Ağa Seyidli: "Bunun da başlıca səbəbi yürüdülən doğru dövlət siyasətidir"
Mətbuatda Prezident Administrasiyasının rəhbəri akademik Ramiz Mehdiyevin geniş məqaləsi dərc edilib. Çox geniş spektri əhatə edən həmin məqalədə dünyanı bürüyən terror kimi təhlükəli tendensiya və onun yaratdığı fəsadlardan da bəhs olunub.
Akademik təhlilində belə qənaətə gəlir ki, terrordan ən çox əziyyət çəkən müsəlman ölkələridir. Bununla mübarizə aparmaq üçün tolerantlıq mühitinin bərqərar olmasının vacibliyi vurğulanır. Məqalədə xüsusi olaraq Azərbaycandakı multikultural və tolerant mühit yaxşı nümunə kimi göstərilir. Akademik Ramiz Mehdiyev qeyd edir ki, müstəqil ölkəmiz Prezident İlham Əliyevin rəhbərliyi ilə keçid dövrünün çətinliklərini inamla dəf edərək ictimai-siyasi inkişafın, iqtisadiyyatın modernləşdirilməsinin, Azərbaycan xalqının milli mənlik şüurunun yüksəlməsinin yeni fazasına qədəm qoyub: "Xalqımızın əzəli, permanent xüsusiyyəti olan multikulturalizm bütün dövrlərdə, hətta ən dramatik mərhələlərdə də dünyanın hər yerində müxtəlif xalqların nümayəndələri ilə ortaq dil tapmağa və ən başlıcası, öz yurdunda millətlərarası sülh və rifah vahəsi yaratmağa imkan verib. Prezident İlham Əliyevin qeyd etdiyi kimi, "Bizim siyasətimiz bundan ibarətdir, eyni zamanda, bizim tariximiz multikulturalizm əsasında qurulubdur. Düzdür, multikulturalizm bir anlayış olaraq yeni bir ifadədir, ancaq bu, həmişə Azərbaycanda olub. İctimai-siyasi quruluşdan asılı olmayaraq, Azərbaycan bütün dövrlərdə sülh, əməkdaşlıq, qarşılıqlı anlaşma məkanı olmuşdur və biz bu ənənələri yaşadırıq. Bu gün biz müstəqil dövlət kimi belə tədbirlərin keçirilməsi ilə multikulturalizmin inkişafına öz töhfəmizi veririk və Azərbaycanda aparılan siyasət bu müsbət meylləri gündəlik həyatda gücləndirir.
... Təsadüfi deyil ki, Azərbaycanda bu il "Multikulturalizm ili" elan edilmişdir. Bakıda Beynəlxalq Multikulturalizm Mərkəzi yaradılmışdır. Dövlət Bayrağı Meydanının, - bu bayraq dövlətçiliyimizin rəmzidir, - yaxınlığında multikulturalizmə abidə ucaldılmışdır.
Biz hesab edirik ki, bu məsələ daim diqqət mərkəzində olmalıdır. Beynəlxalq təşkilatlar, ayrı-ayrı ölkələr bu məsələ ilə bağlı öz mövqeyini bildirməlidirlər. Çünki bu gün əfsuslar olsun ki, dünyanın müxtəlif yerlərində multikulturalizmlə bağlı fərqli, bədbin fikirlər səslənir. Bəziləri hesab edir ki, multikulturalizm iflasa uğrayıb, bəziləri, ümumiyyətlə, hesab edir ki, belə bir meylə yol vermək olmaz, bu, zərərlidir. Bu, çox təhlükəli fikirlərdir, yanaşmalardır".
Məqalədə qeyd edildiyi kimi, terrordan ən çox müsəlman ölkələri əziyyət çəkir. Bu vəziyyətin yaranmasına səbəb nədir?
Ekspert Ağa Seyidli qəzetimizə açıqlamasında bildirdi ki, müsəlman ölkələrinin terrordan əziyyət çəkməsinin obyektiv səbəbləri var: "Bura bir sıra amilləri əlavə edə bilərik. Görürsünüz ki, bu zəmində olan toqquşmalar və terror dalğası daha çox Yaxın Şərqdə tüğyan edir. Həmin vəziyyətin yaradılmasında maraqlı olan qüvvələr var. Deyilən ərazilər təbii ehtiyatlarla çox zəngindir. Geopolitik cəhətdən də önəmli yerdə yerləşən bölgədə superdövlətlərin maraqları toqquşur. Məhz bu səbəbdən də həmin ərazilərə tam nəzarəti ələ keçirmək üçün dini zəmində toqquşmalar yaradılır. Vəziyyət o həddə çatıb ki, terrorların çoxu islam adı ilə edilir. Artıq dünyada islam dini ilə bağlı fərqli fikir formalaşır. Ancaq bilinməlidir ki, islam terrorun yox, sülhün, əminamanlığın yolunu göstərən dindir. İraq, Suriya, Əfqanıstanın ardınca terrorun trayektoriyasını Türkiyəyə keçirməyə cəhd etdilər. Türkiyədə bir necə dəfə terror hadisələri baş verdi. Özlərini partladan kamikadzelərin islama aidiyyəti olduğu bildirilirdi. Sanki belə bir tendensiya formalaşdırılır ki, müsəlmanlar bir-birini qırır. Bəli, bu gün bəzi qüvvələrin təhriki və istəyilə müsəlman ölkələrinin çoxu terrorun plasdarmına çevrilib. Amma ortada bir Azərbaycan nümunəsi də var. Biz də müsəlman ölkəsiyik. Şükürlər olsun ki, bu sarıdan problem yaşamırıq. Bunun da başlıca səbəbi yürüdülən doğru dövlət siyasətidir".
Məhəmmədəli QƏRİBLİ