Türkiyə Prezidenti Rəcəb Tayyib Ərdoğan Xocalı soyqırımının 24-cü ildönümü münasibətilə Azərbaycan xalqına başsağlığı verib.
Bu barədə Trend "TRT Haber" telekanalına istinadən məlumat verir.
Dövlət başçısı qeyd edib: "Xocalı şəhidlərini rəhmətlə anırıq, Azərbaycan xalqına səbr diləyirik”.
Qəddar hücum və qətliamı hər zaman qəlbimizin ən dərinliklərində hiss edir və bu acını paylaşırıq
"Türkiyə olaraq azərbaycanlı qardaşlarımızın 24 il bundan əvvəl Xocalıda qarşı-qarşıya qaldıqları qəddar hücum və qətliamı hər zaman qəlbimizin ən dərinliklərində hiss edir və bu acını paylaşırıq”. APA-nın xəbərinə görə, bu barədə Türkiyə Xarici İşlər Nazirliyinin Xocalı soyqırımının 24-cü ildönümü ilə bağlı yaydığı bəyanatda deyilir.
Bəyanatda bildirilir ki, Türkiyə Ermənistan Respublikası hərbi birləşmələri tərəfindən həyata keçirilən bu qətliamı və Azərbaycan torpaqlarının illərdir davam edən işğalını şiddətlə qınayır: "Beynəlxalq ictimaiyyətdə layiq olduğu diqqəti almayan bu faciədə həyatını itirənlərə Allahdan rəhbət diləyir, bütün Azərbaycan qardaşlarımıza ən səmimi başsağlığımızı çatdırırıq”.
Sənəddə qeyd olunur ki, mülki əhaliyə qarşı insanlığa zidd hücumlar və Azərbaycan torpaqlarının 20 faizinin işğalı nəticəsində 1 milyona yaxın insan yurdlarını tərk etmək məcburiyyətində qalıb və o tarixdən bu yana qaçqın həyatı yaşamağa məhkum edilib.
Türkiyə Xocalı soyqırımını şiddətlə pisləyir
Türkiyədə hakim Ədalət və İnkişaf partiyasının (AKP) Qadın qolları rəhbəri Lütfiyə Selva Çam 24 il bundan əvvəl Xocalıda yaşanan soyqırımı şiddətlə qınadıqlarını bildirib. Bu barədə Trend Türkiyənin TRT Haber telekanalına istinadən məlumat verir.
aL.S.Çam qeyd edib ki, 24 il bundan əvvəl Xocalıda insanlıq əleyhinə törədilən cinayətlərə bəşəriyyət səssiz qalmamalıdır: "Azərbaycanlı qardaşlarımıza başsağlığı, soyqırımda həyatını itirənlərə Allahdan rəhmət diləyirik”.
Xocalıda yaşanan acı ürəklərimizdədir
Türkiyənin Azərbaycandakı səfirliyi Xocalı soyqırımının 24 illiyi ilə bağlı ilə Azərbaycan xalqına başsağlığı ünvanlayıb.
Səfirliyin başsağlığında, Xocalıda yaşanan faciənin üzərindən 24 il keçməsinə baxmayaraq, acının hələ də ürəklərdə yaşadığı qeyd olunur: "Xocalı faciəsinin üzərindən 24 il keçir, Xocalıda yaşanan acı ürəklərimizdədir. Xocalı şəhidlərini rəhmətlə yad edirik".
Türkiyə hər zamankı kimi Azərbaycanın yanındadır
Türkiyə hər zamankı kimi Azərbaycanın yanındadır və 24 il bundan əvvəl Xocalıda insanlıq əleyhinə törədilmiş cinayəti şiddətlə qınayır. Bunu isə Türkiyə Prezidenti Administrasiyasının mətbuat katibi İbrahim Kalın deyib.
İ.Kalın qeyd edib ki, Türkiyə Xocalıda şəhid olanları rəhmətlə anır və Azərbaycan xalqına başsağlığı verir: "Eyni zamanda, Türkiyə olaraq ATƏT-in Minsk qrupunun Dağlıq Qarabağ probleminin həlli üçün diplomatik səylərini artırmasını istəyirik”.
Xocalı insanlığın utanc tarixidir
Türkiyə Böyük Millət Məclisinin (TBMM) sədri İsmayıl Kahraman Xocalı soyqırımının insanlığın utanc tarixi olduğunu bildirib. Bu barədə Trend "Anadolu" agentliyinə istinadən məlumat verir.
O, qeyd edib: "Təəssüflər olsun ki, bu gün bəzi qüvvələr Xocalı faciəsini unutdurmağa cəhdlər göstərir. Dünyanın şahidlik etdiyi faciəni törədənlərin adları bir çox hallarda yada salınmır, bu isə düşünüləsi məqamlardan birdir”.
İ.Kahraman deyib ki, Türkiyə Xocalıda şəhid olanları rəhmətlə anır və Azərbaycan xalqına başsağlığı verir.
