"Yeni administrasiyanın siyasətinin necə olacağını indidən deyə bilmərəm"
ATƏT-in Minsk Qrupunun həmsədrləri Dağlıq Qarabağ münaqişəsinin tərəflərinin yaxınlaşması istiqamətində fəaliyyətini davam etdirir. Trend-in məlumatına görə, bunu ABŞ-ın Azərbaycandakı səfiri Robert Sekuta Bakıda jurnalistlər qarşısında çıxışı zamanı deyib.
Onun sözlərinə görə, həmsədrlər hər iki ölkənin XİN başçıları və Prezidentlərinin yeni görüşləri üzərində işləyir.
Səfir qeyd edib ki, Dağlıq Qarabağ münaqişəsi yalnız sülh yolu ilə və beynəlxalq hüquq çərçivəsində həll oluna bilər.
Səfir deyib ki, ABŞ-ın Azərbaycana dair siyasətinin necə dəyişəcəyi haqqda danışmaq hələ ki tezdir, seçkilərin nəticələrini gözləmək lazımdır. "Hələ yanvar ayının 20-dək prezident Barak Obamadır", - səfir deyib.
Səfir potensial qalib barədə heç bir şərh verməyib və nəticələri müşahidə etməyi məsləhət görüb.
"ABŞ-da seçkilər bu ölkənin gələcəyi ilə bağlı insanlar arasında keçirilən debatlardı" - Sekuta deyib.
"ABŞ-da yeni prezident seçiləndən sonra bugünkü tarixdən gələn il yanvarın 20-dək bir administrasiyanın digərinə keçməsi, yəni təhvil verilməsi prosesi gedəcək. Ona görə də yeni administrasiyanın siyasətinin necə olacağı barədə indidən bir fikir deyə bilmərəm". Bu barədə R.Sekuta Respublikaçılar Partiyasından ABŞ prezidenti seçkilərinə namizəd kimi qatılan Donald Trampın prezident seçiləcəyi təqdirdə Cənubi Qafqazla bağlı siyasi xəttinin necə olacağı ilə bağlı sualına cavab verərkən bildirib.
R.Sekuta deyib ki, Prezident Barak Obama yanvarın 20-dək səlahiyyətlərini yerinə yetirməyə davam edəcək.
Səfir Donald Trampın ABŞ-ın "təcrid" siyasətinə qayıdacağı ilə bağlı suala cavab verərkən deyib ki, dünyada seçki prosesinin gerçəkliyi bundan ibarətdir ki, namizədlər seçkiöncəsi kampaniyada müxtəlif bəyanatlarla çıxış edirlər. Amma onlar hakimiyyətə gəldikdən sonra yaranmış yeni vəziyyət, yeni faktorlar onları öz mövqelərində dəyişikliklər etməyə vadar edir. İndi istər Klinton, istərsə də Tramp seçiləcəkləri təqdirdə, onlar da öz gələcək xarici siyasətlərini planlaşdıracaqlar.
"Münasibətlərimizin kifayət qədər uzunmüddətli - 25 il olması öz-özlüyündə bir göstəricidir. Bu müddət ərzində təhlükəsizlik sahəsində əməkdaşlıq edilərək Azərbaycanın təhlükəsiz, sabit bir dövlət olmasına, iqtisadiyyatın neft və qaz sahəsinin inkişafına kömək göstərilib. Eyni zamanda, qanunun aliliyi, korrupsiya ilə mübarizə sahəsində insanların görmək, yaşamaq istədiyi bir şəraitin yaradılması istiqamətində də əməkdaşlıq etmişik" deyə səfiri bildirib.
Seçkilərdən sonra ABŞ-Azərbaycan əlaqələrində hansı istiqamətlərin prioritet olacağına münasibət bildirən səfir qeyd edib ki, ABŞ-a müxtəlif partiyalardan olan şəxslərin prezidentlik etdiyi dövrlərdə - istər Bill Klinton, istər Corc Buş, istərsə də Barak Obama administrasiyası dövründə Azərbaycan və ABŞ-ın yaxşı əlaqələri olub: "Güman edirəm ki, təhlükəsizlik, iqtisadi, xüsusilə enerji sahəsində, o cümlədən demokratiya, qanunun aliliyi sahəsində indiyədək mövcud olan və rəhbər tutulan prinsiplər münasibətlərimizdə yenə də önəmli olacaq. Bununla belə, mən yeni administrasiyanın adından bir söz deyə, çıxış edə bilmərəm. Hesab edirəm ki, seçilmiş prezident Tramp öz fəaliyyətinin bir hissəsi kimi hakimiyyətin təhvil alınması ilə məşğul olmalıdır. Keçid prosesinin daha mütəşəkkil olması üçün hakimiyyətdə olan administrasiya hazırki məsələlər və yeni administrasiyanın cağırışları barədə Tramp administrasiyasını indidən məlumatlandırır ki, onlar müvafiq qərarları indidən verməyə başlasınlar".