Fikrət Sadıqov: "Bizim həmin birliyə qatılmağımız Moskvaya yalnız xeyir gətirəcək"
"Azərbaycanın gələcəkdə Avrasiya İqtisadi Birliyinə daxil olmaq imkanlarını istisna etmək olmaz". Bu sözləri Azərbaycan Prezidenti İlham Əliyev Rusiya mətbuatına müsahibəsində deyib.
O bildirib ki, hələlik ölkə indiki statusda özünü inamlı hiss edir: "Bu mövzuda söhbətlər həm ekspertlər arasında, həm də müxtəlif ölkələrin elitaları arasında çoxdan gedir. Belə deyim: prinsipcə, biz hazırda olduğumuz keyfiyyətdə özümüzü kifayət qədər inamlı hiss edirik. Ona görə də biz hələ baxmalıyıq ki, hansı tendensiyalar müşahidə olunacaq. Əlbəttə, əgər ittifaq cəlbedici olarsa, ora çoxları can atacaq. Yəni heç nəyi istisna etmək olmaz, lakin hazırkı mərhələni mən bu cür xarakterizə edərdim".
Dövlət başçısı Azərbaycanın Avrasiya məkanındakı prosesləri maraqla izlədiyini qeyd edərək, bu proseslərlə bağlı mürəkkəbliklər və müəyyən iradlar olduğunu da vurğulayıb: "Bu gün bizim Avrasiya İqtisadi Birliyinin üzvləri ilə iqtisadi əməkdaşlıq formatımız, eləcə də siyasi əməkdaşlığımız kifayət qədər möhkəmdir. İnteqrasiya yolu ilə getmək üçün, əlbəttə, motivasiya lazımdır. Bu, iqtisadi, sosial, siyasi və istənilən digər istiqamət üzrə ola bilər. Hazırda biz bu istiqamətdə çalışırıq".
Bütövlükdə siyasi ekspertlər Prezident İlham Əliyevin AİB-lə bağlı yanaşmasını necə şərh edir?
Sözügedən məsələni dəyərləndirən politoloq Fikrət Sadıqovun fikrincə, Azərbaycan regionda kifayət qədər inkişaf etmiş bir ölkəyə çevrildiyi üçün regionda müxtəlif layihələrin təşəbbüskarı rolunda çıxış edir: "Nəqliyyat və qaz sahəsində bir sıra layihələr gerçəkləşəcək. Hətta bu istiqamətdə müəyyən sazişlər də imzalanıb. Biz AİB-yə möhtac deyilik. Bizim ora daxil olmağımız birmənalı şəkildə gündəmdə deyil. Məhz onlar Azərbaycanla əməkdaşlıq etmək və ölkəmizi həmin ittifaqda görmək istəyir. Ona görə ki, bizim həmin birliyə qatılmağımız Moskvaya yalnız xeyir gətirəcək. Bax, reallıq budur. Biz kifayət qədər işlər görmüşük. Bir sıra irihəcmli layihələr həyata keçiririk. Həm də qonşu ölkələri - İranı, Gürcüstanı bu işlərə cəlb edirik. İrimiqyaslı nəqliyyat layihələri çərçivəsində Çindən, Qazaxıstandan Avropaya yüklər daşınacaq. Əlbəttə, biz heç vaxt deməmişik ki, o ittifaqa üzv olmayacağıq. Ermənistan istisna olmaqla, ora daxil olan ölkələrlə qarşılıqlı münasibətlərimiz çox yüksək səviyyədədir. Təbii ki, biz o ittifaqa milli maraqlarımızı təmin edən şərtlər çərçivəsində daxil ola bilərik".
Vidadi ORDAHALLI