Vüqar Qədirov: "Rusiya səfirinin foruma verdiyi yüksək qiymət tam reallığı əks etdirir"
Bakıda keçirilən VII Azərbaycan-Rusiya regionlararası forumda çıxışı zaman Rusiyanın Azərbaycandakı səfiri Vladimir Doroxin bildirib ki, Azərbaycan və Rusiya arasında regionlararası münasibətlər təbii əsaslar üzərində qurulub.
Səfirin sözlərinə görə, regional münasibətlər hər iki ölkənin qarşılıqlı maraqlarını əks etdirir. V.Doroxin bu cür forumların iki ölkə arasında hökumətlərarası səviyyədə həlli mümkün olmayan məsələlərin həll olunmasında böyük rol oynadığını da vurğulayıb.
Foruma Azərbaycanın və Rusiyanın dövlət və hökumət rəsmiləri, parlament nümayəndələri, iqtisadiyyatın sənaye, turizm, kənd təsərrüfatı, tikinti, ticarət, konsaltinq, logistika, əczaçılıq, İKT, maliyyə və s. sahələrində fəaliyyət göstərən sahibkarlar qatılıb.
Azərbaycan Prezidentinin ictimai-siyasi məsələlər üzrə köməkçisi Əli Həsənov Prezident İlham Əliyevin forum iştirakçılarına ünvanlanmış təbrik məktubunu oxuyub.
Sonra Rusiya Prezidenti Administrasiyasının xarici ölkələrlə regionlararası və mədəni əlaqələr idarəsinin rəisi Vladimir Çernov tərəfindən prezident Vladimir Putinin məktubu oxunub.
Forum çərçivəsində plenar iclas, sənaye, turizm, aqrar, humanitar sahələr üzrə "dəyirmi masa"lar və Azərbaycan-Rusiya biznes forumunun keçirilməsi diqqətəlayiqdir.
Doroxinin bu cür forumların hətta iki ölkə arasında hökumətlərarası səviyyədə həlli mümkün olmayan məsələlərin həll olunmasında böyük rol oynadığına dair açıqlamasından hansı nəticələri çıxarmaq olar?
Ekspert Vüqar Qədirov qəzetimizə açıqlamasında bildirdi ki, səfirin fikrilə razılaşmaq olar: "Çünki dövlətlər arasında hazırlanan tədbirlər çox mühüm çəkiyə malik olur. Bu qəbildən olan toplantılarda məqsədlər bəlli olur. Məsələnin digər vacib tərəfləri də ondan ibarətdir ki, hər iki ölkənin nüfuzlu şəxsləri, əlaqədar qurumları arasında koordinasiya yaradılır. Doğrudan da canlı təmaslar vasitəsilə bir çox problemlərin həllinə daha operativ şəkildə nail olunur. Xüsusilə də regionlararsı təmasların qurulması baxımından bu olduqca vacibdir. Rusiya bizim yaxın qonşumuzdur. Çox böyük imkanlara malikdir. Rusiyanın elə regional ərazi vahidi var ki, ərazisi bir neçə dəfə Azərbaycandan böyükdür. Həmin regionların başçıları ilə bizim yerli subyekt rəhbərlərinin birbaşa təması məhz belə tədbirlər vasitəsilə reallaşa bilir. Bir müddət əvvəl də cənab Prezident icra hakimiyyətlərinə investisiya cəlbi ilə bağlı tapşırıqlar vermişdi. Bütün hallarda, belə forumların hər iki ölkə üçün xeyri var. Rusiya səfirinin foruma verdiyi yüksək qiymət tam reallığı əks etdirir".
Məhəmmədəli QƏRİBLİ