Azərbaycanın da arsenalında Rusiya hərbi texnikasına böyük maraq...

Tarix: 05.03.2016 / 02:43
Bölmə: Gündəm

Şimal qonşumuzun Suriyada həyata keçirdiyi hərbi əməliyyatlarda nümayiş etdirdiyi hərbi texnika Rusiyadan silah alan ölkələrin sayının artmasına səbəb olub. İndi Yaxın Şərqin bir çox ölkələri məhz Rusiyadan hərbi texnika alışına başlayıb. Yaxın Şərqdə hərbi qüdrətini artıran Rusiya əməliyyatlar zamanı ən müasir silahlarından istifadə edir. Rusiya Hava Kosmik Qüvvələrinin Su-34 təyyarələri Suriyada aparılan əməliyyatlarda aktiv iştirak edir.

Bir səfərə 4 min kilometr məsafə qət edə bilən Su-34 saatda 1600 kilometr sürətlə uçur. Moskva 2016-cı ilin əvvəlindən etibarən yeni nəsil Su-35S-lərini də Suriyaya göndərib. Rusiyanın İŞİD əməliyyatlarında istifadə etdiyi silahlardan biri də Xəzər donanmasının tərkibindəki uzaq mənzilli Kalibr-NK raketləridir. Bu raketlər quruda 2600 kilometr uzaqlıqdakı hədəfləri vura bilir. Hər cür hücum əməliyyatı üçün olduqca rahat olan BTR-82A1 zirehli nəqliyyat vasitəsi rəqəmsal sistemə malikdir. Bu səbəbdən digər belə texnikalara dünya ölkələrinin marağı artır. Belə vəziyyət isə ABŞ-da ciddi narahatlıqla qarşılanır və onlar ənənəvi silah satışı bazarlarını itirə biləcəklərindən ehtiyat edirlər. ABŞ-ın Avropa üzrə Hərbi Hava Qüvvələri komandanı Frank Qorenc bildirir ki, Rusiyanı bir nömrəli təhlükə olaraq görür və rəsmi Moskvanın ABŞ müttəfiqləri ilə əməkdaşlıq etməsi mümkündür. O, Rusiyanın yeni növ silahları təkmilləşdirdiyini bildirib: "NATO ilə yaşanan çəkişmədən dolayı rəsmi Moskva hərbi sahəyə daha çox diqqət ayırmağa başlayıb". Qorenc onu da vurğulayıb ki, ABŞ potensial silah ixracatçılarını Rusiyaya uduzur: "ABŞ-da silah istehsalı üçün lazım olan icazəni almaq çox çətindir. ABŞ-ın müttəfiqləri Rusiyanın hərbi texnologiyasından istifadə edərsə, ortaq əməliyyat həyata keçirmək çox çətin olacaq. Birlikdə çalışa bilmək üçün texnologiya və prosedurları yenidən nəzərdən keçirməliyik".

Amerika Müdafiə Nazirliyinin kəşfiyyat idarəsinin başçısı, general Vinsent Stüart isə bildirib ki, İran da silahı Rusiyadan alacaq. Onun sözlərinə görə, Rusiya Suriyadakı hərbi əməliyyatlarla Yaxın Şərqdəki və bütün dünyadakı müştərilərinə özünün müasir hərbi texnikasını nümayiş etdirir: "Bu da o deməkdir ki, İran hansısa sistemləri Rusiyadan alacaq. Bununla da İran öz hərbi qüvvələrini modernləşdirməyə çalışacaq".

Stüart bildirib ki, Rusiya Avropanı qorxutmaq məqsədilə qəfil hərbi təlimlərdən istifadə edir: "Bu yaxınlarda qəfildən həyata keçirilən təlimlər həqiqi və təhlükəli idi. Mən təxminən iyirmi il ərzində çətinlik səviyyəsi bu qədər yüksək olan təlimlər görməmişdim".

ABŞ-ın "National Interest" nəşri isə qeyd edir ki, Rusiya ordusu müasir döyüş gücünə çevrilib: "Ekspertlər uzun vaxt bildirirdilər ki, Rusiya müdafiə sənayesinin müasirləşdirilməsi və ordunun yenidən strukturlaşdırılması üzrə proqram kağız üzərində qalacaq. Ekspertlər ciddi səylə proqramdakı çatışmazlıqları axtarırdılar. Rusiya silahlı qüvvələrinin bugünkü müvəffəqiyyətləri göstərdi ki, analitiklər öz proqnozlarında bağışlanmaz səhv etdilər. Rusiyanın Suriyada fəallığı NATO-nu Rusiyanın döyüş potensialını qiymətləndirməyə məcbur edib. Hazırda Rusiyanın silahlı qüvvələri müasir döyüş əməliyyatlarını aparmağa qadirdir. Rusiya hərbi dəniz donanmasının gücü və şimal donanmasının tərkibindəki sualtı güclər 1991-ci ildən sonra ən yüksək səviyyəyə çatıb". Nəşr qeyd edir ki, Rusiyanın silahlı qüvvələri döyüş imkanlarını əhəmiyyətli dərəcədə yüksəltdiyi bir vaxtda NATO ölkələrinin əksəriyyəti hərbi büdcəsi və ordusunun sayını azaldıb. Qeyd olunur ki, "Suxoy" reaktivlərinin yeni nəsil versiyası olan beşinci nəsil "T-50 PAK FA"nın konstruktor işlərinin tamamlanmasına qədər Rusiya altıncı, hətta yeddinci nəsil qırıcıları hazırlamağa başlayıb. "Suxoy" şirkətinin təcrübi konstruktor bürosu artıq Rusiya hökumətinə altıncı nəsil qırıcısının ilkin konsepsiyasını təqdim edib. Eyni zamanda, Rusiya aviasiya sənayesinin konstruktorlarının əsas diqqəti "T-50 PAK FA"nın sınaqlarına yönəlib. ABŞ Müdafiə Nazirliyi kimi, Rusiya hərbçiləri də qarşıdakı onillikləri düşünərək planlarını qurur. Rusiya da ABŞ kimi beşinci nəsil qırıcıların pilotlu və pilotsuz variantların yaradılması imkanlarını araşdırır. Bu barədə Rusiyanın Hava-Kosmik Güclərinin baş komandanı Viktor Bondarev bildirib: "Biz indi dayanacağıqsa, artıq həmişəlik dayanacağıq. Buna görə də altıncı və yeddinci nəsil qırıcılarla bağlı işlər gedir".

Qeyd edilir ki, Moskva ordunun yenidən silahlandırılması üzrə bahalı proqramlar reallaşdırmaq niyyətindədir. Yeni hərbi layihələr gözəgörünməz bombardmançı təyyarələr, tanklar, sualtı gəmilər və bir neçə yeni təyyarə ilə bağlıdır. Bütün bunlar həm də Rusiya hərbi texnikasına dünyada marağı artırır.

Məhz bu da ABŞ-ı ciddi şəkildə narahat edir. Belə görünür ki, Moskva müxtəlif bölgələrdə hərbi əməliyyatı davam etdirməklə Rusiya texnikasına daha böyük marağın yaranmasına səbəb olacaq. Xatırladaq ki, Azərbaycan da Rusiyanın hərbi texnikasının əsas alıcılarından biridir. Ölkəmiz bundan sonra da Rusiyadan müasir hərbi texnika alışını davam etdirmək niyyətindədir.