Bəhruz Quliyev: “Paraflanan mətn sabah imzalanacaq sülh sazişi ilə Cənubi Qafqazda yeni bir təhlükəsizlik və əməkdaşlıq mühiti formalaşdıracaq”
Avqustun 8-də Azərbaycan və Ermənistan arasında sülh sazişinin mətninin paraflanması mərasimi keçirilib. Sənəd iki ölkə arasında dövlətlərarası münasibətlərin qurulması və sülhün təmin olunmasını özündə əks etdirir. Ağ Evdə keçirilən mərasimdə ABŞ Prezidenti Donald Tramp bəyan edib ki, Ermənistan və Azərbaycan hərbi qarşıdurmadan imtina və diplomatik münasibətlərin bərpası barədə razılığa gəliblər.
Bu hadisənin dünyanın ən qüdrətli dövlətinin dövlət başçısının şahidiyi ilə baş verməsi Azərbaycan-Ermənistan sülh sazişinin qısa müddətdə imzalanmasına, qalan bütün problemlərin ən ideal formada həllinə nə kimi təminat verir?
“Azərbaycan və Ermənistan arasında sülh sazişi mətninin paraflanması ilə bağlı keçirilən mərasim region tarixində dönüş nöqtəsi kimi qiymətləndirilməlidir”
“Səs” qəzetinin baş redaktoru, siyasi ekspert Bəhruz Quliyev baki-xeber.com-a şərhində bildirdi ki, avqustun 8-də ABŞ-da Qafqaz üçün yeni bir tarix yazıldı, yeni münasibətlərin formalaşmasının dönüş günü oldu: “Belə ki, Azərbaycan və Ermənistan arasında sülh sazişi mətninin paraflanması ilə bağlı keçirilən mərasim region tarixində dönüş nöqtəsi kimi qiymətləndirilməlidir. Bu, sadəcə iki dövlət arasında diplomatik razılaşmanın ilkin təsdiqi deyil, həm də dünyanın ən qüdrətli ölkəsinin, yəni ABŞ-ın və onun Prezidentinin bu prosesin birbaşa şahidi və zəmanətçisi kimi çıxış etməsi deməkdir. Paraflanma faktı göstərir ki, tərəflər sənədin hər bəndi üzrə razılığa gəlib və artıq mətnin dəyişdirilməsi mümkün deyil. Yalnız rəsmi imzalanma mərhələsi qalır. Məhz bu səbəbdən ABŞ Prezidentinin iştirakı, Ağ Ev kimi qlobal diplomatiyanın mərkəzində bu hadisənin baş tutması sənədin beynəlxalq hüquqi çərçivədə etibarlılığını və icra mexanizmlərinin təmin olunacağını göstərir".
B.Quliyevin sözlərinə görə, bu mərasim eyni zamanda onu təsdiqləyir ki, Ermənistan hərbi qarşıdurmadan imtina edir, Azərbaycan isə ədalətli sülhün bərqərar olunması üçün prinsipial mövqeyini qoruyur. ABŞ kimi nüfuzlu dövlətin vasitəçilik missiyası sənədin qısa müddətdə imzalanmasına, qalan bütün mübahisəli məsələlərin ən ideal formada həllinə real zəmin yaradır: “Hesab edirəm ki, bu gün paraflanan mətn sabah imzalanacaq sülh sazişi ilə Cənubi Qafqazda yeni bir təhlükəsizlik və əməkdaşlıq mühiti formalaşdıracaq. Azərbaycan diplomatiyasının uğurlu strategiyası, Prezident İlham Əliyevin qətiyyətli iradəsi və beynəlxalq aləmdə artan nüfuzu bu tarixi nəticənin əldə edilməsində həlledici rol oynayıb. Tarix göstərir ki, böyük güclərin iştirakı ilə paraflanan sənədlər - xüsusilə də ABŞ kimi tərəfsiz zəmanətçinin nəzarətində - təkcə kağız üzərində qalmır. Bu, həm Ermənistan, həm də regiondakı digər oyunçular üçün aydın mesajdır: sülh prosesi geriyə dönməyəcək, nəticələr isə Azərbaycan xalqının milli maraqlarına tam uyğun şəkildə təmin olunacaq”.
Günel CƏLİLOVA
