Amerikalı ekspert: “Rusiya anlayır ki, Türkiyə Qarabağ münaqişəsinin həllinə kömək edə bilər”
“Türkiyə Dağlıq Qarabağ münaqişəsinin həllində müsbət rol oynaya bilər”. APA-nın TASS-a istinadən verdiyi məlumata görə, bu sözləri Rusiya xarici işlər naziri Sergey Lavrov deyib.
O bildirib ki, Türkiyə Dağlıq Qarabağı təcridolunmadan azad edərək, regionda normal iqtisadi münasibətləri təmin edərək bunu edə bilər: “Bu bizim üçün çox vacib faktordur. Ermənistan və Türkiyə Dağlıq Qarabağ münaqişəsi nəzərə alınmadan əldə etdikləri razılaşmanın icrasına başlasa, çox sevinərik. Lakin biz belə hiss edirik ki, Ermənistan-Türkiyə münasibətlərinin normallaşması üçün Dağlıq Qarabağ münaqişəsinin həlli açar rolunu oynayır”.
Nazir əlavə edib ki, Dağlıq Qarabağ münaqişəsinin nizamlanması prosesi Ermənistan-Türkiyə münasibətlərinin normallaşmasında həlledici olacaq: “Türkiyə bütün regionda logistik, nəqliyyat, infrastruktur sahələrində qarşılıqlı fəaliyyəti təmin edərək müsbət rol oynaya bilər” (TREND).
Onun sözlərinə görə, Türkiyə regionda normal qarşılıqlı iqtisadi fəaliyyəti təmin edərək müsbət rol oynaya bilər: “Bu həmişə diqqət yetirdiyimiz vacib faktordur”.
Rusiya-Türkiyə münasibətlərinin normallaşması regional dialoq üçün yeni imkanlar açır. Bu barədə isə Trend-ə Türkiyənin "Strategic Outlook" analitik mərkəzinin sədr müavini, ekspert Mehmet Fatih Öztarsu deyib. Ekspert həmçinin qeyd edib ki, Türkiyə Dağlıq Qarabağ münaqişəsinin nizamlanmasında müsbət rol oynaya bilər, belə ki, Rusiya regional problemlərlə bağlı məsələlərdə Türkiyəni öz tərəfdaşı bilir.
Ekspert bildirib: "Dağlıq Qarabağ məsələsində də, yəni Moskva regiona münasibətdə Qərbin yanaşmalarına etibar etmir, bu səbəbdən Türkiyə və İranın rəyləri ilə hesablaşmağı daha doğru sayır".
Ekspertin fikrincə, Moskva münaqişənin həlli üçün region ölkələrinin əməkdaşlığına ümid edir.
Rusiyanın xarici işlər nazirinin açıqlamasını şərh edən siyasi analitik, Vaşinqtonda "Gulf State Analytics"in baş məsləhətçisi Teodor Karasik isə deyib ki, Lavrovun Türkiyənin Dağlıq Qarabağ münaqişəsinin həllində müsbət rol oynaya bilməsi ilə bağlı fikirləri tərəflərin münasibətlərin yeni səviyyəsinə çıxmasından xəbər verir.
Onun sözlərinə görə, bu yaxınlarda Türkiyə və Rusiya rəhbərlərinin görüşündə nəinki İŞİD-lə mübarizə yolları və Suriya böhranı müzakirə olundu, eləcə də Dağlıq Qarabağ münaqişəsinin həlli ilə bağlı fikir mübadiləsi aparıldı: "Azərbaycanın energetika sahəsində əməkdaşlıq və infrastruktur layihələri məsələlərində Türkiyəyə etibar etdiyini nəzərə alaraq, Rusiya hesab edir ki, Türkiyə münaqişənin həllinə kömək edə bilər".