İyunun 28-də Müdafiə Nazirliyi qarşısına toplanan, Vətən müharibəsində iştirak edib, ancaq medallarla təltif edilməyən bir qrup şəxs müharibədən sonra müxtəlif problemlərlə üzləşdiklərini bildirib. Onlar arasında bəziləri qazi statusu və medal ala bilmədiklərini deyiblər.
Bundan əlavə, onlardan bir çoxu qeyd ediblər ki, iştirak etdikləri bir sıra döyüşlər sənədlərdə əks olunmayıb. Səsləndirilən fikirlərə görə, elə qazilər, zabitlər var ki, 3-4 əməliyyatda iştirak etdiyini deyir, amma 1-2-si sənədləşib. Əksəriyyəti də deyir ki, sənədləri düzgün tərtib edilmədiyi üçün əlillik dərəcəsi də ala bilmirlər.
Bu necə ola bilir ki, qazilər haqqında məlumatlar hazırlanarkən ciddi səhvlərə yol verilir? Bəzi qazilərin üzləşdikləri bu problemi kimlər və necə yaradır? Bəziləri deyirlər ki, rayon icra hakimiyyətləri məlumatları aidiyyəti qurumlara düzgün ötürməyiblər.
“Müdafiə Nazirliyi və onun strukturları bu işlə ciddi şəkildə məşğul olmalıdırlar”
Qarabağ Azadlıq Təşkilatının (QAT) sədri Akif Nağı “Bakı-Xəbər”ə bildirdi ki, bu problem uzun müddətdir cəmiyyəti ciddi düşündürür. “Hələ Birinci Qarabağ müharibəsi dövründən də bu problem vardı. İndiyə qədər əlillik dərəcəsini, veteranlıq vəsiqəsini ala bilməyən Birinci Qarabağ müharibəsi qaziləri, müharibə iştirakçıları var. Mənə elə gəlir ki, bunun kökündə Müdafiə Nazirliyinin müvafiq strukturları dayanırlar. Müdafiə Nazirliyi sənədləşməni vaxtında və dəqiq şəkildə həyata keçirməli, hərbi hissələr faktları dəqiq şəkildə təqdim etməlidirlər. Eyni zamanda, Müdafiə Nazirliyinin nəzarətində və təsir dairəsində olan hərbi hospitallar, poliklinikalar var, onlar bu işə səliqəli yanaşırlar. Bu problemin kökündə Müdafiə Nazirliyi və onun strukturları, o cümlədən də tibbi xidmət strukturları dayanırlar. Bu işin məsuliyyəti hərbi hissələrin rəhbərlərinin üzərinə düşür, çünki vaxtında sənədləşdirmə qüsursuz şəkildə hazırlanıb göndərilsəydi, bu cür problemlər ortaya çıxmazdı. Biz bu problemin içindəyik, bu barədə bizə çox müraciət edirlər. Tutaq ki, hərbi hissə ləğv olunub, yaxud başqa bir hərbi hissəyə birləşdirilib, onun arxivi bağlanıb, sənədləri də harasa göndərilib, o sənədləri isə hərbçi gedib tapa bilmir. Kimin bu işə nəzarət etdiyi, kimin arayış verməli olduğu məlum deyil. Məsəl üçün deyirəm. Bu sahədə kifayət qədər ciddi problem var. Bu məsələlərlə bağlı dövlət səviyyəsində ciddi tapşırıq verilməli, Müdafiə Nazirliyi və onun strukturları bu işlə ciddi şəkildə məşğul olmalıdırlar. Burada həm səhlənkarlıq elementləri, həm də təmənna məsələsi var. Bu işi çətinləşdirməklə və hərbçiləri özlərindən asılı vəziyyətə salmaqla müəyyən təmənna umurlar, neqativ hallara yol verirlər, burada çox böyük bir biabırçılıq var. Qazilər deyirlər ki, həkim komissiyasından