Elm və Təhsil Nazirliyi bir müddət əvvəl 5800 tərbiyəçi-müəllimin məktəbəqədər təhsil sahəsi üzrə müvafiq ali və ya orta ixtisas təhsilinin olmadığı barədə məlumat yayıb.
Bildirilir ki, məktəbəqədər təhsil müəssisələri Elm və Təhsil Nazirliyinin tabeliyinə verildikdən sonra monitorinq aparılıb və 11. 300 nəfər tərbiyəçi-müəllimdən 51%-nin (5800 nəfər) müvafiq ali və orta təhsilinin olmadığı məlum olub.
“Məktəbəqədər təhsil haqqında” Qanunun 1-ci maddəsinin 1.0.21-ci bəndində qeyd olunur ki, tərbiyəçi-müəllimlər məktəbəqədər təhsil sahəsi üzrə ali və ya orta ixtisas təhsilli olmalıdırlar.
Maraqlıdır, müvafiq təhsili olmayan 5800 nəfər şəxs məktəbəqədər təhsil müəssisələrinə necə ayaq açıb və onların taleyi necə olacaq?
“…bağçada işləyirsə, özünün təhsili yoxdursa, uşaqlara hansı təhsili ötürə biləcək?”
Təhsil eksperti İlqar Orucov “Bakı-Xəbər”ə açıqlamasında qeyd etdi ki, uzun illər məktəbəqədər təhsil müəssisələrinin icra hakimiyyətlərinin tərkibində fəaliyyət göstərməsi belə bir vəziyyət yaradıb: “Təhsilə heç bir aidiyyəti olmayan insanlar işə qəbul olunublar. Elə insan var ki, 25-30 ilini bu sahədə işləməyə həsr edib, onların işdən uzaqlaşdırılması da müşkülə çevrilib. Amma hesab edirəm ki, təhsilimiz naminə bəlli sayda kontingenti işdən uzaqlaşdırmağa məcburuq. Yoxsa təhsilimizi neqativlərdən qoruya bilmərik. Müvafiq sahə üzrə təhsil almayan minlərlə insan hansısa neqativ yollarla, tapşırıq və rüşvətlə həmin bağçalarda fəaliyyət göstərir. Bəlli sayda insanın narazı qalmasını deyil, keyfiyyətli təhsil mühitinin yaranmasını əsas götürməliyik. Bizə məktəbəqədər təhsil daha vacibdir, nəinki həmin şəxslərin işsiz qalmaları.
Nəzərə almaq lazımdır ki, məktəbəqədər təhsil təhsilin ilk pilləsi, baza və bünövrədir. Təsəvvür edin, təhsili olmayan şəxs bağçada işləyirsə, özünün təhsili yoxdursa, uşaqlara hansı təhsili ötürə biləcək? Ola bilər, həmin şəxslər bu müddət ərzində hansısa təcrübə qazanıblar. Amma yenə də bu, keyfiyyətli təhsil vəd edən durum deyil. Məlumdur ki, uşaq bağçaları ilə bağlı indiyə qədər çox neqativ hallar ortaya çıxıb. Bağçaya verilən ərzağın mənimsənilməsindən tutmuş, təhsil müəssisəsinə ayrılan ərazinin satılmasına, uşaqlara şiddətə qədər bir çox faktlarla rastlaşmışıq. Ona görə də fürsət var ikən bu mühit mütləq sağlamlaşdırılmalıdır. Bağçalara işə qəbul qaydalarını sərtləşdirmək, nəzarəti gücləndirmək vacibdir”.
Günel CƏLİLOVA
