olub
Martın 8-də geniş tərkibdə görüş başa çatdıqdan sonra Azərbaycan Respublikasının Prezidenti İlham Əliyevin Qətər Dövlətinin Əmiri Şeyx Təmim bin Həməd Al Tani ilə təkbətək görüşü olub.
Görüşdə ölkələrimiz arasında siyasi əlaqələrin inkişafından məmnunluq ifadə edildi. İqtisadi əlaqələrin genişləndirilməsi üçün yaxşı potensialın olduğu vurğulandı. Bu səfərin münasibətlərimizin daha da möhkəmlənməsinə töhfə verəcəyi diqqətə çatdırılıb. Söhbət zamanı ikitərəfli və qarşılıqlı maraq doğuran məsələlər ətrafında fikir mübadiləsi aparıldı.
Azərbaycan və Qətər arasında 8 sənəd imzalanıb
Görüşün ardından Azərbaycan Respublikasının Prezidenti İlham Əliyevin və Qətər Dövlətinin Əmiri Şeyx Təmim bin Həməd Al Taninin iştirakı ilə Azərbaycan-Qətər sənədlərinin imzalanması mərasimi olub.
"Azərbaycan Respublikasının Dövlət Gömrük Komitəsi ilə Qətər Dövlətinin Baş Gömrük İdarəsi arasında kadrların peşəkar hazırlığı və ixtisasının artırılması sahəsində əməkdaşlıq haqqında Anlaşma Memorandumu”nu Azərbaycan Dövlət Gömrük Komitəsinin sədri Aydın Əliyev və Qətərin nəqliyyat naziri Cassem bin Saif Al Sulaiti imzalayıb.
"Azərbaycan Respublikasının Nəqliyyat Nazirliyi ilə Qətər Dövlətinin Nəqliyyat və Rabitə Nazirliyi arasında nəqliyyat sahəsində əməkdaşlıq haqqında Anlaşma Memorandumu”nu Azərbaycanın nəqliyyat naziri Ziya Məmmədov və Qətərin nəqliyyat naziri Cassem bin Saif Al Sulaiti imzalayıb.
"Azərbaycan Respublikasının Maliyyə Nazirliyi ilə Qətər Dövlətinin Maliyyə Nazirliyi arasında büdcə və maliyyə məsələləri sahəsində əməkdaşlıq haqqında Anlaşma Memorandumu”nu Azərbaycanın maliyyə naziri Samir Şərifov və Qətərin maliyyə naziri Əli Şərif Al Emadi imzalayıb.
"Azərbaycan Respublikası Hökuməti ilə Qətər Dövləti Hökuməti arasında kənd təsərrüfatı sahəsində əməkdaşlıq haqqında Anlaşma Memorandumu”nu Azərbaycanın kənd təsərrüfatı naziri Heydər Əsədov və Qətərin maliyyə naziri Əli Şərif Al Emadi imzalayıb.
"Azərbaycan Respublikası Hökuməti ilə Qətər Dövləti Hökuməti arasında təhsil, ali təhsil və elmi tədqiqat sahəsində əməkdaşlıq haqqında Anlaşma Memorandumu”nu Azərbaycanın təhsil naziri Mikayıl Cabbarov və Qətərin mədəniyyət və idman naziri Salah bin Qanem Al Əli imzalayıb.
"Azərbaycan Respublikasının Ədliyyə Nazirliyi ilə Qətər Dövlətinin Ədliyyə Nazirliyi arasında hüquq sahəsində əməkdaşlıq haqqında Saziş”i Azərbaycanın xarici işlər naziri Elmar Məmmədyarov və Qətərin xarici işlər naziri Şeyx Məhəmməd bin Əbdülrəhman Al Tani imzalayıb.
"Azərbaycan Respublikası Hökuməti və Qətər Dövləti Hökuməti arasında onların diplomatik və xüsusi pasportlara malik müvafiq vətəndaşları üçün viza tələblərinin ləğv edilməsi haqqında Sazişə dəyişikliklər edilməsi barədə Protokol”u Azərbaycanın xarici işlər naziri Elmar Məmmədyarov və Qətərin xarici işlər naziri Şeyx Məhəmməd bin Əbdülrəhman Al Tani imzalayıb.
"Azərbaycan Respublikası Hökuməti ilə Qətər Dövləti Hökuməti arasında Birgə İqtisadi, Ticarət və Texniki Komissiyanın yaradılması haqqında Saziş”i Azərbaycanın xarici işlər naziri Elmar Məmmədyarov və Qətərin xarici işlər naziri Şeyx Məhəmməd bin Əbdülrəhman Al Tani imzalayıb.
İlham Əliyevin adından Qətər Əmirinin şərəfinə rəsmi ziyafət verilib
Daha sonra Azərbaycan Respublikasının Prezidenti İlham Əliyevin adından Qətər Dövlətinin Əmiri Şeyx Təmim bin Həməd Al Taninin şərəfinə rəsmi ziyafət verilib.
Baki-xeber.com
