Ermənistanın indiki baş naziri Nikol Paşinyanı hakimiyyətdən uzaqlaşdırmaq istəyi çoxdanın “dostları” olan, 2008-ci ildən sonra bir-birindən uzaqlaşan Serj Sarkisyanla Robert Köçəryanı yenidən birləşdirəcəyinə dair erməni cəmiyyətində müəyyən illüziyalar yaratmışdı. Amma proseslərin gedişi tamamilə bunun əksini göstərir.
Erməni mediasının yazdıqlarından belə bəlli olur ki, sabiq prezidentlər arasında nifaq daha da dərinləşir və bundan məmnun qalan əsas tərəfdlərdən biri də Nikol Paşinyandır. Məsələ ilə bağlı “armenianreport” portalı yazır: “Son 3-4 ildə öz gözlərimizlə şahidi olduğumuz müxalifətin bu qədər aktiv etiraz fəaliyyəti və hücumları ilə Paşinyan hökumətinin 2021-ci ildə keçirilmiş növbədənkənar parlament seçkilərində nəinki ayaqda qala bilməsi, hətta qalib gəlməsi bir çox xarici, hətta yerli ekspert və medianı təəccübləndirdi. Görünən odur ki, 2020-ci il müharibəsindəki məğlubiyyəti, cəmiyyətin müəyyən hissəsinin narazılığını və müxalifətin aqressiv ritorikasını nəzərə alaraq Paşinyanın devriləcəyi gözlənilsə də bu baş tutmadı. Paşinyan nəinki ölkəni idarə etməkdə davam edir, əksinə, mövqeyini daha da möhkəmləndirib. Bu niyə baş verir? Bu sualın cavabı zahirdədir - hər şey Krılovun nağılındakı klassik qu quşu, xərçəng və durnabalığına bənzəyən müxalifətin sıralarındakı ixtilafdır. Ölkəmizdə bəzi insanlar çoxdan şübhələnirdilər ki, indiki hakimiyyətin əsas rəqibləri - Köçəryanla Sarkisyan arasından qara pişik keçib. Belə olmasaydı, müxtəlif bloklarla növbədənkənar seçkilərə getməzdilər. Axı, məntiq özü onlara deyirdi ki, bir yumruqda birləşmək və Paşinyanı birlikdə əzməyə çalışmaq lazımdır. Amma yox, onlar öz aralarında razılığa gələ bilmədilər, 44 günlük müharibədən sonra və 2021-ci il seçkiləri ərəfəsində onlara çox yaxın görünən portfelləri bölə bilmədilər. Nəticədə Köçəryanla Sarkisyan arasında ziddiyyətlər sağlam düşüncədən üstün oldu və onlar seçkilərdə məğlub oldular. Və bu gün parlamentdə jurnalistlərlə söhbətində Köçəryanın “Hayastan” blokunun deputatı Aqnessa Xamoyan nəhayət, bəzilərinin çoxdan şübhələndiyi şeyi – Robert Sedrakoviçin və Serj Azatoviçin, yumşaq desək, bir-biri ilə anlaşa bilmədiklərini söylədi. “Robert Köçəryan mətbuat konfransı keçirir, ondan sonra üçüncü prezident Serj Sarkisyanın tərəfdarları olan Erməni Milli Konqresi tərəfindən həyəcanlı fikirlər səsləndirilir. Armen Aşotyanın cavabı gəlir ki, bu artıq rəsmi cavabdır, çünki o, Ermənistan Respublikaçılar Partiyasının sədr müavinidir. İkinci prezidentin aparat rəhbəri müsahibəsi zamanı mahiyyət etibarı ilə ikinci prezidentin və komandasının 2018-ci ildən sonra danışmadığı mötərizəni açıb, çünki bir-birini vurmamaq barədə centlmen razılaşması var idi ki, bu da müşahidə olunurdu. Yəni, 2018-ci ildə hakimiyyət dəyişikliyi çərçivəsində keçmişi xatırlamamaq, hakimiyyət dəyişikliyindən əvvəl yaranmış bir sıra məsələlərə toxunmamaq, Qarabağı və Ermənistanı məhvə aparan hakimiyyətin olması reallığını qəbul etmək, bir-birinə zərbə vurmamaq və bu hakimiyyətə qarşı vahid meydanda, birləşmə deyil, komanda şəklində döyüşmək kimi bir centlmen razılaşması var idi. İndi isə 2008-2018-ci illərdə hakimiyyətin bütün təbliğat maşınının ikinci prezidentə qarşı işləməsi ilə bağlı sorğulara cavab olaraq, Aşotyan mahiyyətcə etiraf edir və deyir ki, bu, Robert Köçəryanın siyasətə qayıdışı ilə bağlı iddialar irəli sürdüyü üçün baş verib. Yəni sırf təhlükə hiss etdiklərinə, Köçəryanın qayıda biləcəyini düşündüklərinə görə öz əməllərinə haqq qazandırmağa başladılar, 2008-2018-ci illərdə ikinci prezidentə qarşı aparılan antitəbliğata haqq qazandırdılar? Amma bu barədə ilk danışan biz deyildik”, - Xamoyan bildirib.Yəni, Köçəryanın 2008-ci ildə hakimiyyəti mahiyyətcə Sarkisyana təhvil verməsinə, erməni xalqının qanını tökməsinə baxmayaraq, üçüncü prezident hakimiyyətdə olduğu illər ərzində sələfindən qorxurdu. Yəni, hətta Qarabağla bağlı Ermənistanda birgə iş illəri də arxa plana keçib.
