Orta ümumtəhsil məktəblərinin bir çoxunda direktor təyinatlarının reallaşmaması ictimai müzakirələrə səbəb olub. Bununla bağlı bir çox mülahizələr irəli sürülür. Bu mövzu Milli Məclisdə də müzakirə edilib. Qeyd edilib ki, ölkədə 4440-dan çox orta məktəb olsa da, onların 900-ə yaxınına direktor təyin olunmayıb.
Danılmaz faktdır ki, direktorun olmadığı orta məktəblərdə təhsil və təlim-tərbiyənin keyfiyyəti aşağı olur. Maraqlıdır, müəllimlər niyə rəhbər olmaq istəmir?
Nizami Hüseynov: “Yalnız imtahanda müsbət nəticə əldə edən adam insanlara, kollektivə rəhbərlik edə bilməz, bunun üçün…”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, məktəb direktorları son illərdə imtahanla seçilir: “Diaqnostik qiymətləndirmədən keçən müəllimləri direktor qoyurlar. Yalnız imtahanda müsbət nəticə əldə edən adam insanlara, kollektivə rəhbərlik edə bilməz. Bunun üçün böyük təcrübə lazımdır. Təkcə savad kifayət etmir. Tutaq ki, bir cavan adam gəldi və test suallarına əla cavab verdi oldu direktor. Bu yanaşma doğru deyil. Əvvəllər məktəblərdə rüşvət, korrupsiya halları vardısa, son illər bunu yığışdırıblar. Bununla paralel direktorluq kimi məsul vəzifəni daşıyacaq adamın əməkhaqqı artırılmalıdır. Ona elə bir əməkhaqqı vermək lazımdır ki, gözü başqa yerdə olmasın. Hesab edirəm ki, son dövrlər məktəblərdə olan direktor çatışmazlığı bu amillə əlaqəlidir. Əməkhaqqı normal olsa, korrupsiyadan uzaq olan adamların direktor işləmək həvəsi daha da artar. Qısası, müəllimlər əməkhaqqı az, məsuliyyəti çox olan yerdə işləmək istəmir. Çıxış yolu var. Sınaq müddəti qoyulmalıdır. Imtahanı verəndən sonra şəxs bir müddət direktor vəzifəsinin icrasını həyata keçirə bilərsə, onun işinə davam demək olar. Ali məktəblərdə olan təcrübəli müəllimlərin təcrübəsindən istifadə etmək olar. Yalnız cavan kadrlara önəm vermək lazım deyil. Ola bilər ki, yaşlı kadrdı, amma bu işə cavandan çox yarayır. Çalışmaq lazımdır ki, idarəetmə mexanizmi tam təkmilləşsin. Vəzifələrə təyinat yalnız yaş amilinə görə deyil, həm də şəxsi göstəricilərə, təcrübəyə görə olsun. Belə vəzifələrdə işləmək üçün stimullaşdırıcı tədbirlər olmalıdır”.
Elçin Əfəndi: “Direktorun olmadığı orta məktəblərdə təhsil və təlim-tərbiyənin keyfiyyəti aşağı olur”
Təhsil eksperti Elçin Əfəndi isə məsələnin müxtəlif səbəblərdən qaynaqlandığını deyir: “Bir sıra amillər müəllimləri direktor vəzifəsini tutmaqdan çəkindirir. Başlıca səbəb odur ki, bəzi direktorlar şəffaf rejimdə işləməyə üstünlük verdiyi halda, yerli icra hakimiyyətləri, bəzi dairələr və şəxslər tərəfindən müəyyən tələblərin qoyulması, maneələrin yaradılması onları bu işdən çəkindirir. Yerli icra hakimiyyətlərinin təhsil prosesinə müdaxilələrinə son verilməli, onlar bu prosesdən kənar saxlanmalıdır. Yaranmış duruma məktəb direktorlarının işə qəbulu üçün keçirilən imtahanlarla bağlı müraciət edənlərin saylarının az olması da öz təsirini göstərir. Ona görə də bir sıra məktəblərə direktor təyinatı həyata keçirilə bilmir. Bu səbəbdəndir ki, həmin məktəblərdə direktor vəzifəsini direktor müavinləri həyata keçirir. Bu problemin həll olunması üçün direktorların əmək haqqı məsələsinə də baxılmalı, onların maaşı artırılmalı, əlavə imtiyazlar verilməlidir. Təhsil sferasında, direktorların işə qəbulunda gender bərabərliyinin pozulması da prosesə öz təsirini göstərir. Direktor seçimində daha çox xanım müəllimlərə üstünlük verilir”.
Ekspert onu da əlavə etdi ki, direktorun olmadığı orta məktəblərdə təhsil və təlim-tərbiyənin keyfiyyəti aşağı olur: “Orta məktəblərdə direktorun olması vacibdir. Çünki onun xüsusi öhdəlikləri var. Həmin öhdəliklərin həyata keçirilməsi, şəxsi heyətə diqqətin artırılması, eyni zamanda infrastrukturun tam yerində olması, tədrisin keyfiyyəti kimi məsələlər direktorun öhdəliyinə aid olan məsələlərdir”.
Günel CƏLİLOVA
