Fikrət Sadıxov: "Azərbaycan öz torpaqlarını azad etməyə hazır olmalıdır"
ATƏT-in Minsk Qrupunun həmsədr ölkələri - ABŞ və Rusiya Dağlıq Qarabağ münaqişəsinin həlli ilə bağlı bədbin proqnozlar verərək, problemin nizamlanmasının mümkünsüzlüyünü bəyan ediblər.
İlk olaraq ABŞ dövlət katibi Con Kerri bildirib ki, münaqişənin nizamlanması üçün hələlik şərait yaranmayıb. Ardınca Rusiya tərəfi prezidentin köməkçisi Yuri Uşakovun dili ilə diqqətə çatdırıb ki, Kreml Dağlıq Qarabağ münaqişəsinin yaxın vaxtlarda həll olunacağına ümid etmir. Halbuki, Rusiyada aprel döyüşlərindən sonra ilin sonuna qədər 5 rayonun Azərbaycana qaytarılacağı haqda bəyanatlar səslənirdi.
ABŞ və Rusiyanın Qarabağa dair paralel ssenari üzrə pessimist bəyanatlar verməsi ortaya ciddi suallar çıxarır. Həmsədrlərin bu davranışının arxasında hansı maraqlar dayanır?
Politoloq Fikrət Sadıxovun sözlərinə görə, həmsədrlərin bəyanatı anlaşılmazdır: "Con Kerri böyük bir dövlətin aparıcı siyasətçisidir. Maraqlı bir bəyanatdır: "ölkə liderləri sülhə hazır deyil". O, Azərbaycanı nəzərdə tutursa, Azərbaycan bu sülhə çoxdan hazırdır və bu hazırlığı nəinki bəyanatlarla, hətta əməlləri ilə nümayiş etdirir. İş orasındadır ki, Azərbaycanın torpaqları işğal altındadır, Ermənistanın deyil. Dağlıq Qarabağ problemi isə hələ də həll olunmayıb. Bu məsələlər gündəmə çıxmalıdır və Con Kerri bunu çox gözəl başa düşür. Aprel hadisələrindən sonra Ermənistanın daxili həyatında ciddi hadisələr baş verdi. Kadr dəyişiklikləri oldu: baş nazir getdi, nazirlər dəyişildi, bir sıra generallar vəzifələrdən uzaqlaşdırıldı və bəzilərinə cinayət işi açıldı. Bu reallıqdır. Ancaq danışıqlar prosesinə bunun zərrə qədər də təsiri olmadı. Kerrinin ardınca başqa bir həmsədr ölkənin pessimist köklü bəyanat verməsi bizim üçün bir reallığı diqtə edir: Azərbaycan öz torpaqlarını azad etməyə hazır olmalıdır. Bu ruh bizdə var. Bunu ilk növbədə Ermənistan başa düşməlidir. Digər aparıcı dövlətlər və Minsk Qrupunun həmsədrləri də bunu dərk edib nəticə çıxarmalıdır. Amma görünən odur ki, nə dünya, nə də Minsk Qrupunun həmsədrləri nəticə çıxarmağa tələsmir. Belə olmasaydı, danışıqlar prosesində irəliləyiş əvəzinə geriləmənin şahidi olmazdıq".
Məhəmmədəli QƏRİBLİ