Macarıstanın Baş naziri Viktor Orbanın ölkəmizə rəsmi səfəri çərçivəsində Azərbaycanın birinci xanımı Mehriban Əliyevanın "Macarıstanın Xidmətlərə görə Komandor Xaçı” ordeni ilə təltif olunması mərasimi keçirilib. Baki-xeber.com-un Prezidentin rəsmi İnternet səhifəsinə istinadən xəbərinə görə, Macarıstanın Baş naziri Viktor Orban ölkəsinin ali ordenini Prezidentin xanımına deyil, məhz ən tanınan Azərbaycan xanımına təqdim etdiyini bildirib.
"Mənə elə gəlir ki, ümumiyyətlə, Azərbaycan və macar xanımları arasında oxşarlıqlar çoxdur. Adət-ənənələrimizdən irəli gələrək bizim cəmiyyətimizdə qadınlar mühüm mövqelər tutur. Onlar nəinki evdə xanım rolunu oynayır, həmçinin ictimai xadim kimi mühüm fəaliyyət göstərirlər” – deyən Macarıstan baş naziri Mehriban Əliyevanın apardığı fəaliyyətin bütün dünyada tanındığını bildirib. Qeyd edib ki, təmənnasız yardım göstərdiyinə görə Macarıstandakı uşaq evində yaşayan uşaqlar bu gün Mehriban xanım Əliyevaya böyük sevgi və məhəbbətlə yanaşırlar.
"Hörmətli birinci xanım, Sizin həyata keçirdiyiniz bu xeyriyyəçilik fəaliyyəti, Sizin göstərdiyiniz bu yaradıcı səylər nəinki həmin uşaqlara yardımçı olur, o cümlədən ölkələrimiz arasında təşəkkül tapmış münasibətlərin inkişafına töhfə verir. Burada söhbət sırf uşaqlara yardımdan getmir. Bu, həmçinin onu göstərir ki, müsəlman ölkəsinin Fondu xristian ölkəsinin uşaqlarına yardım edir. İki mədəniyyət və dinlər arasında belə bir halda çox gözəl, ahəngdar bir ittifaq yaranır. Bugünkü dünyada artıq dini münaqişələr haqqında çox danışılır. Məhz belə bir şəraitdə bu cür fəaliyyətin göstərilməsi, səylər xüsusi diqqətə layiqdir” – deyən Orban Macarıstanın ali ordenini Mehriban Əliyevaya təqdim edib.
Mehriban Əliyeva onu Macarıstan dövlətinin yüksək mükafatı ilə təltif etdiyinə görə qonağa dərin təşəkkürünü bildirib. Fəaliyyətinin dost ölkədə - Macarıstanda belə yüksək qiymətləndirilməsində qürur duyduğunu qonağın diqqətinə çatdırıb.
"Mən çox xoşbəxtəm ki, rəhbərlik etdiyim Heydər Əliyev Fondu ölkələrimiz arasında mövcud olan dostluq münasibətlərinə öz töhfəsini verir. Fond təhsil, sosial, səhiyyə sahələrində layihələr həyata keçirir. Humanitar sahədə həyata keçirilən layihələr, əminəm ki, insanları, xalqları bir-birinə daha dərindən tanıdır və daha yaxşı anladır” –deyən birinci xanım qeyd edib ki, bu gün ona verilən mükafatı, eyni zamanda, bu əməkdaşlığa verilən yüksək qiymət kimi qəbul edir. Mehriban Əliyeva bu əməkdaşlığın gələcəkdə də davam edəcəyini bildirib.
Sonda xatirə şəkli çəkdirilib.
