Cəbhədə düşmən təxribatı, atəşkəsin pozulması halları getdikcə daha intensiv xarakter almağa başlayır. Hesab olunur ki, danışıqlar prosesində vasitəçilik edən ATƏT-in Minsk Qrupu, eləcə də regionda maraqlı güclər tərəfindən zəruri addımlar atılmasa, aprel müharibəsinin daha dəhşətli formada təkrarlanması qaçılmaz olacaq.
İndilikdə isə erməni təxribatı davam edir və getdikcə daha ağır silahlar işə düşməyə başlayır. Bunu Müdafiə Nazirliyinin məlumatlarından da aydın sezmək olar. Son məlumata görə isə, erməni silahlı bölmələri cəbhənin müxtəlif istiqamətlərində 60 millimetrlik minaatanlardan, qumbaraatanlardan, həmçinin iriçaplı pulemyotlardan da istifadə etməklə sutka ərzində atəşkəs rejimini ümumilikdə 18 dəfə pozub. Qeyd olunur ki, Ermənistanın İcevan rayonunun Vazaşen kəndində yerləşən mövqelərdən Qazax rayonunun Bala Cəfərli, Berd rayonu ərazisindəki adsız yüksəkliklərdə yerləşən mövqelərdən Tovuz rayonunun Əlibəyli kəndində yerləşən mövqelərimiz atəşə tutulub. İşğal altında olan Füzuli rayonunun Horadiz, Qorqan, Cəbrayıl rayonunun Mehdili kəndləri yaxınlığında, həmçinin Tərtər, Xocavənd, Füzuli və Cəbrayıl rayonları ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub. Aydındır ki, proses bu səpkidə davam edərsə, müharibənin yenidən alovlanması, qeyd olunduğu kimi, qaçılmaz olacaq. Amma məsələnin maraqlı tərəfi həm də ondan ibarətdir ki, müharibə yenidən başlayacağı halda ermənilər döyüş meydanında tək qalacaqlarını və məğlub duruma düşəcəklərini də etiraf edirlər. Məsələn, erməni analitik İqor Muradyan proseslər gərginləşəcəyi halda Azərbaycan və Ermənistan arasında müharibə ssenarilərinin iki istiqamətdə ola biləcəyini deyib: "Birincisi, iki ölkə arasında müharibə, ikincisi başqa ölkənin müdaxilə edəcəyi hərbi toqquşma". Muradyan etiraf edir ki, hər iki halda Ermənistan təklənmiş olacaq: "Birinci variantda tərəflər müharibə aparacaq. Beynəlxalq ictimaiyyətin səyi nəticəsində tərəflər yenidən real danışıqlar üçün masaya əyləşə bilər. Lakin o da faktdır ki, Azərbaycan sürətli hücumla Ermənistana ciddi zərbələr vura bilər. İkinci variantda Türkiyə Azərbaycana hərtərəfli kömək edəcək və müharibəyə qoşulacaq. Bu zaman NATO kənarda qalacaq. Bunun səbəblərindən biri də Ermənistanın NATO-ya məhəl qoymamasıdır. Misal üçün, bu gün erməni telekanalları NATO haqda heç bir xəbərə yer vermir, amma Rusiya ilə bağlı xəbərləri sevə-sevə təbliğ edirlər. Bu kimi faktorlar Ermənistanın NATO və ABŞ-dan təcrid olmasına və zəifləməsinə gətirib çıxarır. Azərbaycan isə bu şəraitdən yararlana bilər. Hazırda hərbi toqquşmaların yenilənməsi aktualdır. Belə görünür ki, Ermənistanda çoxları müharibənin məğlubiyyət ssenarisi ilə artıq razılaşıb".
Bundan əvvəl isə digər erməni politoloq Kays Minasyan da ölkəsinin təklənəcəyini bildirib: "Biz yeni müharibənin kandarındayıq. Yeni müharibədə Ermənistan aprel döyüşlərində olduğu kimi yenə tək qalacaq. Rusiya və ABŞ hər şeyə göz yumacaq, Azərbaycan isə Ermənistanı məğlubiyyətə uğradacaq. Bu daha şiddətli olacaq. Hətta gözləntilərə görə, Qərbin Qarabağın müstəqilliyini tanımaq istəkləri var. Lakin Qərb bu məsələdə də geri çəkiləcək və Bakını dəstəkləyəcək, ən azından, öz susqunluğu ilə bu dəstəyi nümayiş etdirəcək". Bu günlərdə isə başqa erməni politoloq Aleksandr Kananyan da etiraf edib ki, Qarabağ cəbhəsində üçüncü müharibə qaçılmaz olacaq. O, bu müharibənin Ermənistan üçün dəhşətli nəticələrə səbəb olacağını vurğulayıb: "Biz dərk etməliyik ki, Qarabağda yeni müharibə mütləq olacaq, bundan qaçmaq mümkün deyil. Biz Prezident İlham Əliyevin nə düşündüyünü, hansı manevrlər qurduğunu anlaya bilmirik, bunu analiz etmək də çətindir. Əliyev hərəkətə keçəcəksə, əmin olun ki, müharibədə onu uğur gözləyir. Biz düşünməməliyik ki, müharibə nə vaxt başlayacaq, biz bunun qaçılmaz olduğunu dərk etməliyik". Kananyan qeyd edib ki, Ermənistanın daxilindəki problemlər Azərbaycanın əlini gücləndirir. Beləliklə, bu açıqlamalardan da görünür ki, ermənilər yeni müharibədə məğlub duruma düşəcəklərini qəbul edirlər. Bu səbəbdən onlara da aydındır ki, cəbhədə atəşkəs pozuntuları düşmənə baha başa gələ bilər. Digər tərəfdən o da nəzərə alınmalıdır ki, ermənilərin güvəndiyi Rusiya da artıq Qarabağ düyününün çözülməsində irəliləyişlərin olmasında maraqlıdır və bu fonda erməni tərəfinə Kremldən gələn təzyiqlər də artır. Bu günlərdə Azərbaycan-Rusiya münasibətlərinə dair keçirilən forum isə Bakı və Moskvanın əlaqələrinin daha da yüksəlməkdə olduğunu göstərir. Ermənistanla isə vəziyyət fərqlidir. Bütün bunlar da Qarabağ konfliktinə təsirsiz ötüşmür.
Nahid SALAYEV