Seyid Camal Əzimbəyli: "Biz də, ictimaiyyət olaraq, bununla bağlı dəstək verməyə hazırıq"
Türkiyənin Azərbaycana yeni təyin edilmiş səfiri Erkan Özoral mətbuata açıqlamasında bir sıra məqamlara toxunub. Onun sözlərinə görə, Türkiyə ilə Azərbaycan arasında çox dərin qardaşlıq əlaqələri var: "Biz bu əlaqələri Azərbaycan müstəqillik əldə etdikdən bəri son 25 ildə hər keçən gün daha da möhkəmləndirdik. Diplomatlar olaraq, bizim üzərimizə düşən vəzifə bu sıx əlaqələri, ən yüksək rəsmi səviyyələrdə qurulmuş bu münasibətləri hər zaman daha da inkişaf etdirməkdir".
Bununla yanaşı, E.Özoral hesab edir ki, Azərbaycan-Türkiyə arasında mədəni və humanitar əlaqələri daha da inkişaf etdirmək lazımdır: "Hər bir türkiyəli və azərbaycanlı bir-birini qardaş kimi, ən yaxın adamı kimi qəbul edir. Biz bu əlaqələri, bu səmimi hissləri mədəni fəaliyyətlərlə daha da yaxınlaşdırmaq, daha da inkişaf etdirmək istəyirik".
Məlumat üçün onu da qeyd edək ki, mərhum prezident Heydər Əliyev 16 yanvar 2001-ci ildə prezident sarayında TÜRKSOY təşkilatının toplantısında iştirak edən türkdilli ölkələrin nümayəndələrini qəbul edib. Həmin ilin 9 martında prezident Atatürk Mərkəzinin yaradılması ilə əlaqədar sərəncam verib. Ondan sonrakı dövrlərdə də bu istiqamətdə bir sıra işlər görülüb. Bütün bu deyilənlərin fonunda, iki ölkə arasında mədəni və humanitar əlaqələri daha da inkişaf etdirmək üçün hansı işlər görülməlidir?
Məsələyə münasibət bildirən şərqşünas Seyid Camal Əzimbəylinin sözlərinə görə, bu yöndə bir sıra ortaq işlər görmək olar: "Əvvəla Erkan bəyin iki dövlətin daha da yaxınlaşması üçün hansı səylər göstərdiyini görmüşəm. O, əvvəlki səfirin müavini olarkən bu yöndə çalışırdı. Ona görə də hesab edirəm ki, yeni səfir Azərbaycan-Türkiyə arasında mədəni və humanitar əlaqələrin daha da inkişaf etdirilməsi istiqamətində səylərini artıracaq. Bunun üçün səfirliyin müstəsna təşəbbüs göstərəcəyini düşünürəm. Ona görə ki, bu işin bilənidir, həm də Türkiyə-Azərbaycan qardaşlığını sözdə deyil, əməldə həyata keçirəcəyinə əminəm. O baxımdan onun bu fikirləri təqdir olunasıdır və alqışlanasıdır. Düşünürəm ki, humanitar, mənəvi sahələr dedikdə bura hər baxımdan şamil ediləsi bir şeylər var. Məsələn, Azərbaycanda mənəvi dəyərlərimizin Türkiyə ilə ortaq əhəmiyyət kəsb etdiyini hamımız bilirik. Hətta bəzi milli adət və ənənələrimizin Türkiyə ilə eyni əhəmiyyətə malik olduğunu nəzərə aldıqda, ortaq tədbirlərin keçirilməsinin vacib effekt verəcəyini düşünürəm. Bu əməkdaşlıq dini sahədə də ola bilər. Səfirliyin dini işlər müşaviri bir dəfə mənə dedi ki, Türkiyə-Azərbaycan qardaşlığında Əhli-Beyt bizim ortaq dəyərimizdir. Bax, bu kimi məsələlərə nəzər saldıqda hesab edirəm ki, bir sıra işlər görmək olar. Başqa bir tərəfdən, Azərbaycan qazilərinin Türkiyə şəhidlik məktəbinə münasibətdə sevgiləri var. Bu kimi məsələləri nəzərdən keçirdikdə düşünürəm ki, səfirin də bununla bağlı layihələri var. Biz də, ictimaiyyət olaraq, bununla bağlı dəstək verməyə hazırıq". Vidadi ORDAHALLI