Üzeyir Cəfərov: "Hətta bir qarış torpağı belə Azərbaycana verməyəcəklərini bildirirlər"
Məlumdur ki, Azərbaycan-Ermənistan təmas xəttində 2-5 aprel tarixlərindəki döyüşlər vəziyyəti kökündən dəyişdi. Üstünlüyün Azərbaycan tərəfində olduğu açıq şəkildə özünü büruzə verdi. Aprel döyüşləri zamanı düşmənə bir sıra zərbələr endirildi və strateji baxımdan müəyyən yüksəkliklər işğaldan azad edildi.
Həmçinin məlum döyüşlərdən sonra diplomatik cəbhədə ciddi canlanma müşahidə olunmağa başladı. Başda Rusiya olmaqla, digər həmsədrlər də münaqişənin həlli ilə bağlı müəyyən səylər göstərdilər. Ancaq bəlli bir müddətdən sonra yenə də işğalçı tərəf hərbi ritorikaya əl atmağa başladı. Eyni zamanda, son dövrlər ATƏT-in Minsk Qrupu həmsədrlərinin fəaliyyəti daha çox atəşkəsin qorunmasına hesablanıb.
Həmçinin, son günlər erməni tərəfi atəşkəsi daha tez-tez pozaraq təxribata əl atır. Oktyabrın 26-da axşam saatlarında Ermənistan Silahlı Qüvvələrinin bölmələri, mürəkkəb iqlim şəraitindən istifadə edərək, cəbhənin cənub istiqamətində mövqelərimizə yaxınlaşmaqla təxribat törətməyə cəhd göstərib. Düşmən tərəfinin fəaliyyəti əvvəlcədən aşkar edilərək ona qarşı qabaqlayıcı atəş zərbələri vurulub. Ölü və yaralı olaraq itki verən düşmən geri çəkilməyə məcbur edilib. MQ-nin sülh təşəbbüslərinin artdığı bir vaxtda ermənilərin müxtəlif hücum və təxribat planlarının da artması göz qabağındadır.
Məsələyə münasibət bildirən hərbi ekspert Üzeyir Cəfərovun sözlərinə görə, Ermənistan Azərbaycan torpaqlarını sülh yolu ilə verməyəcəyi təqdirdə müharibənin olacağı qaçılmazdır: "Dağlıq Qarabağda müharibə risqi hər an mövcuddur. Müharibəyə başlamaq və öz ərazilərini işğaldan azad etmək Azərbaycanın haqqıdır. Bu qərarın nə vaxt reallaşacağını deyə bilmərəm. Hər halda bu qərarı ölkə rəhbərliyi qəbul edir. Ancaq hesab edirəm ki, bu qərar mütləq olmalıdır. Çünki Ermənistan öz havadarlarının köməyilə Azərbaycan torpaqlarını işğaldan azad etməyə hazırlaşmır. Hətta bir qarış torpağı belə Azərbaycana verməyəcəklərini bildirirlər. Bu isə o deməkdir ki, aprel əməliyyatlarının davamı olacaq. Digər tərəfdən, aprelin əvvəlində Ermənistanı düşdüyü ağır vəziyyətdən xilas edən məhz Rusiya oldu. Lakin Rusiya öz sözünün üstündə durmadı. Biz gözləyirdik ki, Rusiya işğal olunmuş ərazilərin tezliklə boşaldılması ilə bağlı bir qərar verməsi üçün Ermənistanı başa salacaq. Ancaq bu baş vermədi. Hətta ABŞ-ın dövlət katibi Con Kerri Ermənistana dəstək verən bəyanatla çıxış edərək bildirdi ki, Dağlıq Qarabağ münaqişəsinin həlli hazırda gündəmdə deyil. Yəni Azərbaycanda o qədər də aktivlik olmasın".
Vidadi ORDAHALLI