Sosial-iqtisadi vəziyyətin bərbad gündə olduğu Ermənistanda siyasi durum da sürətlə pisləşməkdə, daha gərgin xarakter almaqdadır. Xüsusən də baş verən istefalar ölkədə qeyri-müəyyən vəziyyət formalaşdırıb. Hakimiyyət rəhbərliyinin bu istefalara getməklə hansı məqsədlər güddüyü də dəqiq bilinmir. Amma maraqlı məqam odur ki, istefalar davam edir.
İndi də nazirlərdən sonra qubernatorlar arasında kütləvi istefalar başlayıb. "Aykakan Jamanak" qəzetinin məlumatına görə, bütün vilayət administrasiya rəhbərləri prezident iqamətgahına dəvət ediliblər. Danışıqların mövzusu qubernatorlardan bəzilərinin istefası olub. Onların arasında Ararat, Armavir, Lori vilayətlərinin rəhbərləri var.
Syunik vilayətinin qubernatoru Surik Xaçatryan da vəzifəsindən kənarlaşdırılıb. Onun yerinə zavod direktoru Maksim Akopyan təyin olunub. Surik Xaçatryanın qızı mətbuata açıqlamasında bundan sonra Serj Sarkisyan hakimiyyətini kəskin tənqid edərək deyib: "Artıq 20 ildir bizi kəmsavad insanlar idarə edir. Onlar Syunikə savadsız rəhbər gətirməklə bu torpağı murdarlamağa çalışırlar". Syunik vilayətinin polis rəisi Vaxtanq Avakyan da işdən çıxarılıb. Ermənistan polisinin mətbuat xidməti rəisin istefaya göndərilməsi səbəbini açıqlamaqdan imtina edib. Məlumata görə, Ermənistanda keçirilən kadr islahatları yaxın vaxtlarda Mərkəzi Banka da çatacaq. Bankın rəhbəri Artur Cavadyanın da istefa verəcəyi gözlənir. Erməni mediası yazır: "Cavadyan 2008-ci ilin mayından Mərkəzi Banka rəhbərlik edir və professional kadr hesab olunur. O bu banka Tiqran Sarkisyanın baş nazir təyin olunmasından sonra rəhbərlik etməyə başlayıb. 2014-cü ilin mayında Cavadyan yenidən sədr təyin olunub, onun səlahiyyətlərinin bitməsinə 3 il yarım vaxt qalıb. Ermənistan qanunvericiliyinə görə, baş bankiri ölkə parlamenti 6 il müddətinə təyin edir və həmin şəxs iki dəfədən artıq seçilə bilməz. Amma səlahiyyətlərinin bitməsinə 3 il yarım vaxt qalsa da, Artur Cavadyan da istefaya göndərilir"
Maraqlıdır ki, yeni kadrların böyük əksəriyyəti də lazımi tələblərə cavab vermir və öz sahəsi üzrə zəruri bilgilərə malik deyil. Məsələn, Ermənistanın yeni müdafiə naziri Vigen Sarkisyan hərbidən tamamilə uzaq şəxsdir. Elə bu səbəbdəndir ki, deputat Zarui Postanjyan bildirir ki, Ermənistan hakimiyyətinin yeni nazirləri küçədən gəlib: "Onların heç birinin siyasi təcrübəsi yoxdur". Deputatın fikrincə, yeni nazirlərin onlara tapşırılan sahələrdən xəbəri yoxdur: "Deyirlər, onlar menecerdirlər və biznesdən gəliblər. Lakin hökuməti idarə etmək menecmentlik deyil, bu siyasətdir. İqtisadiyyat Nazirliyinin adını dəyişib İnvestisiyalar Nazirliyi qoymaqla ölkəyə sərmayələrin axacağını gözləmək olmaz. Düzgün rəqabət şəraiti lazımdır. Yalnız onda 10 milyonluq erməni diasporu sərmayəni Gürcüstana deyil, Ermənistana yatıracaq". Amma hakimiyyət bu məqamlara məhəl qoymur və hələlik istefalar davam edir. Xatırladaq ki, istefa verənlərdən biri də Serj Sarkisyanın parlamentdəki daimi nümayəndəsi, Prezident Aparatının sədr müavini Viktor Dallakyandır. O, siyasətə qoşulacağını bəyan edərək bildirib ki, özünün, yaxud ailə üzvlərinin başına hər hansı hadisə gələrsə, buna görə Serj Sarkisyan məsuliyyət daşıyacaq. Dallakyan "Dönüş" partiyası yaradacağını da deyib. "Qraparak" qəzeti hesab edir ki, Viktor Dallakyan müxalifət düşərgəsinə keçərək iqtidara yeni cəbhə açmağa hazırlaşır. Onun yaradacağı partiyaya Ermənistanın sabiq müdafiə naziri Seyran Ohanyanın sədrlik edəcəyi gözlənir. Hakim Respublika Partiyasında bunu mümkünsüz hesab etsələr də, Ohanyanla Sarkisyan arasında fikir ayrılığı yarandığı deyilir. O, hətta Ermənistan silahlı qüvvələrinin baş qərargah rəisi və Milli Təhlükəsizlik Şurasının katibi vəzifələrindən imtina edib.
Beləliklə, deyildiyi kimi Ohanyan da Dallakyana qoşulsa, bu artıq ciddi müxalif qruplaşma olacaq. Çünki Ohanyanın siyasi ambisiyaları yeni deyil, o özünü Sarkisyandan sonra prezident kimi görürdü. Lakin Qarabağdakı aprel döyüşləri Ohanyanın "sarsılmaz sərkərdə" imicini sarsıtdı, onun illərlə qurduğu müdafiə xətti, ermənilərin özlərinin təsdiq etdiyi kimi, cəmi 40 dəqiqəyə Azərbaycan ordusu tərəfindən yarıldı. Müəyyən ərazi azad olundu. Elə Sarkisyan üçün də Ohanyan kimi ambisiyalı fiquru yolundan kənarlaşdırmaqdan ötrü aprel döyüşləri yaxşı bəhanə oldu. Amma indi Ohanyan daha açıq revanşa hazırlaşır. Digər tərəfdən, 2017-ci il parlament seçkilərinə eks-prezident, Sarkisyanın keçmiş silahdaşı və indiki barışmaz düşməni Robert Köçəryan, onun komandasının üzvü, keçmiş xarici işlər naziri Vardan Oskanyan, radikal səhra komandirləri və digərləri də hazırlaşır. Bu da Sarksiyan üçün əlavə problemlər deməkdir. Digər tərəfdən erməni disporu da Sarksiyandan üz döndərib. Bu arada qeyd edək ki, Sarkisyan "Ermənistan: investisiya forumu 2016" adlı tədbirdə iştirak etmək üçün ABŞ-ın Nyu-York şəhərinə gedib. Heç kim bu səfərin növbəti dilənçilik yürüşü olduğuna şübhə etmir. Bunu Nyu-Yorkda yaşayan erməni icmalarının nümayəndələri də anlayır. Onlar Sarkisyanın səfəri öncəsində dünya ictimaiyyətini hazırkı Ermənistan rəhbərliyi ilə əlaqələri kəsməyə və bu ölkəyə Sarkisyan rəhbər olduğu dövrdə istənilən investisiyaları dayandırmağa səsləyiblər. Elə bu da diasporun Sarkisyana qarşı olduğunu bir daha aydın nümayiş etdirir.
Nahid SALAYEV