Vüqar Qədirov: "Həmin təşkilatın nəzdindəki bu qurumun da MSK ilə gələcək əməkdaşlığa önəm verməsi referenduma dəstəyin ifadəsi kimi başa düşülə bilər"
Mərkəzi Seçki Komissiyasının (MSK) sədri Məzahir Pənahov ATƏT-in Demokratik Təsisatlar və İnsan Hüquqları Bürosunun (DTİHB) direktoru Mixael Linklə görüşüb. ATƏT/DTİHB-nin direktoru MSK ilə qarşılıqlı faydalı əməkdaşlığı davam və daha da inkişaf etdirmək istədiklərini bildirib.
Qeyd edib ki, bu cür görüşlər əlaqələrin dərinləşməsinə öz töhfəsini verir.
M.Pənahov diqqətə çatdırıb ki, MSK beynəlxalq qurumlarla əməkdaşlığa hər zaman açıqdır və bu münasibətlər Azərbaycanda seçki praktikasının daha da təkmilləşdirilərək hazırkı inkişaf səviyyəsinə çatmasında, əldə olunan nailiyyətlərdə və qazanılmış yaxşı təcrübələrdə mühüm əhəmiyyət kəsb edir. Azərbaycanda hazırda mövcud olan hərtərəfli şərait və demokratik mühit seçkilərin də azad, ədalətli və şəffaf keçirilməsinə geniş imkanlar yaradır.
Görüş çərçivəsində M.Link, həmçinin, M.Pənahovu bu ilin noyabr ayında Vyanada keçiriləcək seçki məsələlərinə həsr olunan tədbirə şəxsən dəvət etməkdən məmnunluğunu bildirib.
Görüşdə, həmçinin, qurumlar arasındakı əməkdaşlıqdan əldə olunmuş təcrübə müzakirə olunub.
DTİHB-in MSK-ilə əməkdaşlığa bu səviyyədə önəm verməsi ATƏT-in referenduma verdiyi dəstək kimi başa düşülə bilərmi?
Referendum zamanı seçkiləri yaxından izləyən QHT rəhbəri Vüqar Qədirov qəzetimizə açıqlamasında bildirdi ki, DTİHB-nin bu mövqeyini normal qiymətləndirmək lazımdır: "Yadınızdadırsa bundan əvvəlki seçkilərdə sözügedən təşkilatın bir qədər fərqli münasibəti nəzərə çarpırdı. Azərbaycanın seçkilərin müşahidəsilə bağlı heç bir beynəlxalq qurumla problemi olmayıb. Biz şəffaflığı tam təmin etdiyimiz üçün, istənilən müşahidə missiyasına şərait yaratmağa hazır olduğumuzu bəyan etmişik. Ötən seçkidə DTİHB ilə müşahidəçilərin sayı ilə bağlı fikir ayrılığımız oldu. Onların bura göndərmək istədiyi müşahidəçilərin sayı digər ölkələrdən kəskin fərqlənirdi. Təbii ki, Azərbaycanın buna etiraz etmək kimi haqqı vardı. Ancaq, göründüyü kimi, bütün bunlar arxada qalıb. Referendumun nəticələrini dünyanın ən nüfuzlu ölkələri və təşkilatları qəbul etdi. Təbii ki, DTİHB bu amili nəzərə alır və bizimlə əməkdaşlığı məqbul bilir. ATƏT-in referendumla bağlı rəyi müsbətdir. Həmin təşkilatın nəzdindəki bu qurumun da MSK ilə gələcək əməkdaşlığa önəm verməsi referenduma dəstəyin ifadəsi kimi başa düşülə bilər. Bu, eyni zamanda, iki qurum arasında əməkdaşlıq prosesini sürətləndirəcək və təcrübə mübadiləsinə səbəb olacaq".
Məhəmmədəli QƏRİBLİ