Arzuxan Əlizadə: "Həmsədrlər Ermənistana real təzyiq göstərsə, qarşı tərəf danışıqlar masasına oturacaq" "Bunu nəinki Markov, hər üç həmsədr də yaxşı bilir"
Bu günlərdə rusiyalı politoloq, Rusiya Siyasi Araşdırmalar İnstitutunun direktoru Sergey Markov mətbuata açıqlamasında bildirib ki, həmsədrlər Ermənistanı danışıqlar masasına qaytarmağa çalışır:
"Ermənistan hazırda Dağlıq Qarabağ münaqişəsinin nizamlanması ilə bağlı danışıqlarda iştirakını dayandırıb. Həm həmsədrlər, həm də Avropa İttifaqının Cənubi Qafqaz üzrə xüsusi nümayəndəsi Ermənistan rəhbərliyini danışıqlar masasına qaytarmağa çalışır. Məsələ ondadır ki, bu ilin aprel ayında Qarabağda dördgünlük müharibədən sonra aydın oldu ki, bu münaqişə dondurulmuş deyil, hər an müharibə başlaya bilər. Hazırda müxtəlif qüvvələr, o cümlədən həmsədrlər və Avropa İttifaqı cəhd edir ki, yenidən İrəvanı danışıqlar masasına qaytarsın".
Ancaq ATƏT-in Minsk Qrupu həmsədrlərinin regiona son səfəri nəticə etibarilə danışıqların bərpa olunmasına gətirib çıxarmadı. Əksinə, Ermənistan ritorikasını bir az da sərtləşdirdi.
Bu arada Ermənistan xarici işlər nazirinin müavini Şavarş Köçəryan jurnalistlərə deyib ki, Dağlıq Qarabağ münaqişəsinə dair danışıqlar dondurulub və prezidentlərin görüşü olmayacaq. Bu baxımdan Ermənistan nümayəndələrinin ATƏT-in Minsk Qrupu həmsədrlərinin regiona son səfərinin ardınca danışıqların dondurulduğunu, prezidentlərin yeni görüşünün olmayacağını bildirməsi deyilənlərə sübutdur.
Belə olan halda, həmsədrlər Ermənistanı danışıqlara getməyə necə məcbur edə bilər?
Məsələyə münasibət bildirən AMİP-in baş katibi Arzuxan Əlizadənin sözlərinə görə, işğalçı tərəfə real təzyiq göstərilməlidir: "Ermənistan mövcud vəziyyətdə danışıqlardan imtina edib güc nümayiş etdirmək imkanında deyil. Yəni bunun üçün lazımi resursu, potensialı yoxdur. Bunu nəinki Markov, hər üç həmsədr də yaxşı bilir. Sadəcə, problem ondadır ki, həmsədrlər Ermənistana uzun illərdir danışıqlarda sərgilədiyi destruktiv mövqeyə görə təzyiq göstərmək istəmir. Bax, problem bundadır. Halbuki, həmsədrlər Ermənistana real təzyiq göstərsə, qarşı tərəf danışıqlar masasına oturacaq. Həmsədrlərin məqsədi münaqişənin ədalətli həlli yox, ən yaxşı halda, nəyin bahasına olursa-olsun, müharibənin yenidən alovlanmasının qarşısını almaqdır. Gedən danışıqlar prosesində işğalçı ilə işğala məruz qalan tərəfə heç bir fərq qoyulmur. Aprel döyüşlərindən sonra güman olunurdu ki, həmsədrlər işğalçı tərəfə təzyiq göstərəcək. Ən azından bir neçə ətraf rayonun boşaldılması ilə bağlı təzyiqlərin ediləcəyi gözlənilirdi. Ancaq bunların heç biri baş vermədi. Həmsədrlər təzyiq göstərmək əvəzinə deyirlər ki, ətraf rayonların azad olunması ilə status məsələsi paralel şəkildə öz həllini tapmalıdır".
Qəzetimizin baş redaktoru Aydın Quliyev isə bildirib ki, Markov əslində bir sirr açıb: "Ermənistanın danışıqlar prosesini tərk etməsi onun qeyri-konstruktivliyinin sübuta ehtiyac olmayan kulminasiyasıdır. Beynəlxalq dairələr bunu görməsələr, Azərbaycan üçün ziyanlı vəziyyət daha da möhkəmlənə bilər. Ermənistanı prosesə qaytarmaq problemi az qala Qarabağ probleminin özündən qabağa çıxıb. Həmsədrlər bilməlidir ki, Ermənistan danışıqlara qayıtmasa, bu dəfə Azərbaycan danışıqlar prosesini həmişəlik tərk edə bilər".
Vidadi ORDAHALLI