Sarkisyan hakimiyyəti möhkəm ələ keçirdi və bunu heç kimlə, xüsusən də Köçəryanla bölüşmək fikrində deyildi. Bu, ikinci prezidentin Sarkisyanın əsas məqsədi ikinci prezidentlik müddəti başa çatdıqdan sonra hakimiyyətdə qalmaq olan konstitusiya islahatından narazılığını izah edir. Sarkisyan sistemli şəkildə Ermənistanın siyasi meydanını Köçəryanın himayədarlarından təmizlədi. Sonuncu, əgər səhv etmiriksə, 2016-cı ilin aprel müharibəsindən sonra Sarkisyanın hərbi idarədən uzaqlaşdırdığı müdafiə naziri Seyran Ohanyan olub. Eyni zamanda Sarkisyan ailəsinin nəzarətində olan mətbuatda Köçəryana qarşı təbliğat aparılıb. Ancaq bunun artıq heç bir əhəmiyyəti yoxdur. Köçəryanla Sarkisyan istədikləri qədər kürəyi dəyişdirə bilərlər, biz buna əhəmiyyət vermirik. Ermənistanın ikinci və üçüncü prezidentlərinin elə qanlı izi, elə korrupsiya cığırı var ki, onların hakimiyyətə qayıdışı həmişəlik bağlanıb. Məhz buna görədir ki, onlar bütün bu illər ərzində Paşinyanı devirə bilməyiblər. Xamoyanın sözləri məhz buna görə gülməlidir: “Mən 2018-ci ildə hakimiyyətin Nikol Paşinyana təzimlə necə təhvil verilməsi ilə bağlı açıqlama vermək istəmirəm və verə bilmərəm, lakin mənim və minlərlə vətəndaşımızın hələ də cavabını almamış çoxlu suallarımız var”. Köçəryanın ətrafı tərəfindən Sarkisyana zərbə endirmək əmri verilən xanım hələ də anlamırdı ki, 2018-ci ildə xalq Paşinyan üçün yox, özü üçün küçələrə çıxıb. insanlar ölkəni, xalqı uçuruma gətirən Köçəryanlara, Sarkisyana qarşı çıxdı. Ölkə dəyişikliklər, korrupsiyadan və köləlikdən azad olmaq üçün susamışdı. Bütün bunları isə Paşinyan verib. Bu gün Köçəryanın və Serjikin tərəfdarları bir-birinə istədikləri qədər palçıq ata bilirlər. Onlar nə qədər çox çabalayırlırsa, erməni cəmiyyətinin bu rüsvayçı keçmişdən əbədi olaraq xilas olmaq istəməsi bir o qədər məntiqli olur”. Erməni analitik Tevos Arşakyan isə bildirib ki, Ermənistan Avropa İttifaqı və NATO ilə yaxınlaşdıqca, İrəvanın Qərblə münasibətləri möhkəmləndikcə, Rusiyanın “beşinci kolon”u əsəbiləşir: “Sabiqlər – Robert Köçəryan və Serj Sarkisyan aktivləşirlər, bir növ, xortlayırlar. Sarkisyanın parlamentdəki “Şərəfim var” fraksiyası Ermənistanın Aİ-yə üzvlük prosesinə başlamaq təşəbbüsü barədə qanunun əleyhinə səs verdi. Elə Köçəryanın “Hayastan” bloku da analoji addım atdı. Köçəryan hətta mətbuat konfransı keçirib yenidən cəfəngiyyatlarını səsləndirdi. Moskvanı və onun Ermənistan daxilindəki “mələklərini” hər cür şəkildə ölkə hakimiyyətinin sükanı arxasına keçirməyə çalışanları qorxudan Paşinyan hakimiyyətinin Qərbə inteqrasiya yolunu tutmasıdır. Onlar Rusiyanın İrəvanın Avropayönümlü istəklərinə respublikanın Avrasiya İqtisadi İttifaqından çıxmasının başlanğıcı kimi baxdığını söyləməklə erməni cəmiyyətini qorxuya salırlar. Amma bütün bunlar boş söhbətlərdir. Biz çox yaxşı başa düşürük ki, onlar bizi sadəcə olaraq özlərinə daha sıx bağlamağa və Qərbə getməyimizə imkan verməməyə çalışırlar”.
Nahid SALAYEV
