Son günlərə qədər cəbhə zonasında nadir hallarda pozulan atəşkəslə bağlı vəziyyət yenidən kəskin şəkildə dəyişib. Həm atəşkəs hallarının pozulması artıb, həm də yenidən cəbhədə ağır silahlar işə düşməyə başlayıb.
Məsələn, Müdafiə Nazirliyinin son belə məlumatında bildirilir ki, Ermənistan silahlı bölmələri cəbhənin müxtəlif istiqamətlərində sutka ərzində atəşkəsi ümumilikdə 45 dəfə pozub. Bu zaman 60 millimetrlik minaatanlardan, qumbaraatanlardan və iriçaplı pulemyotlardan da istifadə edildiyi bildirilir. Bütün bunlar fonunda bəzi ekspertlər cəbhədə erməni təxribatı üzündən aprel hadisələrinin yenidən təkrarlana biləcəyini istisna etmir.
Xatırladaq ki, bu il aprelin 2-dən 5-nə kimi Qarabağ cəbhəsində baş verən hərbi əməliyyatlarda düşmən tərəfi çoxsaylı itki verib. Bundan sonra ATƏT-in Minsk Qrupu Azərbaycan və Ermənistan rəhbərliyinin görüşünü təşkil edib. Bu il mayın 16-da Vyanada keçirilən görüşdən sonra cəbhədə böyük hərbi əməliyyatlar dayanıb. Ancaq yenə son günlər erməni tərəfi atəşkəs pozuntusuna yol verir. Özü də, qeyd olunduğu kimi, artıq cəbhədə iri silahların da işə düşməsi müşahidə olunur. Bu hal, eləcə də erməni tərəfinin son açıqlamaları müharibənin yenidən alovlanmasını istisna etmir. Bu arada isə Ermənistan Milli Məclisinin sədr müavini, hakim Respublika Partiyasının mətbuat katibi Eduard Şarmazanov belə bir açıqlama ilə çıxış edib ki, yaxın vaxtlarda Azərbaycan və Ermənistan prezidentlərinin görüşü nəzərdə tutulmur.
Onun sözlərinə görə, erməni tərəfinin Qarabağ məsələsində dəqiq mövqeyi var: "O mövqe dəyişməyib və dəyişməyəcək. "DQR" müstəqil dövlət olmalıdır və hər hansı statusda Azərbaycanın tərkibində ola bilməz". E.Şarmazanov bununla Dağlıq Qarabağ münaqişəsi üzrə Ermənistanın konstruktiv danışıqlara hazır olmadığına işarə edib. Təbii ki, bu hal Qarabağ münaqişəsinin Ermənistan üzündən yenidən alovlanmasını istisna etmir. Erməni politoloq Aleksandr Kananyan da bildirir ki, Qarabağ cəbhəsində üçüncü müharibə qaçılmaz olacaq. O, bu müharibənin Ermənistan üçün dəhşətli nəticələrə səbəb olacağını vurğulayıb: "Biz dərk etməliyik ki, Qarabağda yeni müharibə mütləq olacaq, bundan qaçmaq mümkün deyil. Biz İlham Əliyevin nə düşündüyünü, hansı manevrlər qurduğunu anlaya bilmirik, bunu analiz etmək də çətindir. Əliyev hərəkətə keçəcəksə, əmin olun ki, müharibədə onu uğur gözləyir. Biz düşünməməliyik ki, müharibə nə vaxt başlayacaq, biz bunun qaçılmaz olduğunu dərk etməliyik". A.Kananyan qeyd edib ki, Ermənistanın daxilindəki problemlər Azərbaycanın əlini gücləndirir.
