"Bu və digər amillər beynəlxalq təşkilatların Ermənistanın işğal olunmuş ərazilərdə hərbi təlimlər keçirməsini görməzdən gəlməsinə səbəb olur"
Ermənistan silahlı qüvvələri Azərbaycanın işğal edilmiş ərazilərində təlimlər keçirir. Belə ki, erməni silahlı qüvvələri Tərtər istiqamətində cəbhə xətti boyu ağır artilleriyadan istifadə edərək genişmiqyaslı təlimlər keçirir. Artilleriya səsləri Tərtərdə və yaxın rayonlarda eşidilir. Bərdədə səfərdə olan Avropa İttifaqının Cənubi Qafqaz üzrə xüsusi nümayəndəsi bu barədə məlumatlandırılıb.
Bütövlükdə Ermənistan dəfələrlə bənzər hərbi təlimlər keçirib. Ermənistan prezidenti Serj Sarkisyan Dağlıq Qarabağa, Ağdama, Kəlbəcərə dəfələrlə gəlib, oralarda hərbi təlim keçirmək barədə əmr verib, bəzilərində özü iştirak edib.
Sonuncu dəfə ermənilər Dağlıq Qarabağın ərazisində 2014-cü ildə hərbi təlim keçirmişlər. Aprel döyüşlərindən sonra isə isə bu təlimlər sistematik xarakter alıb. Ağdam ərazisindəki hərbi təlimlər zamanı və sonra baş verən proseslər hamının yadındadır. Bu hadisələr aprel müharibəsinə gətirib çıxardı.
O da məlumdur ki, işğal olunmuş ərazilərlə bağlı BMT Təhlükəsizlik Şurasının 4 qətnaməsi var. Bu baxımdan həmin ərazilərdə hərbi təlimlər keçirilərkən beynəlxalq təşkilatlar buna öz etirazını bildirməlidir. Ancaq indiyə qədər ATƏT-in Minsk Qrupu həmsədrləri işğal olunan ərazilərdə hərbi təlimlərə etiraz etməyib.
Məsələyə münasibət bildirən tarix elmləri üzrə fəlsəfə doktoru Məhərrəm Zülfüqarlının sözlərinə görə, həmsədrlər məqsədyönlü şəkildə buna öz münasibətini bildirmir: "Çünki həmsədrlərin münaqişəni həll etmək niyyəti yoxdur. Onların belə bir niyyəti olsaydı, çoxdan münaqişə həll olunardı. Ən başlıcası, Ermənistanın işğalçılıq hərəkətlərini müəyyən mənada cilovlayardılar. Təəssüflər olsun ki, həmsədrlər bunu etmək əvəzinə, biri Ermənistana silah verir, digəri isə maliyyə yardımı göstərir. Başqa bir tərəfdən, hər üç həmsədr ölkə xristin dövləti olduğu üçün Ermənistanın mənafeyindən çıxış edirlər. Digər mühüm səbəb ondan ibarətdir ki, aparıcı dövlətlərin maraqları regionda toqquşduğu üçün, işğalçı tərəfə təzyiq göstərilmir. Tərəflər Dağlıq Qarabağ münaqişəsinin həlli ilə bağlı tələsmir. Bax, bu və digər amillər beynəlxalq təşkilatların Ermənistanın işğal olunmuş ərazilərdə hərbi təlimlər keçirməsini görməzdən gəlməsinə səbəb olur". Vidadi ORDAHALLI