Vəfa Heydərova: "Dünyada sülhün tərəfdarları çox olduğu üçün platformaya dəstək də artır"
Polşa-Azərbaycan Əməkdaşlıq Assosiasiyasının rəhbəri David Sesuda Ermənistan-Azərbaycan Sülh Platformasına qoşulub. Sesudanın bununla bağlı yaydığı bəyanatda deyilir:
"Ermənistan-Azərbaycan, Dağlıq Qarabağ münaqişəsinin sülh yolu ilə həllinin vacibliyini qəbul edərək, Azərbaycan və Ermənistan respublikalarının ərazi bütövlüyü və suverenliyinə, habelə hər iki dövlətin beynəlxalq səviyyədə tanınmış sərhədlərinə hörmət və dəstəyi bir daha qeyd edirik. BMT Təhlükəsizlik Şurasının qəbul etdiyi müvafiq qətnamələrin, habelə digər beynəlxalq təşkilatların qətnamə və qərarlarının icrasının vacibliyini dərk edərək, ATƏT-in Minsk Qrupunun münaqişənin sülh yolu ilə həlli istiqamətində fəaliyyətinin vacibliyini anlayırıq və bu fəaliyyəti dəstəkləyirik. Erməni və Azərbaycan xalqlarının birgə yaşayışla əlaqədar ümumi ənənələrinə istinad edərək, münaqişənin həll olunmaması nəticəsində iki ölkədə yetişməkdə olan nəsillərin bir-biri haqqında təsəvvürlərin yalnız müharibə kontekstində formalaşdığını təəssüflə qeyd edərək, xalqların sülh şəraitində birgə yaşayışını və uzun müddət davam edən münaqişənin həllini dəstəkləyərək, təşkilat adından mən, David Sesuda bununla bu təşəbbüsə öz dəstəyimi ifadə edirəm və əsas məqsədi Ermənistan-Azərbaycan, Dağlıq Qarabağ münaqişəsinin həllinə töhfə vermək olan Ermənistan-Azərbaycan Sülh Platformasına qoşulmağımı təsdiq edirəm".
Məlum olduğu kimi, Ermənistan-Azərbaycan Sülh Platformasına qoşulanların sayı durmadan artır. Hətta bir çox erməni əsilli fəallar da bu platformaya qoşulduqlarını bəyan edib.
Platformaya qoşulanların sayının sürətlə artması nə ilə bağlıdır?
Ekspert Vəfa Heydərova qəzetimizə bildirdi ki, platforma sülhün bərqərar olunması məqsədilə yaradılıb: "Aprel hadisələrinin təkrarlanmasından ehtiyatlanan erməni ictimaiyyətinin nümayəndələri azərbaycanlı həmkarlarına müraciət edərək münaqişənin həlli yollarını birgə araşdırmağı təklif etdilər. İlk olaraq 3 nəfər hüquq müdafiəçisi və QHT rəhbərinin iştirakı ilə Bakıda konfrans keçirildi. Konfrans iştirakçıları Ermənistan və Azərbaycan prezidentlərinə, xalqlarına müraciət qəbul etdilər. Ermənistandan olan hüquq müdafiəçiləri və QHT rəhbərləri özlərində güc tapıb Ermənistanın işğalçılıq siyasətini və bu siyasəti davam etdirən Sarkisyan rejimini ifşa etdilər. Sonra konfrans iştirakçıları fəaliyyətlərini institutlaşdırmaq və vahid bir təşkilatda birləşərək sülhyaratma missiyasını davam etdirmək məqsədilə Ermənistan-Azərbaycan Sülh Platformasını yaratdılar. Verilən məlumatlardan belə aydın olur ki, Ermənistandan 3 QHT nümayəndəsi və hüquq müdafiəçisi, Azərbaycandan isə 3 QHT platformanın təsisçiləridir. Gördüyünüz kimi, platformaya qoşulmaq istəyənlərin sayı gündən-günə artır. Bildiyiniz kimi, Ermənistan-Azərbaycan Sülh Platformasına qoşulmaq istəyən erməni gənclərə öz ölkələrində təzyiqlər edilib. Proseslərin gedişi göstərir ki, bütün bu basqılar istər Dağlıq Qarabağdan, istərsə də Ermənistandan Sülh Platformasına dəstək verənlərin qarşısını ala bilməyəcək. Artıq bir çox ölkələrin tanınmış siyasətçisi, mətbuat orqanları və ictimai xadimləri Sülh Platforması prosesinə dəstək verməyə başlayıb. Yaxın zamanlarda hamımız daha böyük dəstəyin şahidi olacağıq. Dünyada sülhün tərəfdarları çox olduğu üçün platformaya dəstək də artır".
Məhəmmədəli QƏRİBLİ