Aqşin Əliyev: "Həmsədrlər yaxalarını kənara çəkdikdə, təbii ki, Azərbaycan alternativ vasitələr barədə düşünə bilər"
Məlum olduğu kimi, ATƏT-in Minsk Qrupunun həmsədr ölkələri ABŞ və Rusiya Dağlıq Qarabağ münaqişəsi ilə bağlı bədbin proqnozlar verərək, problemin həllinin mümkünsüzlüyünü bəyan ediblər. İlk olaraq ABŞ dövlət katibi Con Kerri bildirib ki, münaqişənin nizamlanması üçün hələlik şərait yaranmayıb.
Ardınca Rusiya tərəfi prezidentin köməkçisi Yuri Uşakovun dili ilə diqqətə çatdırıb ki, Kreml Dağlıq Qarabağ münaqişəsinin yaxın vaxtlarda həll olunacağına ümid etmir. Halbuki, Rusiyada aprel döyüşlərindən sonra ilin sonuna qədər 5 rayonun Azərbaycana qaytarılacağı haqda bəyanatlar səslənirdi.
ABŞ və Rusiyanın Qarabağa dair paralel ssenari üzrə pessimist bəyanatlar verməsi ortaya ciddi suallar çıxarmaqla yanaşı, eyni zamanda müəyyən mülahizələr üçün də şərait yaradır. Təsadüfi deyil ki, bəzi müstəqil ekspertlər həmsədrlərin bu cür davranışlarının müharibə risqini artırdığı haqda fikirlər səsləndirir. Həmsədrlərin bədbin bəyanatının müharibə risqinin artmasına nə kimi təsiri ola bilər?
Ekspert Aqşin Əliyevin sözlərinə görə, Kerrinin bəyanatına Azərbaycan çox ciddi reaksiya verdi: "Yadınızdadırsa, ölkənin ali siyasi rəhbərliyi səviyyəsində məsələyə sərt münasibət bildirilidi. Kerri məlum bəyanatı ilə sanki digər həmsədr ölkələrə mesaj göndərirdi ki, münaqişənin həlli indiki mərhələdə mümkün deyil. Çox vaxt keçmədən Rusiyadan, prezidentin köməkçisi Yuri Uşakovun timsalında oxşar bəyanat səsləndi. O da münaqişənin həlli ilə bağlı pessimist mövqe ifadə etdi. Nəzərə alaq ki, ABŞ və Rusiya münaqişənin həllində vasitəçi kimi əsas həlledici tərəflərdir. Hesab edirəm ki, Fransanın mövqeyi bu iki vasitəçidən önəmli ola bilməz.
ATƏT-in Minsk Qrupu həmsədrlərinin bu bəyanatları yaxşı nəsə vəd etmir. Vasitəçilik missiyasına olan inamı tam sarsıdır.
Hadisələrin bu gedişatı göstərir ki, ABŞ-da prezident seçkiləri keçirilənə qədər bu ölkədən münaqişənin həlli ilə bağlı hər hansı qətiyyətli mövqenin sərgilənməsini gözləməyə dəyməz. Rusiya tərəfi isə hazırda gözləmə mövqeyindədir. Belə yanaşmalar münaqişənin həlli imkanlarının tükəndiyi ilə bağlı təəssürat yaradır. Belə olan təqdirdə münaqişə tərəfləri nə etməlidir? Ermənistana, təbii ki, münaqişənin həllinin uzadılması sərf edir. Ancaq Azərbaycan status-kvo-nu dəyişməkdə maraqlıdır. Həmsədrlər yaxalarını kənara çəkdikdə, təbii ki, Azərbaycan alternativ vasitələr barədə düşünə bilər. Bütün bunlar müharibə risqini artırır".
Məhəmmədəli QƏRİBLİ