Qabil Hüseynli: "Azərbaycana təzyiq etmək üçün isə hüquqi əsasları yoxdur"
Azərbaycan Prezidenti İlham Əliyev Xorvatiya prezidenti Kolinda Qrabar-Kitaroviç ilə görüşdən sonra mətbuata bəyanatında deyib ki, beynəlxalq ictimaiyyət Ermənistanı bizə məxsus olan əraziləri heç bir şərt irəli sürmədən geri qaytarmağa məcbur etməlidir.
O bildirib ki, Dağlıq Qarabağ münaqişəsinin tənzimlənməsi ilə bağlı Azərbaycan və Ermənistan prezidentləri arasında danışıqların hazırkı vəziyyəti barədə Xorvatiya prezidentinə məlumat verib: "Təəssüf ki, uzun illərdir torpaqlarımız işğal altındadır. Azərbaycan ərazisinin 20 faizi, təkcə Dağlıq Qarabağ deyil, həm də Dağlıq Qarabağ Muxtar Vilayəti ətrafındakı 7 rayon işğal olunub. Bu işğal nəticəsində bizim 1 milyondan artıq qaçqın və məcburi köçkünümüz var. Xalqımız Ermənistan tərəfindən etnik təmizləmə siyasətinə məruz qalıb. Beynəlxalq təşkilatlar mühüm qərar və qətnamələr qəbul ediblər. Xüsusən BMT Təhlükəsizlik Şurası Ermənistan qoşunlarının Azərbaycan ərazilərindən dərhal, tam və qeyd-şərtsiz çıxarılmasını tələb edən 4 qətnamə qəbul edib. Bu qətnamələr 20 ildən artıqdır ki, kağız üzərində qalır".
Prezident xatırladıb ki, Avropa Parlamenti, Avropa Şurası, İslam Əməkdaşlıq Təşkilatı, Qoşulmama Hərəkatı kimi təşkilatlar da oxşar sənədlər qəbul edib: "Lakin təəssüf ki, münaqişə həll olunmur. Çünki Ermənistan sülh istəmir, status-kvonu dəyişməz olaraq saxlamaq istəyir. Ermənistan ATƏT-in Minsk Qrupunun həmsədri olan ölkələrin - ABŞ, Rusiya və Fransa prezidentlərinin status-kvonun qəbuledilməz olması ilə bağlı bir neçə dəfə açıq şəkildə verdikləri bəyanata qulaq asmaq istəmir. Bu, status-kvonu dəyişməz olaraq saxlamaq istəyən və təkcə BMT Təhlükəsizlik Şurasının qətnamələrinə, beynəlxalq davranış normalarına deyil, həm də dünyanın 3 aparıcı ölkəsinin liderlərinin bəyanatlarına məhəl qoymayan Ermənistan rəhbərliyinə birbaşa mesajdır. Bu, qəbuledilməzdir. Beynəlxalq ictimaiyyət Ermənistanı beynəlxalq hüquqa riayət etməyə və onlara məxsus olmayan, bizə məxsus olan əraziləri heç bir şərt irəli sürülmədən azad etməyə məcbur etməsi üçün ciddi tədbirlər görməlidir. Münaqişənin həlli Azərbaycanın bütün dünya tərəfindən tanınmış ərazi bütövlüyünə əsaslanmalıdır. Dünyada heç bir ölkə, o cümlədən Ermənistan Dağlıq Qarabağın bu oyuncaq rejimini tanımır".
Prezident İlham Əliyevin beynəlxalq ictimaiyyətə Ermənistanı bizə məxsus olan əraziləri heç bir şərt irəli sürmədən geri qaytarmağa məcbur etməklə bağlı etdiyi müraciətdən hansı nəticələr çıxarılmalıdır?
Politoloq Qabil Hüseynli hesab edir ki, Ermənistana təzyiqi konkret olaraq hansısa ölkənin üzərinə atmaq doğru deyil:
"Sadəcə olaraq bu məsələ ATƏT çərçivəsində həll edilməlidir və Rusiya təkbaşına qərar verə bilməz. Bir müddət Qarabağa dair bütün danışıqlar prosesi dayandırıldı. İndi aktivləşmə var. Hiss olunur ki, həmsədr dövlətlərdən hər biri özünün geosiyasi əhəmiyyətini göstərmək üçün prezidentlərin görüşünü təşkil etmək istəyir. Həm də sülhyaratma prosesində öz rollarını isbatlamağa çalışırlar. Amma qəliz də olsa, Ermənistanın bu məsələdə razı salındığı hiss olunur. Çünki Rusiya mətbuatına diqqət verdikdə, bunu müşahidə edə bilərik. Deməli, müəyyən proseslər gedir, qarşı tərəfin Azərbaycandan istədikləri var. Əlbəttə, beş rayonun qaytarılması bizi tam qane etməsə də, Ermənistanda etiraz doğursa da, hər halda, hansısa irəliləyişin olacağına dair ümidlər var. Bu vaxta kimi ermənilərə yardımları ABŞ, Fransa, Avropa İttifaqı verib. Rusiyadan isə silah alıblar. Ermənistana təzyiq etmək istəmirlər, Azərbaycana təzyiq etmək üçün isə nə imkanları, nə də hüquqi əsasları var. Bu baxımdan da İlham Əliyevin mövqeyini doğru hesab edirəm. Dünya birliyi, xüsusilə də həmsədr ölkələr bu məsələdən nəticə çıxarmalıdır".
Məhəmmədəli QƏRİBLİ