Azərbaycanda maliyyə bazarının sabitliyinin tənzimlənməsi üçün yeni komitənin yaradılması nəzərdə tutulur. Trend-in məlumatına görə, bunu Milli Məclisin bu gün keçirilən plenar iclasında Maliyyə Bazarlarına Nəzarət Palatasının yaradılması üzrə işçi qrupunun rəhbəri Rüfət Aslanlı deyib.
R.Aslanlı qeyd edib ki, bu barədə memorandum imzalanması nəzərdə tutulur: "Bununla bağlı Mərkəzi Bank, Maliyyə Nazirliyi və Maliyyə Bazarlarına Nəzarət Palatası arasında memorandumun imzalanması nəzərdə tutulur və bu sənəd də imzalanmaq üçün razılaşdırılıb”.
R.Aslanlı bildirib ki, yeni qurumun Maliyyə Sabitliyi Komitəsi adlandırılması nəzərdə tutulur.
Onun sözlərinə görə, adıçəkilən komitəni maliyyə sahəsində sabitliyi və dayanıqlığı təmin etmək, likvidlik məsələlərini həll etmək üçün yaratmaq lazımdır. Bu, üç əsas elementdən ibarət yeni mexanizmin bəndlərindən biridir.
İşçi qrupunun rəhbəri əlavə edib ki, bu elementlərə sistem yaradan bankların sağlamlaşdırılması, sistemdə rolundan asılı olmayaraq banklarda likvidlik probleminin həlli və nəhayət, risklərin ümumi portfelinin tənzimlənməsi aiddir.
Kazinoların yaradılması təklif edilir
Qüdrət Həsənquliyev isə Azərbaycanın turizm regionlarında xarici ölkələrdən turistlər cəlb etmək üçün kazinoların yaradılmasını təklif edib. Deputat qeyd edib ki, bir sıra ölkələr bu təcrübədən istifadə edir və kazinolar vasitəsilə turistlər ölkəyə cəlb edilir.
Q.Həsənquliyev deyib: "Azərbaycana həm turistlərin gəlməsi, həm də xarici valyutanın cəlb edilməsi üçün ölkənin turizm regionlarında kazinolar yaradıla bilər".
Millət vəkillərinin etirazları nəzərə alındı
Bu arada Milli Məclisin bəzi deputatlarının mərc oyunlarına nəzarəti Gənclər və İdman Nazirliyindən alınaraq Maliyyə Bazarlarına Nəzarət Palatasına verilməsi ilə bağlı etirazı nəzərə alınıb.
Ötən gün Milli Məclisin Gənclər və idman komitəsinin iclasında "Bədən tərbiyəsi və idman haqqında" qanuna dəyişikliklər edilməsi barədə qanun layihəsinin müzakirəsi aparılıb.
"Qanuna təklif olunurdu ki, 53-1.5-ci maddədəki "dövlət nəzarəti müvafiq icra hakimiyyəti orqanı" sözləri "nəzarət maliyyə bazarlarına nəzarət orqanı" sözləri ilə əvəzlənsin.
Bu gün Milli Məclisin keçirilən plenar iclasında parlamentin Gənclər və idman komitəsinin sədri Fuad Muradov bildirib ki, millət vəkillərinin etirazları nəzərə alınaraq parlament rəhbərliyinə müraciət olunub: "Parlamnet rəhbərliyi də qanunvericilik təşəbbüsü subyektinə müraciət edib və məsələ əvvəlki qaydada qalıb. Yəni, oyunlardan əldə olunan gəlirlərin böyük hissəsinə nəzarət nazirliyin, az qismi isə Maliyyə Bazarlarına Nəzarət Palatasının nəzarətinə verilib".
Sosial mənzillər…
Tikinti və infrastruktur obyektləri ilə əlaqədar investisiya layihələrinin xüsusi maliyyələşmə əsasında həyata keçirilməsi haqqında" qanun layihəsi də müzakirəyə çıxarılıb. Müzakirə zamanı Fuad Muradov bildirib ki, islahatların həyata keçirilməsi üçün qanunvericilik bazasının təkmilləşdirilməsi əsas istiqamətlərdən biridir.
Deputat qeyd edib ki, dünyada bu model 1979-cu ildən həyata keçirilir və orada müxtəlif yanaşmalar var: "Bu qanunun mahiyyəti və özəlliyi ondan ibarətdir ki, layihə özəl şirkətlər, ictimai şirkətlər və dövlət qurumlarının birgə əməkdaşlığı çərçivəsində həyata keçirilir. Bu baxımdan çox istərdim ki, bununla bağlı işçi qrupu yaransın.
Qanuna yalnız maddələr yazmaqla onun işləməsində problemlə üzləşə bilərik. Bu işdə maraqlı müvafiq qurumlar mütləq şəkildə işçi qrupunda olmalıdır ki, gələcəkdə müəyyən məsələlər və problemlərlə üzləşməyək”.
Komitə sədri qanun layihəsində dövlət ehtiyacı üçün geri alınma məsələsinə diqqət çəkib: "Hansı sahibkar 40-50 illik bir investisiya qoyacaq ki, sabah müvafiq icra qurumlarının qərarında oranın dövlət ehtiyacı olan yer olduğu bildirilək. Burada bir az sahibklara inam şəraiti yaratmaq lazımdır ki, 50 illik investisiya qoyulsun. Qanunda müəyyən güzəştlər göstərilib, lakin inam da əhəmiyyətlidir. Eyni zamanda qanunun tətbiq dairələri sadalanır, belə olan biz onu məhdudlaşdırıq”.
F.Muradov qeyd edib ki, son zamanlar səsləndirilən Gənclər şəhərciyi, ekonom evlər, sosial mənzillər Azərbaycan üçün çox vacibdir: "Kifayət qədər evə ehtiyacı olan isanlar var. Yaxşı olardı ki, burada bu yanaşma da olsun. Biz bir neçə il bundan öncə Gənclər şəhərciyi ilə bağlı məsələni müzakirə edəndə praktiki olaraq buna investorlar tapa bilmirdik. Yəni özəl sektordan Gənclər şəhərciyi tikilməsi ilə bağlı maraq yox idi. Bu qanun bizə imkan verəcək. Dövlət tərəfindən müəyyən güzəştlər, həm torpağın ayrılması, müvafiq strukturlardan icazənin alınmaı və s. qanunda qeyd olunmalıdır ki, investor binanı tikməyə maraqlı olsun. Bütün dünyada maliyyə böhranı var. Əgər qanun layihəsi cəlbedici olmazsa heç vaxt sahibkar bir qəpik də pul qoymayacaq. Ona görə təlklif edirəm ki, qanunla bağlı işçi qrupu yaradılsın. Biz də detalla bu məsləyə yanaşaq”.
"Dövlət satınalmaları haqqında" qanuna dəyişikliklər qəbul edildi
Milli Məclis iclasında "Dövlət satınalmaları haqqında" qanuna dəyişiklikləri qəbul edib. İclasda çıxış edən Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə bildirib ki, bu dəyişikliklər ölkədə sahibkarlığın inkişafına xidmət edir və aqrar sektorun səmərəliliyinin artırılması üçün etibarlı baza yaradır.
