Qərb ölkələri ilə Rusiya arasında hərbi gərginlik getdikcə daha da yüksəlir. Rusiyanın beynəlxalq arenada ciddi təhlükə kimi baxılan hərbi hərəkətliliyi Avropa üçün də ciddi təhlükə yaradır və NATO ölkələri buna qarşı Şərqi Avropadakı varlığını artırmaq barədə razılığa gəlib.
Rusiya ilə Qərbi qarşı-qarşıya gətirən bu barədə qərar NATO ölkələrinin müdafiə nazirlərinin Brüsseldə iki günlük toplantısında verilib. Toplantıda Baltik və Polşaya minlərlə əsgər və hərbi texnika göndərmək barədə qərar verilib. NATO 2017-ci ilin iyul ayından etibarən Avropanın Rusiya sərhədinə müasir hərbi birliklər yerləşdirməyə başlayacaq.
“CNN International” xəbər verir ki, İngiltərə NATO qərarından dərhal sonra Rusiya sərhədinə yüzlərlə əsgər göndərəcəyini açıqlayıb. “Soyuq müharibə”dən bu yana ən böyük güc nümayişi” kimi təqdim olunan xəbərdə, İngiltərənin 2017-ci ildə Rumıniyaya “Typhoon” döyüş təyyarələrini də göndərəcəyi bildirilir.
İngiltərə müdafiə naziri Maykl Fallon Estoniyaya 800 əsgər göndəriləcəyini təsdiqləyib və 150 əsgərin ilk etapda yola çıxacağını deyib.
“The Times” yazır ki, NATO Rusiya sərhədinə “Soyuq müharibə”dən bu yana ən böyük hərbi qüvvə yığmağa hazırlaşır. Qəzetə görə, İngiltərə Estoniya və Rumıniyadakı bazalara döyüş təyyarəsi, tank və əsgər göndərəcək. Qəzet daha sonra yazır: "Rusiya, bu həftə yeni qitələrarası ballistik raketin ilk görüntülərini yayaraq vəziyyəti daha da gərginləşdirdi. NATO fevral ayında müdafiə nazirləri konfransında, Türkiyənin Qara dənizin rus gölünə çevrildiyi barədə xəbərdarlığının ardından verdiyi qərarın icrasına başlayır".
NATO qanadında bu proseslərin yaşandığı bir vaxtda Rusiya prezidenti Vladimir Putin başqa bir ölkəyə hücum planlarının olmadığını bəyan edib.
Qeyd edək ki, Rusiya 2018-ci ildə istehsalına başlamağı planlaşdırdığı RS-28 “Sarmat” adlı yeni raketin bir neçə gün əvvəl görüntülərini yayıb. “Satan 2” kod adlı raket 11 min kilometrdən çox məsafəni qət edə və daşıdığı 10 tonluq başlıqla Fransanı yox etmək gücünə sahibdir.
Bundan başqa, Suriyada Əsəd rejiminin əsas müdafiəçisi olan Rusiya Şərq Aralıq dənizinə tez-tez döyüş gəmiləri göndərir və Aralıq dənizi sahilində raketdən müdafiə etmə sistemləri yerləşdirib. Bir neçə gün əvvəl isə Şimali dənizindən yola çıxan “Admiral Kuznetsov” təyyarə gəmisinin başçılıq etdiyi Rusiya hərbi donanması Suriyaya gedərkən İngiltərə sahillərindən keçdi və bu Qərblə Rusiya arasında gərginliyi daha da artırdı.
Son proseslər onu göstərir ki, Qərb ölkələrinin əsas hərbi təşkilatı NATO Rusiyaya qarşı mövqelərini daha da sərtləşdirməyə qərar verib.
Bundan bir müddət əvvəl ABŞ Müdafiə Nazirliyinin rəsmisi Rusiyanın Baltik bölgəsindəki hərbi qüvvələrinin NATO qüvvələrindən daha çox olduğunu bildirmişdi. ABŞ rəsmisi Rusiyanın bu güc üstünlüyü ilə Baltiki 60 günə keçə biləcəyi xəbərdarlığını edərək, bunun qarşısını almaq üçün 2017-ci il büdcəsinin ciddi şəkildə artırılmasının vacibliyini bildirmişdi. Məhz bu çağırışdan sonra Pentaqon, 2017-ci ilin üçün Avropadakı xərclərə ayrılacaq büdcənin 4 qat artırılması barədə qərar verdi.
TAHİR