Arzu Nağıyev: "Geosiyasi məsələlərin həlli məhz Azərbaycanla bir yerdə həyata keçirilir"
Ankara üçtərəfli əməkdaşlıq formatlarının sadəcə iqtisadi deyil, siyasi nəticələr verməsini də gözləyir. Bunu müsahibəsində Türkiyənin Azərbaycana yeni təyin edilmiş səfiri Erkan Özoral deyib. Səfirin sözlərinə görə, üçtərəfli formatlar üç ölkə arasında siyasi və iqtisadi əlaqələri yeni səviyyəyə çıxararaq, regional inkişafa ciddi dəstək verəcək.
Azərbaycan və Türkiyənin digər ölkələrlə həyata keçirdiyi üçtərəfli əməkdaşlıq formatlarının əhəmiyyətini qeyd edən diplomat bildirib ki, belə formatda əməkdaşlıq ölkələrin xalqlarına daha böyük fayda verəcək: "Bunun ən yaxşı nümunəsi Gürcüstanla olan üçtərəfli formatdır. Bakı-Tiflis-Ceyhan neft, Bakı-Tiflis-Ərzurum qaz kəmərlərinin üç ölkəyə qazandırdığı ortadadır. İnşası davam edən və yaxın zamanlarda tamamlanması gözlənilən Bakı-Tiflis-Qars dəmir yolu layihəsinin üç ölkəyə, həmçinin, bütün Avrasiyaya fayda verəcəyi hamıya məlumdur".
E.Özoral diqqətə çatdırıb ki, eyni formatda İranla əməkdaşlıq da hər üç ölkənin xalqlarının xeyrinə olacaq.
Səfirin sözlərinə görə, Türkiyənin Orta Asiyaya gedən yolları diversifikasiya etməsi ilə Azərbaycan bu istiqamətdə əsas məntəqə olacaq: "Bütün bunlar Xəzər dənizindəki gəmi daşımaları, Ro-Ro səfərlər, regiondakı dəmir yolu daşımalarına müsbət təsir edəcək".
O əlavə edib ki, üçtərəfli əməkdaşlıq bir tərəfdən üçtərəfli iqtisadi əməkdaşlığın inkişafına dəstək verəcək, digər tərəfdən, üç ölkənin münasibətlərini gücləndirərək ölkələri siyasi baxımdan bir-birinə daha da yaxınlaşdıracaq: "Bütün bunlar regionda sülh və əminamanlığa çox böyük dəstək verəcək".
Diplomatın sözlərinə görə, son zamanlar Türkiyə, Azərbaycan və Rusiya arasında üçtərəfli əməkdaşlıq formatının yaradılması üzərində iş aparılır.
Səfirin qeyd etdiyi üçtərəfli əməkdaşlıq formatları hansı siyasi nəticələri verə bilər?
Politoloq Arzu Nağıyev qəzetimizə bildirdi ki, bu ittifaqa daha çox iqtisadi bir layihə kimi baxılırdı: "Əməkdaşlıq formatı deyəndə yalnız o nəzərdə tutulurdu. Ancaq, göründüyü kimi, diplomat bunu siyasi perspektivi olan bir əməkdaşlıq formatı kimi şərh edib. Bu ideyanı ölkə başçıları dəfələrlə səsləndirib. Rusiyada səfərdə olan zaman Türkiyə prezidenti Rəcəb Tayyib Ərdoğan rusiyalı həmkarı Vladimir Putinlə görüşündən sonra keçirilən mətbuat konfransında belə bir məsələnin müzakirə olunduğunu və üçtərəfli formatın yaradılması mexanizminə müsbət baxdığını bildirib. Azərbaycanın belə bir əməkdaşlıq formatında təmsil olunması mühüm bir məsələdir. İlk növbədə qeyd edilməlidir ki, son vaxtlar Azərbaycan-Türkiyə-Gürcüstan, Azərbaycan-Rusiya- İran kimi formatlarda da dövlətimiz təmsil olunur. Yəni regional problemlərin həllində dövlətimizin iştirakı təmin olunur və avtomatik olaraq Ermənistan bu proseslərdən təcrid olunur. Bu isə prioritet problem olan Dağlıq Qarabağ münaqişəsinin həllində mühüm rol oynaya bilər. Yəni geosiyasi məsələlərin həlli məhz Azərbaycanla bir yerdə həyata keçirilir.
Türkiyə və Rusiya da iqtisadi məsələlərin həllində, o cümlədən "Şimal-Cənub" dəhlizinin yaradılmasında və inkişafında Azərbaycanın iştirakını və mühüm rolunu dəstəkləyir. Bundan başqa, Türkiyə Xəzərin statusunun tezliklə həll olunmasında maraqlıdır və bununla Türkmənistan qazının nəqlində iştirak edə bilər. Hərbi əməkdaşlığa gəldikdə isə, NATO üzvü olan Türkiyə və digər blokda təmsil olunan Rusiya ilə bir yerdə olmaq Azərbaycan və onun təhlükəsizliyinə təhdidlərin qarşısının alınması üçün vacib və önəmli bir məsələdir. İran da bu formatda təmsil olunsa, Azərbaycan üçün və ümumiyyətlə region üçün önəmlidir".
Məhəmmədəli QƏRİBLİ