Qabil Hüseynli: "Azərbaycan-Türkiyə-Türkmənistan formatında əməkdaşlıq, bütün mənalarda, müsbət qiymətləndirilə bilər"
Azərbaycan, Türkiyə və Rusiya arasında üçtərəfli görüşün keçirilməsi üçün hazırlıqlar gedir. Bunu jurnalistlərə Türkiyənin Azərbaycandakı səfiri Erkan Özoral deyib.
Onun sözlərinə görə, eyni zamanda, Azərbaycan-Türkiyə-Türkmənistan üçtərəfli görüşünün keçirilməsi planlaşdırılır.
Azərbaycan-Türkiyə-Türkmənistan formatında təmasların artması nəyə hesablanıb?
Politoloq Qabil Hüseynli qəzetimizə bildirdi ki, görüşdə regiondakı vəziyyət, üç ölkə arasında əməkdaşlığın inkişafı, Xəzərin statusu kimi məsələlərin müzakirəsi aparıla bilər: "Qeyd edək ki, artıq Azərbaycan-Türkiyə-Gürcüstan, Azərbaycan-Türkiyə-İran formatlarında da təmaslar davam etdirilir. Mövcud birlik formatları daxilində həmin ölkələrin xarici işlər nazirləri, prezidentlərinin sammitləri keçirilib. Ukraynada baş verənlər Rusiya ilə Qərb arasında ciddi qarşıdurma yaratdı və nəticədə Rusiyaya qarşı sanksiyaların tətbiqi gündəmə gəldi. Ancaq bu da reallıqdır ki, Avropanın qaz təminatının böyük hissəsi Rusiya ilə bağlıdır. İndiki şəraitdə Avropa Rusiyadan qaz asılılığından xilas olmaq üçün alternativ axtarışına çıxıb. Bu baxımdan Türkmənistan qazının Avropaya çıxarılması çıxış yolu ola bilər və Avropa bu istiqamətdə bütün imkanlardan istifadə etməkdə israrlıdır.
Hesab edirəm ki, region xalqlarının iqtisadi, enerji və siyasi əməkdaşlığı gündəmdədir. Eyni zamanda, bu format həm ABŞ, həm də Aİ tərəfindən dəstəklənir. Çünki bu əməkdaşlıq həm Qərbə, həm də region ölkələrinə mənfəət gətirəcək. Türkiyə regionun aparıcı dövlətidir və NATO-nun üzvüdür. Azərbaycan və Türkmənistan qazının Avropaya çıxarılmasına Türkiyə qarantdır.
Azərbaycan-Türkiyə-Türkmənistan formatında əməkdaşlıq, bütün mənalarda, müsbət qiymətləndirilə bilər".
Məhəmmədəli QƏRİBLİ