Azərbaycanda bəzi ali məktəblərdə ixtisasların tədris müddəti azaldıla bilər. Bunu Elm və təhsil naziri Emin Əmrullayev bir neçə gün öncə keçirdiyi brifinqdə deyib.
O qeyd edib ki, ali məktəblərdə bəzi ixtisasların tədris müddətinin 4 ildən 3 ilə salınması ilə bağlı məsələ pilot layihə çərçivəsində növbəti illərdə həyata keçiriləcək. Onun sözlərinə görə, bu, təhsilalanların sayının artırılmasına da səbəb olacaq: "Hesab edirəm ki, bu, faydalı olacaq. Bu dəyişikliyin informasiya texnologiyaları və turizm sahəsində edilməsi nəzərdə tutulur".
Ekspertlər hesab edir ki, bəzi ixtisasların təhsil müddəti azaldılacaqsa onların ali təhsil ixtisaslarının sırasında saxlanılması düzgün deyil. Onların fikrincə, turizm, informasiya texnologiyaları və bəzi ixtisasların 4-5 il deyil, 2-3 il tədris olunması daha münasibdir.
Maraqlıdır, bəzi ixtisaslar təhsil müddətinin azaldılması ilə bərabər ali təhsil ixtisasından çıxarıla bilərmi?
“Kitabxanaçılıq, turizm, informasiya texnologiyaları ixtisaslar üzrə təhsil müddətinin uzadılması keyfiyyət amilini artırmır, əksinə…”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, universitetlər tələbələri bazarın tələblərinə uyğun biliklə təmin edə bilmirsə, o zaman universitet təhsili vaxt və pul israfıdır. Çünki insanlar universitet təhsili almaq üçün illərlə çalışırlar və ciddi maddi resurs istifadə edirlər: “Universitet təhsili o ixtisaslar üzrə vacibdir ki, orada tələbənin ciddi nəzəri biliklərə yiyələnməsi zəruri olsun. Bu nəzəri biliklərin universitetdən kənar əldə edilməsi qeyri-mümkün və ya olduqca çətin olmalıdır. Məsələn, kitabxanaçılıq ixtisası var, halbuki kitabxanaçılıqda ən yaxşı halda minimal nəzəri biliyə yiyələnmək kifayətdir. Kitabxanaçı olmaq üçün texnikum oxumaq kifayət etməlidir. Məlumdur ki, əmək bazarında təklif edilən bir çox işlər üçün ali təhsil tələb edilir. Azərbaycan universitetlərində tədris edilən ixtisasların, həm də əmək bazarında tələb olan ixtisasların ciddi bir hissəsi üçün ali təhsil şərt deyil və ya şərt olmamalıdır. Çünki həmin ixtisaslar üçün ən yaxşı halda minimal nəzəri bilik tələb edilir. Belə olan halda, həmin ixtisasların texnikum və peşə məktəblərində tədris edilməsi daha çox şəxsin məktəbi bitirdikdən sonra təhsilinə davam etməsinə, beləliklə, əmək bazarında ixtisaslı işçi qüvvəsinin artmasına səbəb ola bilər. Texnikum və peşə məktəblərində daha çox insanın təhsil alması və bu təhsil müəssisələrinin reputasiyasının yaxşılaşması təbii ki, işəgötürənlərin də yerli-yersiz bütün iş elanlarına ali təhsil tələbi yerləşdirməsini aradan qaldıra bilər”.
Ekspert hesab edir ki, kitabxanaçılıq, turizm, informasiya texnologiyaları ixtisaslarını universitetdən texnikuma köçürtmək olar. Belə olan təqdirdə, bu kimi ixtisaslar həm daha çox insan üçün maddi səbəblərə görə əlçatan olacaq, həm də universitet öz resurslarını ciddi nəzəri bilik tələb edən ixtisaslara yönəldə biləcək: “Belə olarsa, bu hal həm də texnikum və peşə məktəblərinə marağın artmasına səbəb olacaq. Kitabxanaçılıq, turizm, informasiya texnologiyaları ixtisasları üzrə təhsil müddətinin uzadılması keyfiyyət amilini artırmır, əksinə, bəzi hallarda bu ixtisasa yiyələnəcək tələbələrin lazımsız fənlərlə yüklənməsinə, beləliklə də əmək bazarına bir il gec daxil olmasına səbəb olur”.
Günel CƏLİLOVA
