Zahid Oruc: "Əli Həsənovun Prezidentin köməkçisi kimi Türkiyə səfərinin əhəmiyyətini qarşıdakı günlərdə hiss edəcəyik"
Azərbaycan Respublikasının Prezidenti İlham Əliyevin tapşırığı ilə Türkiyə Respublikasında səfərdə olan Prezidentin ictimai-siyasi məsələlər üzrə köməkçisi Əli Həsənov oktyabrın 25-də bir sıra görüşlər keçirib.
Türkiyə Prezidentinin sözçüsü İbrahim Kalın, Baş nazirin müavinləri Toğrul Türkeş və Numan Kurtulmuş ilə görüşlərdə Azərbaycan-Türkiyə strateji münasibətlərində yüksələn xətlə xarakterizə olunan inkişafın əhəmiyyəti, mətbuat və informasiya sahəsində əlaqələrin perspektivləri, həmçinin qarşılıqlı maraq doğuran digər məsələlər barədə müzakirələr aparılıb. Azərbaycanın Türkiyədəki səfiri Faiq Bağırov görüşlərdə iştirak edib.
Əli Həsənovun səfəri çərçivəsində iki ölkə arasında strateji əməkdaşlığın genişlənməsi istiqamətində keçirilən görüşlərin ölkələrimiz üçün nə kimi xeyri olacaq?
Millət vəkili Zahid Orucun sözlərinə görə, Ə.Həsənovun Türkiyə səfəri Azərbaycan dövləti ilə Türkiyə arasında uzun illər davam edən strateji dostluğun, qardaşlığın təzahürüdür: "Bir sıra məsələlər var ki, bir az da məxfi xarakter daşıya bilər. Əli Həsənov regionda baş verən prosesləri yaxşı bilir. Fətullah Gülən məsələsi ilə bağlı Türkiyənin yaşantıları, onun Azərbaycanla bağlı tərəfləri bu dövr ərzində iki ölkənin siyasi elitası və hökumət təmsilçiləri arasında geniş müzakirə predmeti olub. Bu o deməkdir ki, müzakirə üçün çox mühüm məsələlər var. Bunlar cəmiyyətə və mediaya çıxmaya bilər. Amma bunların ətrafında hər iki ölkənin rəhbərliyi mövqelərini uzlaşdırır. Bu çox yaxşı haldır. Əli Həsənovun görüş keçirdiyi şəxslərin əhatəsi onu göstərir ki, burada bir neçə mühüm məsələ var. Bu da iki ölkə arasındakı strateji əməkdaşlığın yüksək nümunəsi sayıla bilər. Hesab edirəm ki, hər iki ölkə üçün önəmli mahiyyət daşıyan müzakirələrdir. Əli Həsənovun Prezidentin köməkçisi kimi Türkiyə səfərinin əhəmiyyətini qarşıdakı günlərdə hiss edəcəyik".
Məhəmmədəli QƏRİBLİ