"Həmsədrlər də bu istiqamətdə Ermənistana təzyiq etmir"
Ermənistanın Dağlıq Qarabağla bağlı danışıqlar prosesində qeyri-konstruktivlik nümayiş etdirdiyi bir vaxtda yeni bir görüşün olacağı ilə bağlı anons verilib. Məlumdur ki, Azərbaycanın kompromis səylərinə baxmayaraq, Ermənistan qeyri-konstruktiv mövqeyindən əl çəkmir. Hətta Azərbaycanın Dağlıq Qarabağa ən yüksək muxtariyyət statusunu verməyə hazır olmasını bəyan etməsi belə prosesə təsir etməyib.
"Həmsədrlər münaqişənin sülh yolu ilə həlli istiqamətində gələcək addımları üçün tərəflərlə işləməyə davam edir. Bu çox vacibdir ki, tərəflər həmsədrlərlə və öz aralarında masa üzərində olan təklif və ideyalar, o cümlədən Vyana və Sankt-Peterburq görüşlərində əldə edilmiş razılaşmaların həyata keçirilməsi ilə bağlı ümidlə danışır". Bunu açıqlamasında ATƏT-in Minsk Qrupunun amerikalı həmsədri Ceyms Uorlik deyib. Ermənistan xarici işlər nazirinin müavini Şavarş Koçaryanın danışıqlar prosesinin dayandığı barədə bəyanatına münasibət bildirən Uorlik deyib ki, həmsədrlər dialoqu davam etdirmək üçün Hamburq görüşünü səbrsizliklə gözləyir: "Biz Hamburq görüşünü səbrsizliklə gözləyirik və hərtərəfli həllə gətirib çıxaracaq istənilən yollarla tərəflərlə işləməyə hazırıq".
Xatırladaq ki, Hamburqda ATƏT Xarici İşlər Nazirləri Şurasının toplantısı keçiriləcək. Toplantıda Azərbaycan, Ermənistan xarici işlər nazirləri və Minsk Qrupunun həmsədrləri də iştirak edəcək.
İndiki situasiyada Hamburq görüşündən nəsə gözləmək olarmı?
"Atlas" Araşdırmalar Mərkəzindən verilən məlumatda bildirilir ki, ATƏT-ə sədrlik edən Almaniya danışıqlarda fəallığa nail olmaq üçün vaxtaşırı olaraq prosesə müdaxilə edir: "Lakin bu, prosesin ümumi vəziyyətinə ciddi təsir etmir. Aprel ayındakı gərginlikdən sonra müəyyən fəallaşma hiss olunsa da, həmsədrlər yenə də "kor nöqtə"yə, paket həll variantına qayıdıb. Ermənistan tərəfi Azərbaycandan Dağlıq Qarabağda referendumun tarixini eşitmədən hər hansı rayonun qaytarılmasına razı deyil. Prinsipcə, həmsədrlər də bu istiqamətdə Ermənistana təzyiq etmir. Azərbaycan isə ilk öncə ətraf rayonların Ermənistan qoşunlarından boşaldılmasını tələb edir. Hamburq görüşü statistik xarakter daşıyacaq. Əlbəttə, Elmar Məmmədyarovun ümidsiz açıqlamasını başa düşmək olar. Sülh prosesi bu il də səmərəsiz şəkildə davam etdi. İlin sonuna doğru prezidentlərin görüşü gözlənilirdi, o da baş tutmadı. XİN başçılarının görüşü isə sadəcə formal xarakter daşıyır və səmərəli bir müzakirənin gedəcəyi, ciddi razılıqların əldə olunacağı gözlənilmir".
Məhəmmədəli QƏRİBLİ