Aleksander Şapiro Suliman: "Öz ehtimallarım belədir ki, digər iki şəxs kimi o, hansısa superdövlətlərin başçılarını nəzərdə tuta bilər"
"Onun sükanının dünya liderlərilə eyni sırada dura biləcək, hətta bəzən onları üstələyən şəxsin əlində olduğu dəqiqdir"
Rusiyanın paytaxtında "Gələcəyi qoruyaq" adlı Birinci Moskva Beynəlxalq Konfransı keçirilib. Antisemitizmə qarşı mübarizə məsələlərinə həsr edilmiş bu konfransda müxtəlif ölkələrdən olan siyasətçilər, ictimai xadimlər və ekspertlər iştirak edib.
Azərbaycan Prezidenti Administrasiyasının ictimai-siyasi məsələlər şöbəsinin baş məsləhətçisi Məhsəti Əliyeva və Bakı Beynəlxalq Multikulturalizm Mərkəzinin İsrail dövlətindəki nümayəndəliyinin rəhbəri, beynəlxalq münasibətlər sahəsində ekspert Arye Qut da həmin konfransda iştirak edib və forum çərçivəsində Ümumdünya Yəhudi Konqresinin prezidenti Ronald Lauderlə görüşüb.
R.Lauder Azərbaycan haqqında çox səmimi sözlər söyləyib, onu gözəl ölkə adlandırıb və bu yaxınlarda Azərbaycana etdiyi səfəri xatırlayıb. O deyib: "İlham Əliyev əsl praqmatik diplomat və öz ölkəsinin böyük lideri, bu gün dünyada nələr baş verdiyini yaxşı anlayan üç dövlət başçısından biridir".
R.Lauder İsrail-Azərbaycan əməkdaşlığının perspektivləri mövzusuna toxunaraq vurğulayıb ki, bu münasibətlər, heç şübhəsiz, strateji tərəfdaşlıq xarakteri daşıyır. Azərbaycan əhalisinin əksəriyyətini müsəlmanlar təşkil etməsi faktını nəzərə alsaq, bizim çox gözəl münasibətlərimiz var. Bu amil ölkələrimizin qarşılıqlı münasibətləri üçün çox vacibdir.
Göründüyü kimi, Yəhudi Konqresinin prezidenti R.Lauder İlham Əliyevi dünyada nələr baş verdiyini yaxşı anlayan üç dövlət başçısından biri kimi xarakterizə edir. İlham Əliyevlə bərabər keyfiyyətləri olan digər iki prezident kim ola bilər?
Yəhudi icmasının Azərbaycandakı tanınmış üzvlərindən olan sülhməramlı səfir Aleksander Şapiro Suliman qəzetimizə açıqlamasında bildirdi ki, R.Lauderin İlham Əliyevə verdiyi qiymət obyektivliyə əsaslanır: "Mən yəhudi əsilli şəxs kimi Azərbaycana çox bağlıyam. Fəaliyyətimin çox əhəmiyyətli hissəsi bu ölkə ilə əlaqəlidir. Azərbaycan, eyni zamanda, yəhudilərin yaşadığı, vətəndaşı olduğu bir ölkədir. Burada bizim dinimizin, mədəniyyətimizin inkişafı üçün lazımi şərait yaradılıb. R.Lauder dünya yəhudiləri arasında böyük nüfuza malik insandır. Hər halda, onun verdiyi açıqlamalar böyük həqiqəti özündə əks etdirir. Onun gəldiyi qənaət uzun müşahidələrə, təhlillərə əsaslanır. İlham Əliyev doğrudan da olduqca praqmatik, çevik bir siyasətçidir. Əks halda, bu cür mürəkkəb coğrafiyada belə balanslı siyasət yürüdə bilməzdi. Mən təqdimatla razıyam ki, bunun üçün dünyada nə baş verdiyini lazım olan şəkildə anlamağı bacarmalısan. Digər iki prezidentin kim olduğuna gəldikdə isə, mən
Lauderin konkret kimi nəzərdə tutduğunu deyə bilmərəm. Ancaq öz ehtimallarım belədir ki, digər iki şəxs kimi o, hansısa superdövlətlərin başçılarını nəzərdə tuta bilər. Yəqin ki, digər iki prezident kiçik ölkələri təmsil etmir. Azərbaycan dünya dövlətləri sırasında o qədər də böyük əhali və əraziyə malik olmasa da, onun sükanının dünya liderlərilə eyni sırada dura biləcək, hətta bəzən onları üstələyən şəxsin əlində olduğu dəqiqdir".
Məhəmmədəli QƏRİBLİ