Tural Ələkbərli: "Azərbaycanın bəzi qonşularının, faktiki olaraq, İsrailə düşmən mövqeyində olmasına baxmayaraq, bu əməkdaşlıq gözəl məcrada davam edir"
İsrailin Baş naziri Benyamin Netanyahu dekabrda Azərbaycana səfər etməyi planlaşdırır. Bunu diplomatik mənbə bildirib. Mənbə qeyd edib ki, səfər ilin sonuna qədər, yəqin ki, dekabr ayında həyata keçiriləcək.
Onun sözlərinə görə, B.Netanyahu Azərbaycan rəhbərliyi ilə görüşlər keçirməyi planlaşdırır. Hiss olunur ki, dünya mediası bu səfərə geniş diqqət ayıraraq, onu müxtəlif aspektlərdən şərh edir. Netanyahunun səfərinə bu qədər marağın olması nə ilə bağlıdır?
Yaxın Şərq üzrə mütəxəssis Tural Ələkbərli qəzetimizə açıqlamasında bildirdi ki, Netanyahunun səfərinə maraq müsəlman ölkəsi Azərbaycanla İsrail arasındakı yaxşı əlaqələrlə bağlıdır: "Azərbaycan və İsrail təkcə iqtisadi sahədə deyil, strateji baxımdan müttəfiq sayıla bilər. Müntəzəm olaraq mətbuatda Azərbaycan və İsrailin siyasi və iqtisadi əməkdaşlığından bəhs edən yazılar dərc edilir. Azərbaycan, eyni zamanda, İsraillə hərbi sahədə də əməkdaşlıq edir. Ölkələr arasında həmçinin yüksək səviyyədə, çox güclü və hərtərəfli təhlükəsizlik əlaqələri mövcuddur. Bilirsiniz ki, regionumuzun çoxsaylı problemləri var. Azərbaycan və İsrail beynəlxalq terrora qarşı savaşır, təhlükəsizlik sahəsində, regionda sülh və sabitlik uğrunda əməkdaşlıq edir. Səfərə olan diqqətin ən başlıca mövzusu İsrail və Azərbaycanın qəribə müttəfiqlər kimi görünməsidir. Müsəlmanların əksəriyyət təşkil etdiyi Azərbaycanın bəzi qonşularının, faktiki olaraq, İsrailə düşmən mövqeyində olmasına baxmayaraq, bu əməkdaşlıq gözəl məcrada davam edir. Azərbaycan dünyada ilk yəhudi icmalarından birinin yarandığı yerdir.
Həm İsrail, həm də Azərbaycan son dövrlər tez-tez Qərb mediasının yersiz və haqsız tənqidlərilə üzləşib. Buna baxmayaraq, hər iki ölkə öz yoluna davam edir.
Avropada antisemitizm artır. Qərb dünyasında islamafobiya genişlənir. Azərbaycanla İsrail isə əməkdaşlıq edir. Bütün bu vacib faktorlar Netanyahunun Azərbaycana edəcəyi səfəri maraqlı edir".
Məhəmmədəli QƏRİBLİ