Fəzail Ağamalı: "Baxaq görək, ermənilər bundan nəticə çıxaracaq, ya yox"
Rusiyanın xarici işlər naziri Sergey Lavrov Qarabağ münaqişəsinin həllində Türkiyənin pozitiv rol oynaya biləcəyi ilə bağlı bəyanat verib. Qeyd edək ki, oktyabrın 14-ə Kollektiv Təhlükəsizlik Müqaviləsi Təşkilatının iclasına qatılmaq üçün İrəvana gələn Rusiya xarici işlər naziri Sergey Lavrov Türkiyənin Qarabağ konfliktinin həllində pozitiv rol oynaya biləcəyini bildirib.
KTMT-nin iclasının yekununda qəbul edilən bəyanatda təşkilata üzv ölkələr Dağlıq Qarabağ münaqişəsinin həlli ilə bağlı Vyana və Sankt-Peterburq sammitlərinin nəticələrinə və ərazi bütövlüyünə dəstək ifadə edib. Qeyd edək ki, Türkiyə bölgədə sabitliyin təmin edilməsində olduqca maraqlıdır. Rusiya-Türkiyə münasibətlərinin getdikcə dərinləşməsi NATO-nun qısqanclığı fonunda davam edir. Türkiyə heç vaxt Dağlıq Qarabağla bağlı mövqeyindən imtina edən deyil və Ankara bu məsələdə Moskvaya lazımı təlqinləri göstərəcək. Azərbaycandan müəyyən kompromislər tələb olunmasına baxmayaraq, bir ortaq yol tapılaraq məsələnin həllində, yavaş-yavaş da olsa, irəliləmək mümkün olacaq. Düzdür, ermənilər hələ ki, bəyanatdan uzağa getmir, rayonları boşaltmağa tələsmir, Azərbaycan tərəfindən qəbul edilməsi çətin olan şərtlər irəli sürürlər. Ancaq bu dəfə hər şey ermənilərin arzusuna uyğun getməyəcək. Ermənistanın işğalçı bir ölkə olması təkcə MDB məkanında deyil, beynəlxalq səviyyədə bu ölkə ilə bağlı müəyyən bir siyasi məsuliyyət yaradır. Üstəlik, Azərbaycan diplomatiyasının arxasında güclü ordusu dayanır.
Lavrovun bu bəyanatını necə şərh etmək olar?
Millət vəkili Fəzail Ağamalının sözlərinə görə,
Rusiya-Türkiyə münasibətlərinin istiləşməsi iki dövlətin maraqlarına xidmət etdiyi kimi, Azərbaycanın da milli maraqlarına cavab verir: "Türkiyə-Rusiya münasibətləri nə qədər yüksək səviyyədə olarsa, bu münasibətlər Azərbaycanın işğal altında olan torpaqlarının azad olunmasına öz müsbət təsirini göstərə bilər. Lakin burada da müəyyən problemlər mövcuddur. Bildiyiniz kimi, aprel döyüşləri ermənilər və onun himayədarlarına ağır zərbə oldu. Bundan dərhal sonra Vyanada və Sankt-Peterburqda yüksək səviyyəli görüşlər keçirildi. Bu görüşlərdə beş rayonun, hətta yeddi rayonun azad olunması gündəmə gəldi. Bu zaman Ermənistanda bir siyasi şou düzəldildi. Orada baş verən hadisələr bir daha sübut etdi ki, Ermənistan işğalçılıq siyasətindən geri çəkilmək niyyətində deyil və torpaqları işğaldan azad etmək istəmir.
Digər bir məqam isə ondan ibarətdir ki, ölkə başçısı İlham Əliyevin bu yaxınlarda ermənilərin himayədarlarının Azərbaycana təzyiq edərək Qarabağın müstəqilliyinin tanınmasını istədiyi ilə bağlı səsləndirdiyi açıq fikirlər vəziyyətin o qədər də xoşagələn olmadığını göstərir. Bu kontekstdə Türkiyə-Rusiya münasibətlərinin yüksələn xətt üzrə inkişaf etməsi fonunda Azərbaycanın işğal altındakı torpaqlarının azad olunmasının tərəflər arasında müzakirə predmeti olması, əlbəttə ki, müsbət hadisədir".
Millət vəkilinin sözlərinə görə, Rusiya XİN başçısı Sergey Lavrovun İrəvanda verdiyi mesaj yerinə düşdü: "Baxaq görək, ermənilər bundan nəticə çıxaracaq, ya yox. Güman etmirəm ki, ermənilər bundan nəticə çıxarsın. Hər zaman demişəm və bir daha təkrar edirəm, işğal altında olan torpaqlarımızın işğaldan azad edilməsinin yeganə açarı milli ordumuzun şücaəti və qəhrəmanlığındadır".
Məhəmmədəli QƏRİBLİ