Xəqani Ələkbərli: "Son illər ərzində Belarus məhsullarının Azərbaycana idxalı bir neçə dəfə artıb"
Belarus prezidenti Aleksandr Lukaşenko 28-29 noyabr tarixlərində Azərbaycana rəsmi səfər edəcək. Bu barədə "İnterfax" agentliyi xəbər verir. Məlumata görə, səfər zamanı əməkdaşlığın genişləndirilməsinə istiqamətlənmiş bir sıra sənədlərin imzalanması gözlənir. Hazırda həmin sənədlər tərəflər arasında razılaşdırılır.
Qeyd edək ki, son vaxtlar iki ölkə arasındakı münasibətlər normal axarda inkişaf edir. Bir müddət əvvəl Belarus prezidenti Aleksandr Lukaşenko Azərbaycanın baş nazirinin birinci müavini Yaqub Eyyubovla görüşüb. Görüş zamanı Lukaşenko vurğulayıb ki, Minsk sülh danışıqları meydançasında öhdəliklərini yerinə yetirir.
Belarus prezidenti Azərbaycan hakimiyyətini referendumun baş tutmasına görə təbrik edib: "Bu nəticə Azərbaycan xalqının bu çətin vaxtda hakimiyyətə münasibətinin ən yaxşı təsdiqidir. Və bu çox böyük qələbədir. Bunun dünyada necə qiymətləndirildiyini bilirəm. Ölkənizin imici xeyli yüksəldi. Mən dostumla 28-29 noyabr tarixlərində görüşmək barədə razılığa gəlmişəm".
Belarus-Azərbaycan yaxınlaşması perspektiv üçün nə vəd edir?
Slavyan ölkələri ilə münasibətlərin araşdırılması üzrə ixtisaslaşan ekspert Xəqani Ələkbərli qəzetimizə açıqlamasında bildirdi ki, Belarus Minsk Qrupunun üzvü kimi Azərbaycanla bağlı məsələlərə istənilən formada təsir göstərə bilər: "Görürsünüz ki, formatın adı da həmin ölkənin paytaxtının adı ilə eynidir. Belarus eyni zamanda Ermənistanla KTMT-də təmsil olunur. Buna baxmayaraq, bizimlə çox yaxın münasibətdədir. Hər iki parlamentdə əməkdaşlıq üzrə işçi qrupu yaradılıb, deputatlar seçkilərin, referendumların keçirilməsi zamanı müşahidələrdə, beynəlxalq konfranslarda və parlament xarakterli digər tədbirlərdə iştirak edirlər. Profilli komissiyalar səviyyəsində daha sıx əlaqələrin qurulmasında da yaxşı perspektivlər var. Əməkdaşlığımızın gündəliyi kifayət qədər zəngindir, intensiv dialoq gedir. Belarus və Azərbaycanın əməkdaşlığı iqtisadi sahədə dinamik inkişaf edir. Yüksək səviyyədə aktiv dövlətlərarası dialoq hesabına ticari-iqtisadi əməkdaşlıq sahəsində bir sıra konkret layihələrin praktikada reallaşdırılması mümkün olub ki, bunun əsasını 2006-cı ilin oktyabrında iki ölkə prezidentlərinin imzaladıqları 2015-ci ilədək sosial-iqtisadi əməkdaşlıq haqqında dövlətlərarası müqavilə təşkil edir. Son illər ərzində Belarus məhsullarının Azərbaycana idxalı bir neçə dəfə artıb. Energetika sahəsində dövlətlərimizin iqtisadi maraqlarının yaxınlaşması gündəlikdədir. Belarus üçün birgə tranzit layihələr, məsələn, Azərbaycanın elektrik enerjisinin digər dövlətlərə nəqlində mümkün iştirak tamamilə maraqlıdır. Bütün bunlarla yanaşı, Belarus Azərbaycanın ərazi bütövlüyünü də tam dəstəkləyən dövlətdir. Əməkdaşlığımızın daha da yaxın olması ancaq yaxşı perspektivlər vəd edir".
Məhəmmədəli QƏRİBLİ