Arzu Nağıyev: "Əsas təmaslar da NATO-Azərbaycan əməkdaşlığı çərçivəsində Əfqanıstanla bağlıdır"
Oktyabrın 31-də Azərbaycanın müdafiə naziri Zakir Həsənov ölkəmizdə səfərdə olan ABŞ-ın müdafiə katibinin Rusiya, Ukrayna və Avrasiya üzrə köməkçisinin müavini Maykl Karpenterlə görüşüb.
Müdafiə Nazirliyinin mətbuat xidmətinin məlumatına görə, regiondakı hərbi-siyasi vəziyyət barədə məlumat verən nazir Z.Həsənov Ermənistanın Cənubi Qafqazda sabitliyə təhlükə yaratdığını, beynəlxalq hüquq norma və prinsiplərinə məhəl qoymadan Azərbaycan torpaqlarını işğal altında saxladığını və vasitəçilərin səylərinə baxmayaraq, qoşunların qarşıdurma xəttində təxribatlar törətməklə vəziyyəti gərginləşdirdiyini xüsusi qeyd edib.
Nazir, eyni zamanda, Azərbaycanla ABŞ arasında hərbi əməkdaşlıq proqramları, o cümlədən NATO çərçivəsində Azərbaycan Silahlı Qüvvələri ilə alyansa üzv olan və tərəfdaş dövlətlər arasında qarşılıqlı əməliyyat uyarlılığının əldə edilməsi, Əfqanıstanda həyata keçirilən qeyri-döyüş missiyasına verilən töhfə haqqında danışıb.
Mətbuat xidmətinin məlumatında deyilir ki, M.Karpenter ABŞ hökumətinin Azərbaycanla təhlükəsizlik və hərbi sahədə əməkdaşlığın genişləndirilməsi və gücləndirilməsində maraqlı olduğunu, bu istiqamətdə fəaliyyətlərin davam etdiriləcəyinə əminliyini bildirib.
Azərbaycan Ordusunun döyüş hazırlığına yüksək qiymət verən qonaq şəxsi heyətin müasir və yeni silahlarla təchiz edildiyini, istənilən təhdidə çevik cavab vermək imkanına malik olduğunu xüsusi qeyd edib.
Məlumatda deyilir ki, qarşılıqlı maraq doğuran görüşdə iki ölkə arasında ikitərəfli hərbi əlaqələrin genişləndirilməsi perspektivləri, o cümlədən təhlükəsizlik və müdafiə sahəsində əməkdaşlıq, hərbi təhsil və tibb hazırlığı məsələləri də müzakirə olunub.
Bu cür təmasların nə kimi nəticələri ola bilər?
Ekspert Arzu Nağıyevin sözlərinə görə, bu cür əməkdaşlıq formatı hər iki ölkə üçün əhəmiyyətlidir: "Düşünürəm ki, ABŞ hökuməti Azərbaycanla hərbi və təhlükəsizlik sahəsində əməkdaşlığın inkişafında maraqlıdır. Məlumdur ki, bu əməkdaşlıq ABŞ-da keçiriləcək prezident seçkilərindən sonra da davam edəcək. Məhz buna görə də Maykl Karpenterin rəhbərlik etdiyi nümayəndə heyəti Azərbaycana da gəlib. Əsas təmaslar da, təbii ki, NATO-Azərbaycan əməkdaşlığı çərçivəsində Əfqanıstanla bağlıdır. Perspektivə gəldikdə isə, ən yaxın partnyorumuz olan Türkiyənin NATO üzvü olması və bizim də sülhməramlı kontingentin Türkiyə ordusu ilə bir yerdə olması vacib məsələdir. Təbii ki, NATO standartlarına uyğun ordunun yaradılması üçün Azərbaycanın ABŞ-la əməkdaşlığı mühüm amildir. Bu baxımdan da təmasları məqbul saya bilərik".
Məhəmmədəli QƏRİBLİ