Təhlillər də göstərir ki, Ermənistanın daxilindəki problemlər də Qarabağ cəbhəsində vəziyyətin gərginləşməsində az rol oynamır. Ermənistandakı mövcud iqtidar artan daxili gərginlikdən diqqəti yayındırmaq üçün yenə cəbhə təxribatlarına üstünlük verir. Rusiya İctimai Palatasının üzvü, Kremlə yaxınlığı ilə tanınan politoloq Sergey Markov da bunu təsdiq edir. O, "moscow-baku" portalına açıqlamasında deyir: "Apreldə "dördgünlük müharibə"dən sonra bağlı qapılar arxasında münaqişənin həlli ilə bağlı aktiv danışıqlar başlandı. Danışıqlar masasında "Kazan düsturu" adlanan həll variantı var idi. Lakin Ermənistanın daxilindəki siyasi vəziyyət bu razılıqların reallaşmasına mane oldu".
Onun sözlərinə görə, avqustun 10-da Moskvada Putin və Sarkisyanın görüşündə münaqişənin həlli prosesi yeni mərhələyə keçməyə başladı: "Azərbaycan rəhbərliyi qarşısına iki yol qoymuşdu. Ya aprel müharibəsində olduğu kimi hərəkət etmək, ya da diplomatik təşəbbüsləri aktivləşdirmək. Bu gün apardığımız müşahidələr onu deməyə əsas verir ki, Bakı ikinci yolu tutub və sülh danışıqlarını aktivləşdirmək qərarını verib. Hazırda görünən odur ki, Azərbaycan rəhbərliyi daha çox sülh xarakterli bəyanatlarla çıxış edir. Ermənistan isə danışıqları yavaşlatmağa cəhdlər edir. Prezident İlham Əliyev konkret təkliflər irəli sürür, sonuncu dəfə Qarabağa muxtariyyət statusu verə biləcəklərini açıqladı. Azərbaycan həm də göstərir ki, o, müharibə yox, sülh istəyir". Markov əlavə edib ki, bu gün həm Azərbaycan, həm də ATƏT-in Minsk Qrupunun həmsədrləri tərəfindən səslənən bütün bəyanatlar Ermənistanı qərar verməyə məcbur edir: "Ermənistan rəhbərliyi danışıqlar masasındakı təkliflərlə razılaşmır, çünki hakimiyyətlə vidalaşacaqlarından qorxurlar. Həmsədrlər isə Ermənistana anlatmağa çalışır ki, təkliflər tamamilə onun ziyanına deyil, əksinə, müsbət məqamlar var".
S.Markov diqqətə çatdırıb ki, Dağlıq Qarabağ münaqişəsi ABŞ, Avropa Birliyi və Rusiyanın mövqelərinin bir-birinə kifayət qədər yaxın olduğu nadir münaqişələrdəndir: "Bu baxımdan, Ermənistanın münaqişəni həll etmək istəməməsi bütün tərəfləri qıcıqlandıra bilər. Amerikalı həmsədr Ceyms Uorlikin regiona səfəri zamanı verdiyi açıqlamalar da buna mesaj idi. Amerikalı diplomat demək istəyirdi ki, erməni tərəfinin qeyri-konstruktiv addımları diplomatik prosesi dayandıra bilər. Belə olan halda isə onu iqtisadi sanksiyalar gözləyir. Çünki bu gün Rusiya, Avropa Birliyi və ABŞ Ermənistana iqtisadi yardımlar edir. İstisna deyil ki, onlar köməyi tədricən azaldacaq, beləliklə, ölkə rəhbərliyini danışıqlar masasına əyləşməyə məcbur edəcəklər. Bunun əksi olacaqsa, o zaman aprel müharibəsi təkrarlana bilər". Rusiyalı politoloq həmsədrlərin "bütün təkliflər paket şəklində müzakirə edilməlidir" açıqlamasında yeni heç nəyin olmadığını vurğulayıb: "Bu o deməkdir ki, rayonlar qaytarılacaq, əvəzində sərhədlər açılacaq və Azərbaycan hərbi təşəbbüsləri kənara qoyacaq. Bölgədə təhlükəsizlik ATƏT missiyası tərəfindən qorunacaq".
Nahid SALAYEV