Üzeyir Cəfərov: "Bununla saxta vətənpərvərlik və ruh yüksəkliyi yaratmağa cəhd edirlər"
Qondarma "Dağlıq Qarabağ Respublikası"nın "başçısı" Bako Saakyan işğal altında olan Ağdərənin Talış kəndində abidə açılışında iştirak edib. Erməni mətbuatının verdiyi məlumata görə, Saakyanın iştirak etdiyi mərasim Talışda "4 günlük müharibə" zamanı öldürülən "Sisian dəstəsi"nin xatirəsinə ucaldılan abidənin açılışına həsr edilib.
Ermənilərin işğal altında saxladıqları ərazilərdə belə saxta vətənpərvərlik tədbirləri keçirməsi nə ilə əlaqəlidir?
Ehtiyatda olan general-leytenant Yaşar Aydəmirovun fikrincə, yayılan məlumat erməni təbliğatının növbəti hiyləsidir:
"Erməni mətbuatının yaydığı guya Talış kəndində aprel hadisələrində məhv edilmiş sisianlı quldurlara abidə açılışı mərasiminin keçirilməsi barədə informasiya absurd, qeyri-peşəkar, uğursuz təqdim edilmiş və gülüş doğuran xəbərdir. Bu, Ermənistan və qondarma Dağlıq Qarabağ hərbi-siyasi rəhbərliyinin panikada olan, oradan qaçmağa yollar axtaran erməni əhalisini qismən də olsa sakitləşdirməyə və boş ümidlər verməyə hesablanmış təbliğat hiyləsindən başqa bir şey deyil. Əvvəla ermənilər bu cür məlumat yaymaqla Ermənistanın Azərbaycan ərazilərinin işğalında birbaşa iştirak etdiyini və aprel hadisələrində təkcə bir istiqamətdə böyük itkilər verdiyini növbəti dəfə boyunlarına almış oldular. Məkanı bəlli olmayan, haradasa cəbhəboyu zonadan kənarda, dağların arxasında keçirilmiş kiçik tədbirdən çəkilmiş və montaj edilmiş fotoda bir qrupun yığışaraq "təntənəli keçidi" izləməsi heç də möhtəşəm mərasimin keçirilməsi demək deyil. Ora toplaşanlar isə separatçıların dəstə başçısı Saakyanın özü ilə gətirdiyi tör-töküntüləridir. Mənə, hərbə yaxın olan bir şəxs kimi, tam məlumdur ki, Talış kəndi yaxınlığında düşmənin hətta 2-3 hərbi qulluqçusunun belə birlikdə rahat hərəkət etməsi qeyri-mümkündür. Tam məsuliyyətimlə sizi əmin edirəm ki, qoşunlarımız həm Talış kəndi ətrafındakı yüksəklikləri, həm də düşmənin dərinliyindəki əraziləri daim nəzarətdə saxlayır".
Hərbi ekspert Üzeyir Cəfərov da hesab edir ki, bu cür addımları ermənilərin növbəti təxribatı siyahısına aid etmək olar: "Yaxın günlərdə düşmən bu sayaq təxribatlara əla ata bilər. Bununla saxta vətənpərvərlik və ruh yüksəkliyi yaratmağa cəhd edirlər.
Erməni tərəfi əsgər ölümlərini pərdələmək üçün Azərbaycan tərəfinə maksimum zərbə vurmaq istiqamətində səy edir. Ermənistanın yeni müdafiə nazirinin təyinatından sonra belə təxribatların olacağı gözlənilən idi. Çox cavan və təcrübəsiz bir şəxsin Ermənistanın müdafiə naziri vəzifəsinə təyin edilməsi və ona baş qərərgah rəisi kimi separatçıların keçmiş "müdafiə naziri" olmuş bir şəxsin təyin edilməsi bu cür təxribatların həyata keçirilə biləcəyi ehtimalını gücləndirirdi. Sabiq müdafiə nazirinin vaxtındakı əsgər ölümlərini pərdələmək üçün Azərbaycan tərəfinə maksimum zərbə vurmaq istiqamətində səy edirlər. Bu prosesə start verilib və yaxın günlərdə bu təxribatların sayı daha da artacaq".
Məhəmmədəli QƏRİBLİ