Ramil Hüseynov: "4 qətnamənin yerinə yetirilməməsi BMT-yə hörmət gətirmir"
Məlum olduğu kimi, Prezident İlham Əliyev Birləşmiş Millətlər Təşkilatının yeni seçilmiş baş katibi Antoniu Quttereşi təbrik edib.
Təbrikdə ölkə Prezidenti bir neçə məqama toxunmaqla yanaşı, yeni baş katibdən Dağlıq Qarabağla bağlı gözləntilərini də qeyd edib: "Biz, həmçinin, Azərbaycanın beynəlxalq birlik tərəfindən tanınmış ərazilərinin işğaldan azad olunması, qaçqın və məcburi köçkün vəziyyətinə düşmüş bir milyondan çox soydaşımızın doğma yurd-yuvalarına qayıtması, Ermənistan-Azərbaycan, Dağlıq Qarabağ münaqişəsinin beynəlxalq hüquq normaları əsasında sülh yolu ilə ədalətli həlli istiqamətində BMT-nin baş katibi kimi şəxsən Sizin səylərinizə böyük ümidlər bəsləyirik.
Bir daha Sizi təbrik edir, bəşəriyyət qarşısında duran qlobal problemlərin aradan qaldırılması, dünyada sülhün və təhlükəsizliyin bərqərar olunmasında mühüm və aparıcı rola malik BMT-nin baş katibi vəzifəsində Sizə uğurlar arzu edirəm".
Onu da qeyd edək ki, yeni baş katib mətbuata açıqlamasında dünyanın dəyişdiyini bildirib. Onun sözlərinə görə, münaqişələrin mövcudluğu ən çox qaçqınların və köçkünlərin əzab çəkməsinə səbəb olur: "Beynəlxalq ictimaiyyət münaqişələrin qarşısının alınması və həlli üzrə rıçaqların böyük hissəsini itirib. Buna görə də mənim prioritetim sülhün möhkəmləndirilməsi üçün diplomatik fəaliyyətin genişləndirilməsi olacaq".
Bütövlükdə siyasilərin yeni baş katibdən Dağlıq Qarabağ münaqişəsi ilə bağlı gözləntiləri nədir? Məsələyə münasibət bildirən VİP-in sədr müavini Ramil Hüseynovun sözlərinə görə, ölkə Prezidenti İlham Əliyevin yeni baş katibə ünvanladığı təbrikdə Dağlıq Qarabağla bağlı gözləntilərin vurğulanması maraqlı məqamdır: "Bu, beynəlxalq hüquqdan irəli gələn prinsiplərin həyata keçirilməsinin vacib olduğunu göstərir. Belə ki, bəzən BMT qətnamələri dərhal yerinə yetirilir. Ancaq Azərbaycana gəldikdə isə, 20 ildən çoxdur bunun yerinə yetirilmədiyinin şahidi oluruq. A.Quttereş 1995-2002-ci illərdə Portuqaliyanın baş naziri olub. Onun baş nazir olduğu dönəmdə məşhur Lissabon sammiti keçirilib. Belə ki, həmin sammitdə iştirak edən 54 dövlətdən 53-ü Azərbaycanın ərazi bütövlüyünü dəstəkləyib. Təkcə işğalçı Ermənistan bundan imtina edib. Deməyim odur ki, A.Quttereş münaqişə barəsində məlumatlı şəxsdir. Dəfələrlə müxtəlif görüşlərdə bu barədə ona məlumat verilib. Nəzərə almalıdır ki, indiyə qədər bununla bağlı BMT Təhlükəsizlik Şurasının qəbul etdiyi 4 qətnamə yerinə yetirilməyib. Bu amil sözügedən təşkilata hörmət gətirmir. Düzdür, bu məsələdə Təhlükəsizlik Şurasının 5 daimi üzvündən də çox şey asılıdır. Ancaq, hər halda, yeni baş katibin bu istiqamətdə təşəbbüs qaldırması, səy göstərməsi də vacibdir".
Vidadi ORDAHALLI