Elman Nəsirov: "Faktiki olaraq status-kvonun qorunub saxlanmasına xidmət edir"
Moskva Dağlıq Qarabağ münaqişəsinin yaxın gələcəkdə həll oluna biləcəyini düşünmür, amma mübahisənin sona çatdırılması üçün səylərini əsirgəməyəcək. Bunu Rusiya prezidentinin köməkçisi Yuri Uşakov deyib. "Dağlıq Qarabağ münaqişəsinin yaxın gələcəkdə həll oluna biləcəyi məsələsində böyük nikbinlik olduğunu deməzdim. Ancaq biz tərəfdaşlarımızla əməkdaşlıq şəklində Bakı və Yerevanla işləməyə davam edəcəyik", - deyə Y.Uşakov vurğulayıb.
Yay aylarında daha nikbin təsir bağışlayan Rusiyanın bu bədbinliyi nə ilə bağlıdır?
Politoloq Elman Nəsirovun sözlərinə görə, Yuri Uşakovun fikirləri faktiki olaraq Con Kerrinin mövqeyi ilə üst-üstə düşür: "Əslində buna təəccüblənmədim. Həm Fransa, həm ABŞ, həm də Rusiyanın Dağlıq Qarabağ münaqişəsi ilə bağlı mövqeyi həmişə eyni olub. Yəni lazımi addım atılmır, pauza verirlər və son nəticədə Ermənistanın maraqları təmin olunur. Bu nöqteyi-nəzərdən Uşakovun bəyanatının ABŞ tərəfinin mövqeyi ilə üst-üstə düşməsi kifayət qədər gözlənilən idi".
E.Nəsirovun sözlərinə görə, son açıqlamalar Ermənistanı arxayınlaşdıracaq: "Uşakov prezidentin köməkçisidir. Əgər o, prezidentin köməkçisi kimi bəyanat səsləndirirsə, bunu təkcə onun qənaəti kimi qəbul etmək düzgün olmazdı. Uşakov yaxşı bilməlidir ki, Azərbaycan sülh prosesinə sadiqdir. Bizim ən böyük güzəştimiz ondan ibarətdir ki, torpaqlarımızın işğal altında qalmasına hələ ki, dözürük. Uşakov açıqlamaları ilə Ermənistanın təcavüzkarlıq siyasətinə dəstək vermiş oldu və İrəvan arxayınlaşdı. Artıq iki həmsədr dövlətin belə bir mövqedə olması münaqişənin həlli ilə bağlı sülh prosesini buxovlayan amildir və faktiki olaraq status-kvonun qorunub saxlanmasına xidmət edir. Bu da Ermənistanın mövqeyinin möhkəmlənməsi deməkdir. Biri Ermənistana silah, maliyyə verir, digəri isə təbliğatını aparır. Bu gün münaqişə öz həllini tapmayıbsa, birbaşa məsuliyyət Ermənistanın havadarlarının üzərinə düşür".
E.Nəsirov hesab edir ki, Azərbaycan münaqişənin həlli ilə bağlı iki yolun olduğunun fərqindədir: "Biz birinci yola, yəni sülh prosesinə sadiqik. Lakin bu, nəticə vermədiyi təqdirdə, hərb variantını heç kəs bizim əlimizdən ala bilməz".
Məhəmmədəli QƏRİBLİ