"Həmin yoxlamalar əvvəlcədən müəyyən olunmuş qrafik üzrə aparılır və bütün məlumatlar mərkəzi ofisə ötürülür"
Avropada adi silahlar haqqında müqaviləyə uyğun olaraq, Türkiyə Ermənistana təftiş məqsədilə hərbi ekspertlər göndərəcək. Bu barədə Türkiyə Silahlı Qüvvələri Baş Qərargahına istinadən məlumat verilib. Türk mütəxəssislər Ermənistanda oktyabrın 22-dək təftiş aparacaq.
Türkiyənin bu prosesdə iştirakının Azərbaycan üçün hansı əhəmiyyəti var?
Hərbi ekspert Üzeyir Cəfərov qəzetimizə açıqlamasında bildirdi ki, bu məsələdə qeyri-adi nəsə yoxdur: "Adi prosedura uyğun qaydada bu yoxlama həyata keçiriləcək. Adətən belə yoxlamalar növbəlik prinsipləri əsasında həyata keçirilir. Bu dəfə də Türkiyə cəlb olunub. Hətta elə olur ki, erməni hərbçiləri Türkiyə ərazisində belə yoxlama aparır və ya başqa ölkələrin hərbçiləri bu yoxlamaya cəlb olunur. Həmin yoxlama zamanı əldə olunan materialları Türkiyə Azərbaycana verə bilməz. Azərbaycan buna baxmayaraq, çalışmalıdır ki, Ermənistana daha çox belə inspeksiyalar cəlb olunsun. Vacib deyil ki, ancaq Türkiyə olsun. Başqa ölkələr də yoxlaya bilər. Xüsusilə də çalışmalıyıq ki, Dağlıq Qarabağ ərazisində gizlədilən silahların monitorinqi aparılsın. Onda biz daha ciddi faktların üstünü açmış olarıq. Bir daha xatırladıram ki, Türkiyənin həmin missiya çərçivəsində artıq nəyəsə cəhd etməsi ciddi diplomatik qalmaqala səbəb ola bilər. Həmin yoxlamalar əvvəlcədən müəyyən olunmuş qrafik üzrə aparılır və bütün məlumatlar mərkəzi ofisə ötürülür. Ermənistanın silahlanma ilə bağlı kvotanı pozduğu faktdır, ancaq bunu gizlətməyi bacarırlar".
Məhəmmədəli QƏRİBLİ