keçmək üçün pul verməlidirlər, xəstəxanadan çıxanda tələb olunan arayışa da pul ödəməlidirlər, hərbi hissə rəhbərliyinə pul verməlidirlər. Yəni bu cür çirkin söz-söhbətlər var, biabırçılıqdır. VTEK deyilən bir qurum var. Bu qurumla bağlı bizim təşkilata müraciət edən qazilərin fikirlərini sizin qəzet vasitəsilə çatdırmaq istəyirəm. Bu məsələlər mətbautda da getsin. Qazilər deyirlər ki, VTEK açıq bazardır, əlilliyin müxtəlif dərəcələrini almaq üçün 5 mindən 8 minə qədər qiymət qoyulub. Hökumətin aidiyyəti strukturları niyə bu məsələni araşdırmır, niyə bu qurumla bağlı məsələləri nəzarətə götürmürlər? Bu, milli təhlükəsizlik məsələsidir. Hesab edirəm ki, qazilərimizin bu şikayətlərini Dövlət Təhlükəsizliyi Xidməti nəzarətə götürməlidir. Bu iş dövlətin təhlükəsizliyinə zərbə vurur. Ölkənin ərazi bütövlüyünün bərpası uğrunda canını əsirgəməyən, sağlamlığını qurban verən müharibə iştirakçısına əlillik dərəcəsi vermək üçün ondan pul almaq olar? Bu biabırçılıq geniş yayılıb”.
A.Nağının sözlərinə görə, Müdafiə Nazirliyi qarşısına toplaşan qazilərin, Vətən müharibəsi iştirakçılarının probleminə biganə qalınmamalı və onların çətinlikləri aradan qaldırılmalıdır. Onun bildirdiyinə görə, bu gün əsas məsələ Vətən müharibəsi iştirakçılarının təltiflərdən, adlardan, imtiyazlardan kənarda qalan təmsilçilərinin öz haqlarını almasıdır. “Azərbaycanda gündə bir QHT yaranır, gündə bir qrant layihəsi udulur. Mən QHT-lərə müraciət etmişəm ki, gəlin, Vətən müharibəsində iştirak edən, lakin müharibədən sonra öz haqqını almayan şəxslərin problemləri ilə məşğul olaq, yığışıb VTEK-ə gedək, yaxud Əmək və Əhalinin Sosial Müdafiəsi Nazirliyinə üz tutaq, gedib o təşkilatlarda oturaq və qazilərimizə, müharibə iştirakçılarımıza elan edək ki, biz buradayıq, gəlin, biz onların problemlərini yerində həll edək. Çıxaq VTEK-in rəhbərliyinin qarşısına ki, bu adamın əlillik dərəcəsini niyə vermirsən? Amma QHT-lər də səsimizə səs vermir ki, bu işləri edək. Hesab edirik ki, dövlət səviyyəsində bu məsələyə nəzarət olunmalıdır. Qazilər deyirlər ki, “VTEK açıq bazardır, pulunu ver, əlilliyini al”. Bu biabırçılıqdır, bu, dövlətin təhlükəsizliyinə çox böyük təhdiddir. Ona görə də vəziyyət belədir. Bunu da nəzərə almalıyıq. Heç zaman istəməzdik ki, qazilər Müdafiə Nazirliyinin qarşısına toplaşıb haqlarını tələb etsinlər. Demək, buna məcbur olublar. Onların haqları ödənilməlidir ki, məcbur olub, gedib Müdafiə Nazirliyinin qarşısında aksiya keçirməsinlər. Onlar döyüşüblər, döyüş adamlarıdırlar, uzun müddət özlərinə sığışdırıb heç bir yerə getməyiblər, amma indi nazirliyə məcburiyyətdən gediblər. Ona görə də bu məsələlər dövlət səviyyəsində yoluna qoyulmalı, nizama salınmalıdır” - deyə A.Nağı qeyd etdi.
İradə SARIYEVA
