Kollektiv Təhlükəsizlik Müqaviləsi Təşkilatı (KTMT) Azərbaycanla sərhəddə Ermənistana göndəriləcək monitorinq missiyası üzərində işini davam etdirir.
Bu barədə KTMT-nin mətbuat katibi Vladimir Zaynetdinov məlumat verib.
Onun sözlərinə görə, Ermənistanın baş naziri Nikol Paşinyan KTMT-yə sorğu təqdim etdikdən sonra Kollektiv Təhlükəsizlik Şurası “Ermənistan Respublikasına yardım göstərilməsi üzrə birgə tədbirlər haqqında” qərar layihəsi hazırlayıb.
Zaynetdinov bildirib ki, qərar Ermənistan-Azərbaycan sərhədinə KTMT-nin müvəqqəti monitorinq missiyasının göndərilməsini nəzərdə tutur, missiyanın mandatını və iş müddətlərini müəyyən edir. Layihə yüksək hazırlıq səviyyəsindədir, lakin bu sənədi KTMT XTK-nın sonuncu sessiyasında qəbul etmək mümkün olmayıb.
Göründüyü kimi, Paşinyan bir tərəfdən Avropa Birliyinin missiyası adı ilə Fransanı regiona soxur, digər tərəfdən isə onlarla antoqonist mövqedə olan KTMT müşahidəçilərini sərhədə dəvət edir. Bir-birilə düşmən mövqedə olan iki qütbün müşahidəçilərini eyni anda regiona dəvət etməklə Paşinyan nə etməyi planlayır?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Paşinyanın siyasəti qeyri-müəyyən vəziyyətdədir: “Onlar özləri də bilmirlər nə istəyirlər. Ona görə də heç kəsə yox demirlər. Bir yandan Qərbin ayağına yıxıldı ki, onlardan dəstək alsın. Bildiyimizə görə, Emanuel Makron onlara vədlər verdi ki, guya Avropa İttifaqının xüsusi missiyasını göndərəcək. Dərhal Praqada Prezidentin cavabı ondan ibarət oldu ki, bu qeyri-məqbul yanaşmadı. Biz o missiyanı öz ölkəmizə buraxmayacağıq. Suverenliyimizi müdafiə etdik və digər tərəfdən göstərdik ki, lazımsız təşəbbüslərə heç bir lüzum yoxdur. İndi isə Rusiya artıq görür ki, Paşinyan oyunbazlıqlara üstünlük verir. Ona görə də KTMT missiyasının gəlməyi ilk növbədə Moskvanın bir niyyətidir. Çünki, ümumiyyətlə, Qafqaz həmişə Rusiyanın təsiri altında olub, o cümlədən də ən asılı vəziyyətdə Ermənistan sayılıb, bu gün də belədir. Ona görə də Rusiya bu məsələni buraxa bilməz ki, Paşinyan öz istəyilə kimi istəyir bura dəvət etsin, kimi istəyir etməsin. Bu baxımdan cavab ondan ibarətdir ki, KTMT-nin müçahidəçiləri gəlsinlər. Əlbəttə, burada supergüclərin qarşıdurmasının biz şahidi oluruq. Ermənistanın burda heç bir təsiri yoxdur. Ermənistan həm KTMT - dən ehtiyat edir, digər tərəfdən isə Lukaşenko belə Ermənistana təsir edir ki, sən Azərbaycanla dil tap. Yəni o həm öz fikrini, həm də Moskvanın fikrini bildirir. Ermənistan Azərbaycanın dediyi bir çox məsələlərlə bağlı razılaşmaya getməlidir. Çünki bu olmasa heç vaxt sülhə aparan yol açıq görünməyəcək. Mən belə başa düşürəm ki, Ermənistanın hər bir təklifə, hər bir təkidə özlərinin əks təsiri yoxdursa, əlbəttə, biz bir daha şahid oluruq ki, Ermənistanın suverenliyi sadəcə formalizm səviyyəsində bir anlayışdır. Bu ölkə öz suveren hüquqlarını reallaşdıra bilmir, digər tərəfdən də onun özünün düşünülmüş dərin dövlət siyasi xətti yoxdur. Təbii ki, bu, Ermənistanı spesifik bir məmləkət kimi təqdim edir. Çünki əgər ölkə varsa, onun özünün dövlətçilik yanaşması, dövlət siyasəti olur. Onun özünün prinsipial məsələlərə xüsusi mövqeyi olur. Amma Ermənistanda bunu görmürük. Ermənistan sadəcə başqa dövlətlər üçün qapazaltı hesab olunur. Hələ ki, bu vəziyyət onları qane edir”.
Məhəmmədəli QƏRİBLİ
