Vəfa Heydərli: "Çünki Azərbaycan Prezidenti indiyə qədər davam edən danışıqlar prosesində konstruktivlik nümayiş etdirib"
ATƏT-in Minsk Qrupunun amerikalı həmsədri Ceyms Uorlik Bakıda keçirdiyi mətbuat konfransında deyib ki, ölkəsi sülh prosesinə sadiqdir:
"Bir müddət əvvəl ABŞ dövlət katibi Con Kerri NATO toplantısı çərçivəsində tərəflərlə görüşüb və müzakirələr aparıb. Bölgədə yaşayan hər bir xalqın marağındadır ki, Dağlıq Qarabağ münaqişəsinin razılaşdırılmış həlli tapılsın. ABŞ-ın bu məsələyə sadiqliyi şübhə altında olmamalıdır. Münaqişə tərəfləri məsələnin sülh yolu ilə davamlı həllinin tapılması istiqamətində öhdəliklərini nümayiş etdirməlidir.
Mən şəxsən Azərbaycan Prezidenti İlham Əliyevlə danışmışam və o bildirib ki, danışıqlar prosesinə və münaqişənin sülh yolu ilə həlli prinsiplərinə sadiqdir. O, gələcəkdə də görüşməyə və masa üzərində olan təkliflərə baxmağa hazırdır. Vyana və Sankt-Peterburq görüşlərində də prezidentlər öz öhdəliklərini nümayiş etdirib".
Bu açıqlamadan bəlli olur ki, ABŞ-ın mövqeyində bir təzad mövcuddur. Çünki bundan əvvəl Kerri açıqlamasında ölkə başçılarının həll prosesinə hazır olmadıqlarını deməklə məsuliyyətləri bərabərləşdirmişdi. ABŞ həmsədrinin bu açıqlaması əslində Kerriyə konkret cavab kimi də başa düşülə bilər.
Politoloq Vəfa Heydərli qəzetimizə açıqlamasında bildirdi ki, ABŞ-ın mövqeyindəki haçalanma özünü açıq büruzə verir:
"Kerrinin məlum açıqlamasına ölkə olaraq tərəfimizdən çox sərt münasibət bildirildi. Bunun ardınca Rusiya rəsmisinin də oxşar bəyanat səsləndirməsi prosesin təsadüfən yaşanmadığına sübut oldu. Təbiidir ki, ölkəmiz bu məsələyə münasibət açıqlayanda bizim torpaqları azad etmək haqqımız olduğunu bəyan etdi. Biz görəndə ki, hər iki həmsədr yaxasını prosesdən kənara çəkmək istəyir, təbii ki, müharibə variantını istisna etmədiyimizi bəyan etməliydik. Bu da həmin ölkələrə sərf etmir. Hesab edirəm ki, ABŞ-ın rəsmi mövqeyində olan korrektə bizim sərt münasibətimizdən irəli gəldi. İkinci bir tərəfdən isə, həmsədr həqiqəti ifadə edib. Çünki Azərbaycan Prezidenti indiyə qədər davam edən danışıqlar prosesində konstruktivlik nümayiş etdirib. İstənilən danışığa razı olduğunu bəyan edib. Bu baxımdan da həmsədr anlayır ki, passivliyi Ermənistanda axtarmaq lazımdır. Həmin ittihamın bizə zərrə qədər də aidiyyəti yoxdur".
Məhəmmədəli QƏRİBLİ